ავტორი:

"იდიოტებად მიგვიჩნევენ...არის საკითხები, რაც აფხაზეთში არასდროს მოხდება" - რუსეთის დუმის დეპუტატის განცხადება ოკუპირებულ აფხაზეთში მიწების გაყიდვაზე და მწვავე კრიტიკა ადგილობრივებისგან

"იდიოტებად მიგვიჩნევენ...არის საკითხები, რაც აფხაზეთში არასდროს მოხდება" - რუსეთის დუმის დეპუტატის განცხადება ოკუპირებულ აფხაზეთში მიწების გაყიდვაზე და მწვავე კრიტიკა ადგილობრივებისგან

რუსი დეპუტატის, კონსტანტინ ზატულინის განცხადებას იმის შესახებ, რომ აფხაზები უსაფუძვლოდ ნერვიულობენ, თითქოს რუსებისთვის მიწისა და უძრავი ქონების მიყიდვით რაიმე საფრთხე ემუქრებათ, აფხაზეთში მწვავე კრიტიკა მოჰყვა.

როგორც დსთ-ის საკითხებში რუსეთის სახელმწიფო დუმის კომიტეტის თავმჯდომარის მოადგილემ რუსულ გამოცემა gazeta.ru-სთან ინტერვიუში აღნიშნა, აფხაზების შიში, რომ რუსებისთვის მიწების მიყიდვით ვეღარ იქნებიან აფხაზეთის ბატონ-პატრონები, სისულელეა.

ზატულინის თქმით, “უცხო ქვეყნის მოქალაქეებისთვის მიწისა და უძრავი ქონების მიყიდვის საკითხი აფხაზურ საზოგადოებაში “დარჩენილი შიშების” გამო ფერხდება. ამის უკან კი, აფხაზური ოპოზიცია დგას, რომელიც ცდილობს, ადგილობრივი მოსახლეობა დაარწმუნოს, თუ ამას დაუშვებენ დღეს, ხვალ აფხაზები თავიანთი ქვეყნის ბატონ-პატრონი აღარ იქნებიან. არადა, აფხაზეთიდან მიწას ვერავინ გაიტანს, მსგავსი შიშები კი, აფხაზეთის განვითარებას აფერხებს", - ამბობს ზატულინი ინტერვიუში.

  • გამოცემის ცნობით, ზატულინმა რუსეთ-ბელარუსის სამოკავშირეო სახელმწიფოს გაფართოების საკითხზე საუბრისას აღნიშნა, რომ სამოკავშირეო სახელმწიფოს შემადგენლობაში აფხაზეთის შესაძლო შესვლა გაკრვეული საკითხების მოგვარებას დააჩქარებდა. მიწისა და უძრავი ქონების უცხოეთის მოქალაქეებისთვის მიყიდვის გარდა, ასევე ხელს შეუწყობდა, რუსეთ-აფხაზეთის საზღვრის კვეთის რეჟიმის გამარტივებას, ისე, როგორც ეს ხდება რუსეთ-ბელარუსის შემთხვევაში.

ekhokavkaza.com-ის ცნობით, აფხაზეთში თვლიან, რომ ზატულინი, რომელსაც არაერთხელ აღუნიშნავს, რომ აფხაზი ხალხის მეგობარია, "რაღაც საკითხებს არაჯანსაღად აფასებს."

პოლიტიკოსი ადგურ ლაგვილავა, რომელიც ბოლო ხანებია ოკუპირებული აფხაზეთის ე.წ. პრეზიდენტის, ასლან ბჟანიას მთავარი კრიტიკოსია, სოციალურ ქსელში წერს, რომ რუსეთში მოქმედებს კანონი, რომლის ფარგლებშიც, უცხო ქვეყნის მოქალაქეებს იქ მიწის შეძენის უფლება არ აქვთ, თუმცა, ზატულინს ეს არასდროს გაუპროტესტებია.

"რუსეთში მოქმედი კანონის თანახმად, იქ უცხოელს, ყირიმი იქნება, კალინინგრადი თუ სხვა ადგილი, მიწის ფლობის უფლება არ აქვს, თუმცა მისივე თქმით, აფხაზეთის მიწას არავინ არსად არ წაიღებს, მაგრამ ბირთვულ სახელმწიფოსა და გაეროს მუდმივ წევრ ქვეყანას წაართმევენ?!. ეგ როგორ? რუსეთს შეუძლია თავისი ინტერესები დაიცვას და ჩვენ არა?

