ავტორი:

"ტექნიკური მთავრობის“ ჩავარდნილი პროექტის შემდეგ, ოპოზიციის რადიკალური ნაწილი “ტექნიკური პარლამენტის“ პროექტზე გადაერთო" - შალვა პაპუაშვილი

"ტექნიკური მთავრობის“ ჩავარდნილი პროექტის შემდეგ, ოპოზიციის რადიკალური ნაწილი “ტექნიკური პარლამენტის“ პროექტზე გადაერთო" - შალვა პაპუაშვილი

ნათელია, რომ “ტექნიკური მთავრობის” ჩავარდნილი პროექტის შემდეგ, ოპოზიციის რადიკალური ნაწილი ახლა “ტექნიკური პარლამენტის” პროექტზე გადაერთო, რაც არის ხალხის მიერ არჩეული პარლამენტის დელეგიტიმაციის მცდელობა და კონსტიტუციურ წესწყობილებასთან სახიფათო თამაში“, - ამის შესახებ პარლამენტის თავმჯდომარე შალვა პაპუაშვილმა საკანონმდებლო ორგანოში გამართულ პრესკონფერენციაზე განაცხადა.

პაპუაშვილი "ნაციონალური მოძრაობის“, "სტრატეგია აღმაშენებლისა“ და "ლელოს“ მიერ ცალკე სამუშაო პროცესის დაწყების გადაწყვეტილებას გამოეხმაურა და აღნიშნა, რომ მსგავსი პოლიტიკური თვითშემოქმედება აღვივებს პოლიტიკურ პოლარიზაციას და პირდაპირ ეწინააღმდეგება ევროპული საბჭოს მიერ დასახელებული 12 პუნქტიდან პირველივეს - დეპოლარიზაციას.

"როგორც საზოგადოებას მოეხსენება, პარლამენტში უკვე სამი კვირაა აქტიურად მიმდინარეობს მუშაობა ევროპული საბჭოს მიერ განსაზღვრულ 12 პრიორიტეტზე. საკითხებზე სამუშაოდ პარლამენტის ძირითად კომიტეტებად განისაზღვრნენ იურიდიულ საკითხთა, ადამიანის უფლებათა, საპროცედურო და თავდაცვისა და უსაფრთხოების კომიტეტები, ასევე გენდერული თანასწორობის საბჭო, რომლებიც უკვე შეუდგნენ მუშაობას.

ამასთან, პროცესის ინკლუზიურობის უზრუნველსაყოფად კომიტეტებმა, შესაბამისი მიმართულებებით, შექმნეს სამუშაო ჯგუფები. საზოგადოებას შევახსენებ, რომ სამუშაო ჯგუფი გახლავთ პარლამენტის რეგლამენტით გათვალსიწინებული საპარლამენტო საქმიანობის ინსტრუმენტი, რომელიც გამოიყენება სამუშაო პროცესში სამოქალაქო საზოგადოების და ექსპერტების ჩართვისთვის.

დღეის მდგომარეობით, ჩატარდა კომიტეტების და სამუშაო ჯგუფების 17 სხდომა. საკითხების ნაწილზე უკვე არსებობს პირველადი შედეგები. ასე, მაგალითად:

• რეკომენდაციების მე-2 პუნქტზე - საპარლამენტო ზედამხედველობა - სრულდება ზედამხედველობის არსებული მექანიზმების ანალიზი, რომლის საფუძველზეც სამუშაო ჯგუფი განიხილავს მათი გაუმჯობესების შესაძლებლობებს და 21 სექტემბრამდე დააინიცირებს ცვლილებების პროექტს;

• რეკომენდაციების მე-3 პუნქტზე - სასამართლო რეფორმა - სამუშაო ჯგუფში საპარლამენტო ჯგუფების მიერ უკვე წარმოდგენილ იქნა შეფასების დოკუმენტები, რომლებიც, სამოქალაქო სექტორთან განხილვის საფუძველზე, უნდა გახდეს სასამართლო რეფორმის სტრატეგიის შემუშავების და საკანონმდებლო ცვლილებების ინიცირების საფუძველი;

• რეკომენდაციების მე-9 პუნქტზე - გენდერული თანასწორობა - სამუშაო ჯგუფში სახელემწიფო უწყებებისა და სამოქალაქო სექტორის მონაწილეობით შეთანხმდა იმ საკითხთა წრე, რომელზეც გაიმართება დეტალური მსჯელობა და 5 ოქტომბრამდე დაინიცირდება შესაბამისი კანონპროექტი.

• რეკომენდაციების მე-11 პუნქტზე - მართლმსაჯულების პროცესში ადამიანის უფლებათა ევროპული სასამართლოს პრაქტიკის პროაქტიული გამოყენება - უკვე შეიქმნა კანონპროექტების პაკეტის პირველადი ვერსია, რომელიც სამუშაო ჯგუფში საბოლოო განხილვის შემდეგ, გრაფიკის შესაბამისად, 1 სექტემბრამდე დაინიცირდება.

კომიტეტების და სამუშაო ჯგუფების საქმიანობაში აქტიურად მონაწილეობს 8 საპარლამენტო ჯგუფიდან 5 - “ქართული ოცნება”, “გირჩი”, “ევროპელი სოციალისტები”, “მოქალაქეები” და “საქართველოსთვის”. საპარლამენტო ფორმატში მუშაობაზე უარს აცხადებს სამი საპარლამენტო ჯგუფი - “ნაციონალური მოძრაობა”, “ლელო” და “სტრატეგია აღმაშენებელი”.

