"დიდი უსამართლობაა ამ ბიჭის მკვლელობა... ჩემს სინანულს უკვე აზრი აღარ აქვს, დამაგვიანდა " - რას წერს ნანა გეგეჭკორი ნიკა კვარაცხელიაზე

ამერიკაში მოღვაწე ექიმი ნანა გეგეჭკორი სოციალურ ქსელში, გუშინ გარდაცვლილ ნიკო კვარაცხელიაზე წერს:

"ნიკო კვარაცხელია, მეორე დღეა ადგილს ვერ ვპოულობ. არ არსებობს იმაზე დიდი უსამართლობა, რაც ამ ბიჭის მკვლელობაა.

მე კი. ჩემი სინანულიც მაქვს ნიკოსთან… უკვე ვეღარ მოვასწრებ შეცდომის გამოსწორებას, მაგრამ ვისწავლი, რომ არასდროს გადავდო მიცემული პირობის შესრულება.

ცოტა ხნის წინ დამიკავშირდა და მთხოვა, მისი პლატფორმის მომხმარებელი გავმხდარიყავი და იქ მეწერა, ფბ-თან ერთად ან თუნდაც ფბ-ის ნაცვლად. შემომთავაზა დიდი აუდიტორიისთვის კოვიდთან დაკავშირებულ კითხვბზეც მეპასუხა იმავე პლატფორმიდან. ვერ ვინელებ, რომ დროის სიმცირის გამო, ინტერივიუზე უარი ვუთხარი. მოვუბოდიშე, სოციალურ ქსელში აქტიურობას ისედაც ვერ ვახერხებ, ჩემი გრაფიკის გამო და ორი პლატფორმიდან წერა გამირთულდება-მეთქი. ანგარიში შევქმენით, მაგრამ მასთან აქტიურობა ვეღარ მოვასწარი. "ფბ"-მა მთლიანად შთანთქა ჩემი თავისუფალი დრო. ვერ ვინელებ, რომ სათანადოდ ვერ დავაფასე მისი მონდომება, ქართული, სრულიად განსხვავებული და საინტერესო პლატფორმა განევითარებინა უმოკლეს დროში.

ჩემს სინანულს უკვე აზრი აღარ აქვს. დამაგვიანდა… ვეცდები, მისი თხოვნა დაგვიანებით მაინც შევასრულო.

ესეც ჩემი ანგარიში Feedc-ზე. უახლოეს დღეებში ავითვისებ Feedc-ის წესებს და აუცილებლად დავწერ მისთვის.

მაპატიე, მომავლის ბიჭო, რომ ასე დამაგვიანდა. ვერ ვისარგებლე შენთან ურთიერთობის შესაძლებლობით.

ალბათ, რამდენს ვისწავლიდი შენგან“. - წერს ნანა გეგეჭკორი