ავტორი:

"აქვე პრესტიჟულ ვაკეში მთა ჩამოდის... ჩვენი კორპუსის უკან დიდი რაოდენობით მიწა ჩამოწვა" - რას წერს გივი ჭანუყვაძე?

"აქვე პრესტიჟულ ვაკეში მთა ჩამოდის... ჩვენი კორპუსის უკან დიდი რაოდენობით მიწა ჩამოწვა" - რას წერს გივი ჭანუყვაძე?

ილიას უნივერსიტეტის ლექტორი, ასოცირებული პროფესორი გივი ჭანუყვაძე სოციალურ ქსელში ინფორმაციას ავრცელებს, რომელიც მის საცხოვრებელ კორპუსთან განვითარებულ მეწყრულ პროცესებს უკავშირდება.

მისი ინფორმაციით, არსებობს ძალიან მაღალი რისკი, რომ მსგავსი პროცესები კიდევ განმეორდეს და დედაქალაქის მთავრობას მიმართავს. როგორც ირკვევა ფოტოები, რომელსაც ლექტორი ავრცელებს, ვაკეში, მარუხის გმირების ქუჩაზეა გადაღებული.

"დიდი ხანია ვფიქრობდი საჯაროდ დამეწერა თუ არა ეს ყველაფერი! მაგრამ მეშვიდე თვეა რაც ამ წარმოუდგენელ უპასუხისმგებლობას ვუყურებთ მე, ჩემი და კიდევ არა ერთი ოჯახი. ზუსტად შვიდი თვის წინ, ჩვენი საცხოვებელი კორპუსის უკან განვითარდა მეწყრული პროცესები და ჩამოწვა ძალიან დიდი რაოდენობით მიწა. შესაბამისი სტრუქტურების დასკვნის მიხედვით, არსებობს ძალიან მაღალი რისკი მსგავსი პროცესების ხელახლა განვითარების, რაც უზარმაზარ საფრთხეს უქმნის ამ კორპუსში მცხოვრებ უამრავ ადამიანს, მათ შორის მცირეწლოვან ბავშვებს.

სამხარაულის დასკვნის მიხედვით, ეს პროცესები გამოიწვია ქუჩაზე სხავადასხვა დროს და ამჟამად მიმდინარე მშენებლობამ.შვიდი თვეა, ეს რამდენიმე ათეული ადამიანი, ვუყურებთ, როგორ სხვადასხვა მუნიციპალური სამსახურები, ერთმანეთისკენ თითების გაშვერით არიან დაკავებულები, თუმცა საბოლოოდ ვერ დგინდება ვერც ვისი პასუხისმგებლობაა ამ პრობლემის გადაჭრა და ცხადია რაიმე ვადებზეც არ არის საუბარი. თვითმმართველობა ხელს იშვერს მშენებლისკენ, მშენებელი მერიისკენ, მერია მხრებს იჩეჩავს და ამ ყველაფერს ბოლო არ უჩანს.

ცხადია, ვცდილობთ კანონის და პროცესის ფარგლებში ვიმოქმედოთ, იმასაც ვიაზრებთ, რომ თბილისში არაერთი ავარიული სახლი და კორპუსია და არ ვითხოვთ, რაიმე განსაკუთრებულ მოპყრობას და პრივილეგიებს, უბრალოდ როგორც კანონმორჩილი, გადასახადის გადამხდელი, ამ ქალაქში მცხოვრები ადამიანები, ვითხოვთ თუნდაც რაიმე სახის პასუხს ან ვადებს ან თუნდაც უარს, რომ მერე ან საკუთარი ძალებით ან სასამართლოს გზით ვეცადოთ გამაგრებითი სამუშაოების ჩატარებას, რათა გადავარჩინოთ ჩვენი საკუთარი საცხოვრებელი ნგრევას.ამ დროს გვესმის და ვხედავთ, თუ რამდენი რამე კეთდება ქალაქისთვის. პარკები; ავტობუსის ზოლები, ახალი სკვერები და ძველის რეაბილიტაციები..

აგერ მრგვალ ბაღს 2 წელიწადში მეორედ აკეთებენ, იქით მელიქიშვილს ამსტერდამად აქცევენ, მარა აქვე პრესტიჟულ ვაკეში, ან მთა ჩამოდის ან დღეს მაგალითად საყვარელი გველი მოსრიალდა. დამამშვიდეს არ არის შხამიანიო. რავიცი, ბერნზე ნაკლებ ქალაქში არ უნდა ვცხოვრობდეთ და ლორა პიანაზე ნაკლებიც არ უნდა გვეცვას წესით, მაგრამ ფაქტია, ყოველი დღე ამ ქალაქში და ქვეყანაში უკვე მხოლოდ თვითგადარჩენისთვის ვიბრძვით და მხოლოდ საკუთარი თავის და ძალების იმედად ვართ..." - წერს ჭანუყვაძე.