როგორც საზოგადოებისთვის ცნობილია, რამდენიმე დღის წინ თბილისში ვიზიტით იმყოფებოდა ევროპარლამენტის საგარეო კომიტეტის დელეგაცია, რომელმაც, ერთის მხრივ, მოიწონა საქართველოს პარლამენტის სამუშაო გეგმა 12 პუნქტთან დაკავშირებით, და, მეორეს მხრივ, დაჟინებით მოუწოდა “ნაციონალურ მოძრაობას”, “ლელოს” და “სტრატეგია აღმაშენებელს” ჩართულიყვნენ პარლამენტის მიერ შექმნილი სამუშაო ჯგუფების საქმიანობაში.

ამის საპირისპიროდ, ბოლო დღეები, ვხედავთ, რომ “ნაციონალურმა მოძრაობამ” და მასთან დაკავშირებულმა “ლელომ” და “სტრატეგია აღმაშენებელმა”, ნაცვლად საკითხებზე საპარლამენტო ფორმატში ერთობლივი მუშაობისა, შექმნეს საკუთარი პარტიული ფორმატი. უფრო მეტიც, ისინი სექტემბრიდან აანონსებენ პოლიტიკურ რადიკალიზაციას და ქუჩის აქციებს.

ნათელია, რომ “ტექნიკური მთავრობის” ჩავარდნილი პროექტის შემდეგ, ოპოზიციის ეს რადიკალური ნაწილი ახლა “ტექნიკური პარლამენტის” პროექტზე გადაერთო, რაც არის ხალხის მიერ არჩეული პარლამენტის დელეგიტიმაციის მცდელობა და კონსტიტუციურ წესწყობილებასთან სახიფათო თამაში. ამასთან, მსგავსი პოლიტიკური თვითშემოქმედება აღვივებს პოლიტიკურ პოლარიზაციას და პირდაპირ ეწინააღმდეგება ევროპული საბჭოს მიერ დასახელებული 12 პუნქტიდან პირველივეს - დეპოლარიზაციას.

მოხარული ვარ, რომ მოვისმინე რამდენიმე არასამთავრობო ორგანიზაციის, პარტიის და საერთაშორისო აქტორის შეფასებები ამ სამპარტიული კოალიციის მიერ წამოწყებული პროცესის დესტრუქციულობასთან დაკავშირებით.

მნიშვნელოვანია, რომ პოლარიზაციის გაღრმავებისკენ და პარლამენტის დელეგიტიმაციისკენ გადადგმული ეს ნაბიჯი დასაწყისშივე მკაფიოდ შეფასდეს, როგორც სამოქალაქო სექტორის, ისე საერთაშორისო აქტორების მხრიდან, რათა, ხალხის მოლოდინის საპირისპიროდ, არ მოხდეს ევროკავშირში ინტეგრაციის პროცესის დისკრედიტაცია და არ წახალისდეს რადიკალური დღის წესრიგი. მე, როგორც პარლამენტის თავმჯდომარე, დავაკვირდები ამ შეფასებების დროულობას და სიცხადეს.

საქართველოს პარლამენტი, მრავალპარტიულ ფორმატში და სამოქალაქო საზოგადოების ჩართულობით, განუხრელად გააგრძელებს დადგენილი გრაფიკის შესაბამისად მუშაობას და უზრუნველყოფს წინასწარ განსაზღვრულ ვადებში კანონპროექტების ინიცირებას“, - განაცხადა შალვა პაპუაშვილმა.

მისივე თქმით, "ნაციონალური მოძრაობის“ სამეულის მიზანია ხელისუფლებაში მოსვლა. თუ საქართველო მიიღებს კანდიდატის სტატუსს, ეს პირდაპირ ეწინააღმდეგება "ნაციონალური მოძრაობის“ სამეულის ინტერესს. როგორც შალვა პაპუაშვილი განმარტავს, მიმდინარეობს ისეთი სურათის შექმნა, თითქოს, საქართველოში რაღაც საკითხებზე უთანხმოებაა, რაც კანდიდატობის პერსპექტივას აზიანებს.

"პრობლემა იმაშია, რომ "ნაციონალური მოძრაობის“ სამეულს - "ნაციონალურ მოძრაობას“, "ლელოს“ და "სტრატეგია აღმაშენებელს“ და პარლამენტში დანარჩენ პარტიებს სხვადასხვა მიზანი გვაქვს. კანდიდატის სტატუსის მიღებაა იმ 5 საპარლამენტო ჯგუფის მიზანი, რომელიც საპარლამენტო პროცესშია ჩართული, ხოლო "ნაციონალური მოძრაობის“ სამეულის მიზანია ხელისუფლებაში მოსვლა.

ეს არის მიზნებში ფუნდამენტური სხვაობა. რა თქმა უნდა, თუ საქართველო მიიღებს კანდიდატის სტატუსს, ეს პირდაპირ ეწინააღმდეგება "ნაციონალური მოძრაობის“ სამეულის ინტერესს. აქედან გამომდინარე, ვხედავთ, რომ ყველანაირად ხდება პროცესის ტორპედირება, შეიქმნას სურათი, რომ საქართველოში თითქოს რაღაც საკითხებზე უთანხმოებაა და ამით საბოლოოდ დააზიანონ კანდიდატობის პერსპექტივა“,- აღნიშნავს პაპუაშვილი.