"ომამდე ერთი დღით ადრე" - მიხეილ სააკაშვილის "ფეისბუქზე" გორის სამხედრო ჰოსპიტალში, 2008 წელს გადაღებული ფოტოები ვრცელდება
საქართველოს ექსპრეზიდენტის მიხეილ სააკაშვილის "ფეისბუქზე" გორის სამხედრო ჰოსპიტალში, 2008 წელს გადაღებული ფოტოები ვრცელდება. როგორც ირკვევა, ფოტოები აგვისტოს ომამდე ერთი დღით ადრეა გადაღებული და აღბეჭდილია ის მომენტი, როდესაც სააკაშვილმა დაჭრილი სამხედროები მოინახულა.
"ომამდე ერთი დღით ადრე. 2008 წლის 7 აგვისტოს პრეზიდენტმა სააკაშვილმა გორის სამხედრო ჰოსპიტალში რუსი “მშვიდობისმყოფელების” მიერ დაჭრილი ჯარისკაცები მოინახულა" - წერია ფოტოების კომენტირებისას.
ცნობისთვის, მიხეილ სააკაშვილს გორის სამხედრო ჰოსპიტალში დღეს გადაიყვანენ. ჰოსპიტლის მიმდებარე ტერიტორიაზე სამართალდამცავების მობილიზება მიმდინარეობს.
ჭავჭავაძის ქუჩაზე, სადაც სამხედრო ჰოსპიტალი მდებარეობს, საპატრულო პოლიციამ კერძო პირების ავტომობილები გაიყვანა და სამედიცინო დაწესებულების სრულ პერიმეტრზე სამართალდამცველები განლაგდნენ. ასევე ჰოსპიტლის ტერიტორიაზე არაერთი სპეცმანქანა შევიდა.
რაც შეეხება პალატას, სადაც გლდანის მე-18 სამკურნალო დაწესებულებიდან მიხეილ სააკაშვილს გადაიყვანენ, პალატის ფანჯრებზე დამონტაჟებულია ლითონის გისოსები.