ავტორი:

"ბებომ, რომელიც სახლიდან იშვიათად გამოდის, მისი უსაყვარლესი სათამაშოები ჩამოგვიტანა" - როგორ მოეწყო ულამაზესი საახალწლო სივრცე თბილისის "ყველაზე სუფთა ქუჩაზე"?

"ბებომ, რომელიც სახლიდან იშვიათად გამოდის, მისი უსაყვარლესი სათამაშოები ჩამოგვიტანა" - როგორ მოეწყო ულამაზესი საახალწლო სივრცე თბილისის "ყველაზე სუფთა ქუჩაზე"?

სოციალურ ქსელში საახალწლოდ ძალიან ლამაზად გაფორმებული ქუჩის ფოტოები გამოჩნდა. როგორც გაირკვა, ის საოცარი საახალწლო განათებები, ნაძვის ხეები და დეკორაციები ზაქარიაძის ქუჩის მოსახლეობას ერთობლივი ძალებით გაუკეთებიათ. ჩვენ მოვძებნეთ ამ საქმის ორგანიზატორი და ერთ-ერთი კორპუსის თავმჯდომარე ლევან მშვილდაძე.

- მადლობა, რომ მოგეწონათ ჩვენი ქუჩა და მისი დეკორაციები. ნოემბრიდან დავიწყეთ იმაზე ფიქრი, რა გაგვეკეთებინა და როგორ მოგვერთო ჩვენი ქუჩა. დავუკავშირდი მეგობრებს, ჩემს მეზობლებს - პენსიონერებს, მოხუცებს, უხუცესებს, ახალგაზრდებს და მოვილაპარაკეთ, რა და როგორ გაგვეკეთებინა. ასათიანის შემოსახვევიდან დაწყებული, გადაწყდა, რომ თითოეული კორპუსის მიმდებარედ, ყველგან საახალწლო განწყობა შეგვექმნა.

- დღეს ყველა კორპუსთან არის სადღესასწაულო განწყობა, ზოგან განათებები, ნაძვის ხე...

- კი, ყველას მოჰქონდა სათამაშოები, საახალწლო დეკორაციები, რაც ჰქონდათ. ჩემთვის ძალიან სასიხარულო იყო ერთ-ერთი მოხუცი ბებოს საქციელი, რომელიც სახლიდან გარეთ იშვიათად გამოდის. დამირეკა, სათამაშოები გადავაწყვე და როდის მოგაწოდოთო. მერე ჩამოვიდა მეხუთე სართულიდან და თავისი ხელით გადაწყობილი მისი უსაყვარლესი სამი სათამაშო ჩამომიტანა. 85 წლის ბებოს ამ დამოკიდებულებამ, სიყვარულმა ყველაფერი გადაწონა... მთავარი, სიყვარულით და გულით იყოს საქმე გაკეთებული და ვინ ფუმფულა სათამაშოს მოიტანს და ვინ კოშკებს ააშენებს, ამას მნიშვნელობა არ აქვს. მოკლედ, ავაგეთ ნაძვის ხეები, შევკარით გარკვეული კონსტრუქციები...

- ე.ი. მთელი ქუჩა სიხარულით ჩაერთო ქუჩის საახალწლო მოწყობაში.

- კი, შედუღება მამუკამ იცოდა, ელექტრობა ლევანი ძიამ ითავა, კონსტრუქციის გაკეთება ოთარი ბაბუამ შემოგვთავაზა და დაგვეხმარა იმაში, როგორ აგვეგო, მეგობარმა დიზაინერმა თავის კუთხით იმუშავა. ვისაც რა შეგვეძლო, ისე ვერთვებოდით ამაში. ყველაფრის ორგანიზატორი მე გახლდით, რომ ხალხი შემეკრიბა და ამ ერთი იდეის გარშემო გავერთიანებულიყავით. ჩემს ავტოფარეხში ვისაც რა შეეძლო, მოჰქონდა, სათამაშო, წვიმა, ნაძის ხე. საბოლოოდ გაჩნდა სლოგანი - „სიყვარული(თ)ბილისი 2023 წელი“. მერე პაატამ თქვა - მოდი, „თ“ გულში ჩავსვათო. ეს სლოგანი ნაძვის ხეზეც დავაწერეთ და ახლა ის არის ჩვენი 2023 წლის მთავარი სლოგანი. ყველაფერს ამ სლოგანით შევქმნით და გავაკეთებთ ზაქარიაძის ქუჩაზე.

- თოვლმაც როგორ გაგილამაზათ საახალწლო დეკორაციები...

