გაერთიანებულ სამეფოში შესვლას "სინოვაკითა“ და "სინოფარმით“ აცრილი მგზავრები შეზღუდვების გარეშე შეძლებენ

გაერთიანებული სამეფო ჩინურ ვაქცინებს, "სინოვაკსა“ და "სინოფარმს“, ასევე ინდურ "კოვაქსინს“, იმ ვაქცინების ჩამონათვალში შეიტანს, რომელი ვაქცინებით აცრილ მგზავრებსაც გაერთიანებული სამეფოში შესვლა შეზღუდვების გარეშე შეუძლიათ.

Reuters-ის ინფორმაციით, ცვლილება ძალაში 22 ნოემბრიდან შევა და "სინოვაკით“, "სინოფარმითა“ და "კოვაქსინით“ სრულად ვაქცინირებული მოქალაქეებს აღარ მოუწევთ გაერთიანებულ სამეფოში გამგზავრებამდე და საზღვრის გადაკვეთიდან მე-8 დღეს კოვიდ ტესტის ჩატარება, ასევე კარანტინის გავლა.

ცნობისათვის, გაერთიანებულ სამეფოში აღნიშნული წესები ამჟამად "ფაიზერის“, "ასტრაზენეკას“, "მოდერნასა“ და "ჯენსენის“ ვაქცინებით ვაქცინირებულ მგზავრებზე მოქმედებს. ამასთან, გაერთიანებული სამეფოს მთავრობა მოგზაურობის წესებს 18 წლამდე ასაკის პირებისთვისაც ამარტივებს. ისინი, მიუხედავად იმისა, ვაქცინირებულები არიან თუ არა, ისეთივე პრივილეგიებით ისარგებლებენ, როგორც სრულად ვაქცინირებული მოქალაქეები და გაერთიანებულ სამეფოში ჩასვლის შემთხვევაში კარანტინის გავლა არ მოუწევთ.