კიდევ ერთხელ იდიოტებად მიგვიჩნევენ და ორმაგად საწყენია, როდესაც ამას ვისმენთ ადამიანისგან, რომელიც თავს აფხაზეთის მეგობარს უწოდებს", - წერს ლაგვილავა.

აფხაზეთის ე.წ. გმირის, ასლან კობახიას თქმით, - "არის საკითხები, რომელიც აფხაზეთში არასდროს მოხდება."

"აფხაზეთში მას ჩვენს დიდ მეგობრად იცნობენ, კონკრეტულად კი, ვლადისლავ არძინბას მეგობარია, მისი ღვაწლის დაკარგვა უსინდისობა იქნებოდა, თუმცა, შევთანხმდეთ, რომ აფხაზეთის მიწების გაყიდვაზე მოლაპარაკე ადამიანი ჩვენთან პატივსაცემი ვერ იქნება.

მე თქვენ ძალიან გაფასებთ და პატივს გცემთ, მაგრამ უნდა გახსოვდეთ, რომ არის რაღაცები, რაც აფხაზეთში არასდროს მოხდება. ვლადისლავ არძინბა არც კი იფიქრებდა აფაზეთის მიწის გაყიდვაზე. ის კი არა, აფხაზეთის მიწას ადგილობრივებიც კი იჯარით იღებენ, დანარჩენი კი, ყველაფერი მანიპულაციაა, რომელიც კარგს არაფერს მოგვიტანს", - წერს კობახია.

"უკმაყოფილება კი არა, ბჟანიამ, თავისი თამამი გადაწყვეტილებებით, გვირაბის ბოლოს სინათლე დაანახა აფხაზეთს. რას აპროტესტებთ? ბელარუსის-რუსეთის სამოკავშირეო გუნდში პატარა და ღარიბი აფხაზეთის მოხვედრა აფხაზეთის ისტორიული მოსახვევია, რაც მას განვითარებას მოუტანს, ისევე, როგორც რუსეთის მოქალაქეებისთვის მიწების გადაცემა. ამის შესახებ მომავალი თაობები ილაპარაკებენ. მთავარია, ვიღაცები არ გამოხტნენ - "წინაპრების მიწას არ დავთმობთ" გამოსვლებით", - წერს ინტერნეტმომხმარებელი რინა კრემნევა.

მას მაშინვე უპასუხეს ადგილობრივებმა და გონიერებისკენ მოუწოდეს.

"შენნაირი სიბრძნის მფრქვეველები თესავენ აგრესიას ორ ხალხს შორის. დარწმუნებული ვარ, არც კი იცი საიდან გაქვს ფესვები. დედამიწაზე ყველაზე დიდი სახელმწიფოსთვის მიწის უცხოელებისთვის მიყიდვა კანონით დაუშვებელია და წერტილის ხელა აფხაზეთისთვის თურმე გამართლება ყოფილა", - წერს ლერა ხუნძუა.

"ზატულინის ჩანაფიქრი მაინც განხორციელდება, რადგან კრემლში მუშაობენ ამაზე და ისიც ღიად საუბრობს. ჩვენ კი ვიცით, რომ ბელარუსი ასე მალე არ გვაღიარებს, რომ რუსეთი რაღაც ფორმატს მოიფიქრებს, რომ საქმე გაიადვილოს. უკრაინაში დამხმარე ძალა სჭირდება, მერე უფრო თამამად უკრავენ ჩვენს კაცებს თავს ომში. მიწების მიყიდვის, ან სულაც, რაღაც "ხელშეკრულების" ფარგლებში გამოყენების უფლებაც ექნებათ. უკრაინის ომამდე არასდროს უხსენებიათ ეს კავშირი. არც ასეთი მნიშველოვანი ვიყავით მათთვის. ყველაფრის ნუ გჯერათ, რასაც ტელევიზორში ამბობენ. იქ საამური ცხოვრებაა, თუმცა, რეალობა სხვაგვარია", - წერს კიდევ ერთი ადგილობრივი.