"დაკავებული არასრულწლოვანი დუმილის უფლებას იყენებს" - რას ამბობს 15 წლის ბიჭის მკვლელობის საქმეზე დაკავებულის ადვოკატი

თბილისში, სანზონაში არასრულწლოვანის დ.კ-ს მიმართ დამამძიმებელ გარემოებაში ჩადენილი განზრახ მკვლელობის ბრალდებით დაკავებული ლ.ი.-ს ადვოკატის ინფორმაციით, არასრულწლოვანი დანაშაულს არ აღიარებს და დუმილის უფლებას იყენებს.

როგორც საზოგადოებრივმა ადვოკატმა "ინტერპრესნიუსთან“ საუბრისას აღნიშნა, ლ.ი.-სთვის ბრალი ჯერ ოფიციალურად არ წარუდგენიათ, შესაბამისად საქმეში არსებული მტკიცებულებები მისთვის უცნობია.

"ჯერჯერობით ბრალი არ წარუდგენიათ და საქმის მასალები არ გადმომცემია, შესაბამისად, მტკიცებულებებთან დაკავშირებით ვერაფერს გეტყვით. თავად არასრულწლოვანი არ აღიარებს დანაშაულს და დუმილის უფლებას იყენებს“, - აღნიშნა ადვოკატმა გოგა ბოგვერაძე.

ცნობისთვის, თბილისში არასრულწლოვნის მკვლელობის საქმეზე პოლიციამ ორი პირი დააკავა. შსს-ს ინფორმაციით, 2005 წელს დაბადებული ლ.ი. განზრახ მკვლელობის ბრალდებით არის დაკავებული, ხოლო 2004 წელს დაბადებული პ.ვ. დანაშაულის შეუტყობინებლობის ფაქტზე.

გამოძიებით დადგინდა, რომ ლ.ი.-მ, მიმდინარე წლის 4 დეკემბერს, ურთიერთშელაპარაკების ნიადაგზე, 2006 წელს დაბადებულ დ.კ.-ს ცივი იარაღით ჭრილობა მიაყენა და შემთხვევის ადგილიდან მიიმალა. მკვლელობის ბრალდებით დაკავებულ ლ.ი.-სთან ერთად შემთხვევის ადგილიდან მიიმალა მეორე ბრალდებული პ.ვ. რომელიც შეესწრო განსაკუთრებით მძიმე დანაშაულს და არ შეატყობინა სამართალდამცავ უწყებებს.

გამოძიება სისხლის სამართლის კოდექსის 109-ე მუხლის მე-2 ნაწილის “ბ” ქვეპუნქტით და 376- ე მუხლის მე- 3 ნაწილით მიმდინარეობს, რაც წინასწარი შეცნობით, არასრულწლოვნის მიმართ დამამძიმებელ გარემოებაში ჩადენილ განზრახ მკვლელობას და განსაკუთრებით მძიმე დანაშაულის შეუტყობინებლობას გულისხმობს.