ქართველი ძიუდოისტების ისტორიული შედეგი - ვაჟთა ნაკრებმა მსოფლიო ჩემპიონატზე გუნდურ ჩათვლაში პირველი ადგილი დაიკავა
საქართველოს ძიუდოისტთა ნაკრებმა მსოფლიოს ჩემპიონატი ისტორიული შედეგით დაამთავრა. ნაკრებმა კატარის დედაქალაქ დოჰაში გამართული მსოფლიოს ჩემპიონატის ინდივიდუალურ ასპარეზობაში წარმატებით იასპარეზა. ქართველმა ძიუდოისტებმა ორი ოქროს, ერთი ვერცხლისა და ერთი ბრინჯაოს მედალი მოიპოვეს.
-60 კილოგრამ წონით კატეგორიაში მოასპარეზე გიორგი სარდალაშვილმა სადებიუტო მსოფლიოს ჩემპიონატზე ბრინჯაოს მედალი მოიპოვა. -81 კილოგრამ წონით კატეგორიაში მოასპარეზე ტატო გრიგალაშვილმა ზედიზედ მეორედ მოიპოვა მსოფლიოს ჩემპიონის ტიტული. ისტორიული შედეგი დაფიქსირდა -90 კილოგრამ წონით კატეგორიაში, რომლის ფინალშიც ერთმანეთს ლუკა მაისურაძე და ლაშა ბექაური დაუპირისპირდნენ.
ოქროს მედალს - მაისურაძე, ვერცხლს კი ბექაური დაეუფლა. საქართველოს ძიუდოისტთა ნაკრებმა ისტორიაში პირველად შეძლო მსოფლიოს ჩემპიონატზე ორი ოქროს მედლის მოპოვება. ქართველმა ვაჟმა ძიუდოისტებმა არაოფიციალურ გუნდურ ჩათვლაში პირველი ადგილი დაიკავეს.