ავტორი:

"ეს  ჩვენი სახელმწიფოს და ქართველი ხალხის შეურაცხყოფაა" - ირაკლი კობახიძე სენატორ ჯინ შაჰინის განცხადებაზე

"ეს  ჩვენი სახელმწიფოს და ქართველი ხალხის შეურაცხყოფაა" - ირაკლი კობახიძე სენატორ ჯინ შაჰინის განცხადებაზე

"შეურაცხმყოფელია, პირველ რიგში, ეს განცხადება. სენატორი ჯინ შაჰინი იყო “ნაცმოძრაობის” მეგობარი 2012 წლამდეც. ანუ მაშინ, როდესაც საქართველოში იყო დამყარებული სისხლიანი რეჟიმი თავის წამებით, გაუპატიურებით, ბიზნესის რეკეტით და ტერიტორიების ჩაბარებით, მაშინაც მეგობრობდა ეს ადამიანი “ნაციონალურ მოძრაობასთან“ და აგრძელებს ამ მეგობრობას", - ამის შესახებ "ქართული ოცნების" თავმჯდომარე ირაკლი კობახიძემ საზოგადოებრივი მაუწყებლის ეთერში გადაცემა "აქტუალურ შაბათში’’ განაცხადა.

  • როგორც ირაკლი კობახიძემ აღნიშნა, ჯინ შაჰინთან არაერთხელ ჰქონია შეხვედრა. ასევე, "იმ ოდიოზურ ევროპარლამენტარებთან, რომლებიც საქართველოს ხელისუფლებას აკრიტიკებენ“, თუმცა, მისი თქმით, როდესაც არის პოლიტიკური ინტერესი, კომუნიკაციას დიდი მნიშვნელობა არ აქვს.

"როდესაც ეს ადამიანი საუბრობს იმაზე, რომ საქართველოსთან უნდა გადაიხედოს ურთიერთობები, საფუძველი რა არის? - არაფერი. ეს, ბუნებრივია, არის შეურაცხმყოფელი. იგივე დაფინანსების შემცირებაზე როცა საუბრობს. ერთიც და მეორეც არის, ბუნებრივია, შეურაცხმყოფელი. რაც შეეხება ფინანსურ მხარეს, აქ განმარტებები უკვე გავაკეთეთ.

ძირითადად, ეს თანხები მიდის "ენჯეოებზე“. შეგიძლიათ ნახოთ წლევანდელი დაფინანსება, მაგალითად, სად მიდის. რა თქმა უნდა, "ენჯეოებს“ არავინ არ შეუმცირებს დაფინანსებას და ეს მერე შაჰინმაც დააკორექტირა, თქვა, რომ მას ასე უთხრეს, რომ არ იქნება მიზანშეწონილი დაფინანსების კითხვის ნიშნის ქვეშ დაყენება.

რაც შეეხება პარტნიორული ურთიერთობის გადახედვას, ეს არის აბსოლუტურად შეურაცხმყოფელი გზავნილი, მითუმეტეს, რომ ახლა უსამართლობაზე არც ვსაუბრობ. გასაგებია რომ უსამართლოა, აბსოლუტურად, ეს განცხადება. მისი მეგობრები, როდესაც წავიდნენ ხელისუფლებიდან, იმ პერიოდიდან მოყოლებული ჩვენ გვაქვს საერთოდ ფუნდამენტური წინსვლა. ყველაფერს რომ თავი დავანებოთ, ცა და დედამიწაა ის მდგომარეობა, რაც გვაქვს ჩვენ დღეს და რაც იყო წარსულში, მისი მეგობარი პარტიის ხელისუფლებაში ყოფნის პერიოდში.

როცა ასეთ უსამართლობასთან გვაქვს ჩვენ საქმე, ეს ერთია, მაგრამ ის საუბრობს საქართველოს სახელმწიფოზე და იმაზე, რომ უნდა გადაიხედოს საქართველოს სახელმწიფოსთან პარტნიორული ურთიერთობები. ეს არის ჩვენი სახელმწიფოს და ქართველი ხალხის შეურაცხყოფა. მე პირადად და პრემიერსაც არაერთხელ გვქონია ამ ადამიანთან შეხვედრა, მათ შორის, ოდიოზურ ევროპარლამენტარებთან. როცა არის პოლიტიკური ინტერესი, კომუნიკაციას დიდი აზრი არ აქვს. ანუ მათ აქვთ გამოკვეთილი პოლიტიკური ინტერესი, ისინი განეკუთვნებიან, რაღაც საერთო კოორდინაციის სქემას და მიყვებიან ამ პოლიტიკურ ინტერესს. რაც ძალიან სამწუხაროა და ეს ინტერესი პირდაპირ უპირისპირდება ჩვენს ეროვნულ სახელმწიფოებრივ ინტერესებს,’’ - განაცხადა ირაკლი კობახიძემ.

ცნობისათვის, სენატის საგარეო ურთიერთობათა კომიტეტის სხდომაზე სენატორმა ჯინ შაჰინმა დასვა საკითხი იმის თაობაზე, რომ საქართველოსთვის დაფინანსების გამოყოფა "მის ქცევასთან იყოს დაკავშირებული“.

"საქართველოს ამჟამინდელმა მთავრობამ განაცხადა, რომ კანდიდატის სტატუსი იყო ძირითადი ვალდებულება, რის შესრულებასაც გეგმავდა, მაგრამ მათ აშკარად უღალატეს საკუთარ სიტყვას ამ ვალდებულებასთან დაკავშირებით“, - განაცხადა ჯინ შაჰინმა.