რას ამბობს კელი დეგნანი ივანიშვილის გარემოცვისთვის სანქციების დაწესების საკითხზე?

ეს შეკითხვა უკრაინის მთავრობას და პრეზიდენტ ზელენსკის უნდა მიემართოს, - ასე უპასუხა საქართველოში აშშ-ის ელჩმა კელი დეგნანმა ჟურნალისტების კითხვას უკრაინის მთავრობის გადაწყვეტილებაზე, დაუწესოს სანქციები ბიძინა ივანიშვილის ოჯახის წევრებს, მაგრამ არა თავად ივანიშვილს.

ამასთან, ელჩს დაუსვეს შეკითხვა, აპირებს თუ არა აშშ შეუერთდეს სანქციებს, რადგან უკრაინის მთავრობა ევროკავშირსა და შეერთებულ შტატებს მოუწოდებს, მათ სანქციებს შეუერთდნენ და დაუწესონ სანქციები მათ მიერ გამოქვეყნებულ სიაში მოხვედრილ პირებს.

"რაც შეეხება აშშ-ს, როდესაც ჩვენ რაიმე სანქციებს ვაწესებთ, ეს ცხადდება საჯაროდ და ქვეყნდება გარკვეულ პლატფორმაზე, ვებსაიტზე და არ ხდება ამის წინასწარ განხილვა", - განაცხადა დეგნანმა.

• შეგახსენებთ, უკრაინის მიერ დასანქცირებულ პირთა სიაში ბიძინა ივანიშვილის გარემოცვის 4 წევრი მოხვდა.

კერძოდ, უკრაინამ სანქციები დაუწესა ბიძინა ივანიშვილის ძმას, ალექსანდრე ივანიშვილს და მის მეუღლეს, ქეთევან ხარაიძეს, დეიდაშვილს უჩა მამაცაშვილს და მის შვილს - ტიტე მამაცაშვილს. შესაბამისი განკარგულება უკრაინის პრეზიდენტის ოფიციალურ საიტზე გამოქვეყნდა. სანქცირებულთა სიაში ასევე მოხვდა რამდენიმე ქართველი ბიზნესმენი, კერძოდ: დავით იაკობაშვილი, ალექსანდრე და გიორგი ჯაფარიძეები.

ნახეთ:

• "აქტივების ბლოკირება, შეზღუდვა სავაჭრო ოპერაციებსა და უკრაინიდან კაპიტალის გატანაზე..." - რა სანქციები დაუწესა უკრაინამ ბიძინა ივანიშვილის ძმას?
• ვინ არიან რუსეთში მცხოვრები ბიზნესმენები ალექსანდრე და გიორგი ჯაფარიძეები, რომლებსაც ზელენსკიმ სანქციები დაუწესა?
• "უნდათ, საქართველო ჩართული იყოს ომში" - ირაკლი ქადაგიშვილი უკრაინის მიერ ივანიშვილის გარემოცვის დასანქცირებაზე
• "ამის შემდეგ რა უნდა იყოს მოსალოდნელი? ალბათ, დაადგებიან იმ გზას, როცა აფხაზეთის აღიარებას დაიწყებენ" - სარჯველაძე ივანიშვილის გარემოცვისთვის სანქციების დაწესებაზე