შვეიცარიის ქალაქ ლუგანოში უკრაინის აღდგენის საკითხთან დაკავშირებით ორდღიანი კონფერენცია გაიმართა, სადაც მსოფლიოს 40-მა ქვეყანამ ხელი მოაწერა "ლუგანოს დეკლარაციას", რომელიც უკრაინაში რუსი ოკუპანტების შეჭრის შედეგად დანგრეული ქალაქების აღდგენას ისახავს მიზნად.
დეკლარაციის თანახმად, მსოფლიოს ცივილური სამყარო გაერთიანდა და ომისგან განადგურებული ქალაქების აღდგენის ვალდებულება იკისრა. "ლუგანოს დეკლარაციაზე" ხელმომწერებს შორის არიან საფრანგეთი, იაპონია, დიდი ბრიტანეთი, აშშ, გერმანია და სხვები.
უკრაინის აღდგენას წინასწარი გათვლებით, ასობით მილიარდი დოლარი დასჭირდება. დადგენილია, რომ დაზიანებულია მინიმუმ 45 მილიონი კვადრატული მეტრის საცხოვრებელი სახლი, 256 საწარმო, 656 სამედიცინო დაწესებულება, 1177 სასწავლო დაწესებულება.
"დეკლარაციის თანახმად", ევროპის საინვესტიციო ბანკი უკრაინის აღმშენებლობისთვის შექმნის ფონდს, სადაც ევროკავშირისა და ევროკავშირის არაწევრი ქვეყნების ინვესტიციები გაერთიანდება და უკრაინის განვითარებას მოხმარდება.
შმიგალის თქმით, რუსეთის შეჭრის შედეგად, უკრაინის ინფრასტრუქტურას 100 მილიარდ დოლარზე მეტი (96 მილიარდი ევრო) პირდაპირი ზიანი მიადგა. უკრაინის პრემიერი მიიჩნევს, რომ აღდგენის გეგმის დაფინანსების ძირითადი წყარო, რუსი ოლიგარქებისგან ჩამორთმეული აქტივები უნდა იყოს.
დეკლარაციის არსის შესახებ "ნიუ იორკ თაიმსს" შვეიცარიის პრეზიდენტი, იგნაციო კასისი ესაუბრა და მან თქვა, რომ ამ დეკლარაციის მიღება, რომელიც მიზნად ისახავს ასობით მილიარდი დოლარის მოზიდვას, არის "უკრაინის აღდგენის გზაზე გრძელი მოგზაურობის პირველი ნაბიჯი."
ამასთან, აღსანიშნავია, ისიც, რომ აღდგენის შესახებ დეკლარაციის შემუშავების პარალელურად, მოკავშირე ქვეყნები უკრაინის ხელისუფლებას მოუწოდებენ, გაატარონ რეფორმები - "გააძლიერონ კანონის უზენაესობა და აღმოფხვრან კორუფცია."
"სახლების, სკოლების, საავადმყოფოების და სხვა კრიტიკული ინფრასტრუქტურისთვის მიყენებულ ზიანისა და განადგურების აღდგენას წლები დასჭირდება. გაერო მზადაა იმუშაოს უკრაინის აღდგენისა და განვითარების გეგმაზე“ - აცხადებს გუტერეში.