ბრიტნის ტელეფონს ფარულად უსმენდნენ და საძინებელშიც აუდიოჩამწერი დაუმონტაჟეს - ახალი სკანდალური ბრალდებები ბრიტინი სპირსის მამის წინააღმდეგ
ახალი ინფორმაციით, ბრიტნი სპირსის მამამ 2008 წელს, მანამ, ვიდრე ბრიტნიზე მეურვეობას მოიპოვებდა, 40 000 დოლარის ოდენობის სესხი აიღო. ჯეიმი სპირსმა ფული ბიზნესმენეჯერის - ლუ ტეილორის ფირმისგან "Tri Star Sports & Entertainment Group"-ისგან ისესხა დაახლოებით იმ პერიოდში, როცა მისი პოპ-ვარსკვლავი ქალიშვილი სამკურნალოდ ფსიქიატრიულ საავადმყოფოში გადაიყვანეს, იტყობინება "The New York Times".
სესხის აღებიდან რამდენიმე დღეში, ბრიტნის ქონების განკარგვის შესახებ ჯეიმიმ კალიფორნიის სასამართლოს მოთხოვნა წარუდგინა, ამბობდა, რომ მომღერალს ფსიქიკა ჰქონდა შერყეული და ქონების მართვას მარტო ვერ გაუმკლავდებოდა. ჯეიმი ასევე მატერიალურ კომპენსაციას ითხოვდა იმისთვის, რომ ბრიტნისთვის დახმარება გაეწია. მოსამართლემ დაუკმაყოფილა მოთხოვნა და ჯეიმი სპირსმა, მომდევნო წელსვე, ბრიტნის ქონების მენეჯერად კომპანია "Tri Star Sports & Entertainment Group" დაუქირავა. ის, თუ რისთვის დასჭირდა ჯეიმი სპირსს 40 000 დოლარის ოდენობის სესხი, ჯერ კიდევ უცნობია.
ინფორმაციის მიხედვვით, ჯეიმი სპირსმა მომღერალზე მეურვეობის 13 წლის განმავლობაში, 6 მილიონი დოლარი მიიღო. მეთიუ როზენგარტი, რომელიც ბრიტნის ადვოკატია, ჯეიმისა და "Tri Star"-ს პასუხს სთხოვს, თუ რატომაა ბრიტნის ქონების ღირებულება დღესდღეობით მხოლოდ 60 მილიონი, როცა ის წლების განმავლობაში ტელევიზიაში გამოჩენისთვის, გამოშვებული ალბომებისთვის და კოცნერტების გამართვისთვის დიდ თანხებს იღებდა.
როზენგარტმა "Tri Star"-ი და ჯეიმი სპირსი იმაშიც დაადანაშაულა, რომ ბრიტნის ტელეფონს ფარულად უსმენდნენ და საძინებელშიც აუდიოჩამწერი მოწყობილობა დაუმონტაჟეს. ამ ბრალდებას ორივე უარყოფს: მომღერლის მამაც და კომპანიაც.
მოამზადა ანა სიბოშვილმა