გერმანიაში ექთანმა 8000 ადამიანს კორონავირუსის საწინააღმდეგო ვაქცინის ნაცვლად ფიზიოლოგიური ხსნარი გაუკეთა - რას ამბობენ სამართალდამცველები

ხელისუფლების წარმომადგენლები ჩრდილოეთ გერმანიის 8000-მდე მცხოვრებს სთხოვენ, რომ კორონავირუსის ვაქცინაცია განმეორებით ჩაიტარონ. ამის მიზეზი კი ისაა, რომ ექთანმა მათ "კოვიდ-19-ის" ვაქცინის ნაცვლად, ფიზიოლოგიური ხსნარი გაუკეთა.

როგორც BBC-ი წერს, საქმეში სამართალდამცველები არიან ჩართულნი და ამ დრომდე გამოძიება გრძელდება. გამოცემის ცნობით, თავდაპირველად ითვლებოდა, რომ მარტსა და აპრილში ფიზიოლოგიური ხსნარი ექთანმა მხოლოდ ექვს ადამიანს გაუკეთა და ის ამას თავადვე აღიარებდა.

ყოველივეს კი იმით ხსნიდა, რომ ვაქცინები დაეღვარა და სურდა ეს ფაქტი დაეფარა.

გამოძიების ცნობით, დაზარალებული 8000 ადამიანიდან უმეტესობა 70 წელს გადაცილებული, ანუ პანდემიის რისკ-ჯგუფია.

ინსპექტორი პიტერ ბერი ამბობს, რომ 40 წლის ექთანს, კორონავირუსთან დაკავშირებით სოციალურ ქსელში სკეპტიკური პოსტები ჰქონდა გაზიარებული და ხელისუფლებას ვირუსის გავრცელების პრევენციის მიზნით დაწესებული შეზღუდვების გამო აკრიტიკებდა.

სამართალდამცველები არ გამორიცხავენ, რომ შესაძლოა, ექთანს პოლიტიკური მოტივებიც ამოძრავებდა. ქალის ადვოკატები ბრალდებას ეწინააღმდეგებიან და ამბობენ, რომ მას ფიზიოლოგიური ხსნარი ამდენი (8000) ადამიანისთვის არ გაუკეთებია.