"თუ ჩამოდის ეს კაცი, ჩამოვიდეს, თუ ჩამოვა - დავიჭერთ, ვინც ამას ხელს შეუშლის, იმასაც დავიჭერთ" - პრემიერი სააკაშვილზე

ბავშვი არ დაბადებულა და სახელს არქმევდნენო - თუ ჩამოდის ეს კაცი, ჩამოვიდეს. თუ ჩამოვა - დავიჭერთ, ვინც ამას ხელს შეუშლის, იმასაც დავიჭერთ, მეტი რა გითხრათ, - ასე ეხმაურება პრემიერ-მინისტრი ირაკლი ღარიბაშვილი საქართველოში ჩამოსვლასთან დაკავშირებით ყოფილი პრეზიდენტის, მიხეილ სააკაშვილის განცხადებას.

როგორც ღარიბაშვილმა ჟურნალისტებთან საუბრისას განმარტა, განცხადებით, რომ სააკაშვილს „100 000 გაბრაზებული ადამიანი დახვდება“, არავითარი სამოქალაქო დაპირისპირება არ დაუანონსებია და მის დასაკავებლად მინიმუმ 10 გამოცდილი პოლიციელია საკმარისი.

„არავითარი სამოქალაქო დაპირისპირება მე არ დამიანონსებია, ეს დააანონსეს „ნაციონალური მოძრაობის“ წარმომადგენლებმა როდესაც თქვეს, რომ ხელს შეუშლიან სააკაშვილის დაკავებას. მე ვთქვი, რომ ოპოზიციას არ შეუძლია საკუთარი მხარდამჭერების მობილიზება. პიკის დროს, ივლისის თვეში, როდესაც საკმაოდ კულმინაციური მომენტი იყო, მათ 5000-ზე მეტი მხარდამჭერის მობილიზება ვერ შეძლეს. ამის საპასუხოდ მე ვთქვი, რომ „ქართულ ოცნებას“ მხარდამჭერების მობილიზება შეგვიძლია ერთ საათში და მინიმუმ 100 000-კაციანი მშვიდობიანი დემონსტრაცია ნებისმიერ დროს განვახორციელოთ. სააკაშვილს არ სჭირდება 100 000 კაცი, მას სჭირდება მინიმუმ 10 პოლიციელი, გამოცდილი კაცი, რომელიც მას დააკავებს. სახელმწიფოს აქვს სრული მზაობა იმისთვის, რომ დაიცვას წესრიგი, არ მოხდეს კანონის აღსრულებაში ხელის შეშლა და ამ ყველაფერს მშვიდობიანად ჩავატარებთ“, - აღნიშნა ირაკლი ღარიბაშვილმა.