- კი და შევკრიბეთ ბავშვები გავაკეთეთ ერთობლივად თოვლის ბაბუაც... მანამდე კი, 29 დეკემბერს 7 საათზე ბავშვებს შევხვდით. პატარები მშობლებთან ერთად მოვიდნენ, რომლებმაც თოვლის ბაბუას წერილები მოუტანეს. სანამ თოვლის ბაბუა მოვიდოდა და წერილებს წაიღებდა, მეგობარი ფანრით ეძებდა მას. იმ დროს კი მე „თოვლის ბაბუა“ სახურავზე ვიყავი. ჩამოვუშვი ტომარა, რომელშიც წერილები ჩაიყარა... გავახარეთ ბაბუები, ბებიები, ბავშვები, გამვლელები. ჩვენ შეგვიძლია, სხვა ადამიანებიც გავახაროთ. ამ თითოეული დეტალის გაკეთებაში დიდი შრომა ჩაიდო. ეს ყველაფერი ჩვენია, ყველასი ერთად. ამიტომ ყველამ რომ ვიგრძნოთ შინაგანად ერთად რა შეგვიძლია, არავის დაველოდებოდით. ვის უნდა დაველოდოთ, სიკეთე თვითონ ვაკეთოთ, რომ ერთმანეთი გავახაროთ.

- მოსახლეობა გაგებით ეკიდება და არ ანაგვიანებს ტერიტორიას?

- ახლა ფსიქოლოგებთან ვმუშაობთ იმაზე, რომ როგორ ჩავნერგოთ ადამიანებში ის, რომ არ გადაყარონ ნაგავი ფანჯრიდან, სამშენებლო ნაგავი არ მიიტანონ ბუნკერთან, საკუთარი ძაღლის ფეკალიები თავად აიღონ... ადამიანებს არ გვინდა აგრესიით მივმართოთ და ამიტომაც სწორად რომ გაკეთდეს ყველაფერი, ფსიქოლოგებთან ერთად ვიმოქმედებთ. დამზადდება წარწერები სიტყვაზე ასეთი - „არ დაყაროთ ნაგავი“, „გთხოვთ, ავიღოთ ძაღლის ფეკალიები“, „მანქანას ზებრაზე ნუ გააჩერებთ“, „ნაგავი ურნასთან მივიტანოთ“ - ასეთი ნიშნულები მთელ ქუჩაზე გვექნება. მერე კანონებით ავუხსნით, რომ ამა თუ იმ არასწორი ქმედებისას რა ჯარიმის გადახდა მოუწევთ. თუ არ მოხდა ამ ყველაფრის დაცვა და მაინც დაარღვიეს, ამას კამერები დააფიქრებს და დაჯარიმდებიან.

- მწვანე ნარგავებიც საკმარისად გაქვთ გარშემო დარგული...

- კი, ასობით ნერგია დარგული, მათ შორის, ზეთის ხილის ხე, რომელიც 1500 ლარი გადავიხადეთ ყველამ ერთად. ბევრი ძვირფასი მარადმწვანე ხეა. პროფესიით ექიმი და ეკონომისტი ვარ, ამასთან, სნოუბორდის ფედერაციის პრეზიდენტი, მაგრამ მომიწია ამ საქმის შესწავლაც. კარგად გავთვითცნობიერდი მებაღეობაში. როდესაც ამ ხეებს ვრგავდი, პირდაპირ კორპუსიდან 82 წლის ბატონი გოგი გოთუა გამოვიდა და დეტალურად ამიხსნა, რა როგორ უნდა გამეკეთებინა. რა მცენარეს რა სჭირდებოდა. მერე ამ ადამიანს დავუახლოვდი. ის მანანა დოიჯაშვილის, კონსერვატორიის რექტორის მეუღლე აღმოჩნდა, ბატონი გოგი 45 წელიწადია, ლანდშაფტის დიზაინერია და მსოფლიო აქვს მოვლილი.

- როგორც მითხარით, თქვენს ქუჩას ასევე ყველაზე სუფთა ქუჩის სტატუსი აქვს მინიჭებული...

- 2 წელიწადია, რაც „სუფთა ქალაქი, სუფთა ქუჩა“ კონკურსი ტარდება. მას ნინო ჩხობაძე, შვედეთის საელჩო და გარემოს დაცვის სამინისტრო ატარებს. ეს რომ გავიგეთ, ფოტოები გავგზავნეთ და გავიმარჯვეთ ზედიზედ 2021 წელს და 2022-ში. ყველაზე ლამაზი და სუფთა ქუჩის სტატუსი მოვიპოვეთ. დაგვაჯილდოვეს. არ გვეგონა, თუ ასეთი მასშტაბური კონკურსი და საინტერესო ჟიური იქნებოდა. ახლა „სიყვარულითბილისი 2023 წელი“ - ამ სლოგანით, როგორც გითხარით, ბევრ პროექტს გავაკეთებთ მოსახლეობა.