"ნაძვის ხეც უნდა დაიდგას, ქალაქიც განათებული უნდა იყოს. მწუხრი და სიხარული გვერდიგვერდ არიან, იზეიმონ ადამიანებმა, იმედი არ დაკარგონ" - რას წერს უკრაინაში დაღუპული ქართველი მეომრის მამა

უკრაინაში, ბახმუტთან, რუს ოკუპანტებთან ბრძოლისას გმირულად დაღუპული ქართველი მეომრის, ჯამბულატ ხოფერიას მამა, არჩილ ხოფერია, "ფეისბუქში" პოსტს აქვეყნებს. როგორც ხოფერია წერს, ყველა მეომარმა იცის, რომ ცხოვრება გრძელდება და რომ "ზუსტად ამისთვის იღუპებიან."

"იმიტომ ვწერ რომ ვიცი, ხალხი მიყურებს, ჩემი ხალხი, მეომრის გზა რთულია, მაგრამ ეს არჩევანია. მთელი ცხოვრება იყო მეომარი, ეს ორმაგად რთულია, იმიტომ რომ შენ გიფარავს ღმერთის ხელი, ხოლო შენი თანამებრძოლები მიჰყავს.

გემატება ტკივილი, რომელიც საჭურველთან ერთად უნდა ატარო, მაგრამ ყველა მეომარმა იცის, რომ ცხოვრება გრძელდება, ზუსტად ამისთვის იღუპებიან ისინი და ამიტომ: ნაძვის ხეც უნდა დაიდგას, რამეთუ ბავშვებს ძალიან უყვართ ის და ჩვენი მომავალი ბავშვებია, საიდანაც უნდა მოვიდეს ჩვენი ცვლა..

ქალაქიც განათებული უნდა იყოს, ხალხიც უნდა ზეიმობდეს ვისაც ეზეიმება. რატომ? იმიტომ რომ მწუხრი და სიხარული გვერდიგვერდ არიან და იზეიმონ ადამიანებმა, იმედი არ დაკარგონ

თბილისი კი დედაქალაქია, დედა ქალაქი და არ სჭირდება სახელის გადაკეთება მშვიდობის ქალაქად..

იცოდეთ, მეომრები წასულებიც და ისინიც ვინც დარჩა, იდგებიან თავიანთ ტკივილთან და საჭურველთან ერთად ფარად, რათა იცოცხლოს საქართველომ და ცხოვრება გაგრძელდეს", - წერს არჩილ ხოფერია.