სიახლეები და აქტივობები, რომლებსაც "პალიტრა L" წიგნის საერთაშორისო ფესტივალისთვის ამზადებს
25 მაისიდან 28 მაისის ჩათვლით თბილისის წიგნის საიუბილეო, 25-ე საერთაშორისო ფესტივალი გაიმართება. ფესტივალი ტრადიციული მასშტაბითა და ფორმატით, ექსპო ჯორჯიას პავილიონებში უმასპინძლებს მკითხველებს. მე-11 პავილიონში წარმოდგენილი იქნება, როგორც ქართველი, ისე უცხოელი გამომცემლებისა და სხვადასხვა ორგანიზაციების მთავარი სტენდები, ხოლო მე-6 და მე-5 პავილიონებში თავმოყრილი იქნება საბავშვო წიგნები და აქსესუარები. ფესტივალის ფარგლებში მოეწყობა, როგორც მთავარი სცენა ლიტერატურული ღონისძიებებისთვის, ასევე საბავშვო შემეცნებით-გასართობი კუთხე ფესტივალის პატარა დამთვალიერებლებისთვის.
„პალიტრა L“ ერთ-ერთია იმ წამყვან გამომცემლობებს შორის, რომლებიც წიგნის საერთაშორისო ფესტივალზე ტრადიციულად ახალი წიგნებით, დიდი ფასდაკლებებითა და სხვადასხვა საინტერესო აქტივობითაა წარმოდგენილი. გამომცემლობის სტენდი დიდი ფასდაკლებებით წარმოდგენილი იქნება როგორც ძირითად, მე-11 პავილიონში, ისე საბავშვო სივრცეში, მე-6 პავილიონში.
„პალიტრა L-ს“ დაგეგმილი აქვს აქტივობების საკმაოდ საინტერესო ჩამონათვალი. მისულ სტუმრებს ელოდებათ თამაშები და სხვადასხვა სახის სიურპრიზები. გაგაცნობთ დაგეგმილი აქტივობების ნაწილს:
26 მაისი, პარასკევი, 15:00 - Teens Game; ღონისძიების წარმდგენები - მარიამ გიორგაძე, თუთიკო მუჯირი. პროექტის მიზანია წიგნიერების დონის გაზრდა მოზარდებში. თამაშის გამარჯვებული კი შაბათს, 27 მაისს გამოვლინდება.
27 მაისი, შაბათი, 15:20 - წიგნის წარდგენა, „XXI საუკუნის ქართული მოთხრობა“; წარმდგენი ბესო ხვედელიძე.
28 მაისი, კვირა, 18:00 - წიგნის წარდგენა, „მოთხრობები ქართლიდან“ - წარმდგენები: რევაზ-გიორგი არველაძე, ქეთი ქანთარია.
Teens Game თამაშია, რომელიც „პალიტრა L-მა” თინეიჯერ მკითხველს მარტის დასაწყისში შესთავაზა. თამაშში მონაწილეობისთვის Liberteens-ის სერიის სხვადასხვა წიგნში დამალული თავსატეხის ამოხსნა იყო საჭირო. თამაშში, რომლის ავტორიც მწერალი თეა ინასარიძეა, სხვადასხვა დავალების ამოხსნისას საჭიროა კრეატიული აზროვნება, დაკვირვებულობა. ფინალი „ექსპო ჯორჯიას“ ტერიტორიაზე, ღია სივრცეში გაიმართება. ამ ტერიტორიაზე გაბნეული იქნება მინიშნებები, რომელთა მოსაძებნად მოთამაშეებს დაეხმარება თამაშის წინა 3 ტურში მოპოვებული პასუხები. პირველი ორი მოთამაშე, რომელიც ყველა მინიშნებას იპოვის და ფინალურ დავალებას სხვებზე ადრე გაართმევს თავს, დასაჩუქრდება. გამარჯვებულებს Oculus Quest 2 ან Apple AirPods Pro 2 გადაეცემათ.
სპეციალურად ფესტივალისთვის გამომცემლობა „პალიტრა L-მა” არაერთი ახალი წიგნი მოამზადა, რომლებიც საფესტივალო დღეებში ფასდაკლებით გაიყიდება. ფესტივალის სიახლეებს შორისაა:
- „ჰიპნოზი“, ჰოვარდ ფილიპს ლავკრაფტი;
- „აბა, გინდა იყო ვიკინგი?“ ჯორჯია ამსონ-ბრედშოუ;
- „აბა, გინდა იყო რომაელი ჯარისკაცი?“ ჯორჯია ამსონ-ბრედშოუ’
- „აბა, გინდა იყო ნინძა?“ ბრუნო ვინსენტი;
- „ფოკუსი სარკეებით“, აგათა კრისტი;
- „ბიჭი ადამიანია“, ჯასტინ ბალდონი;
- „დასახოცთა სია“, ჯეკ კარი;
- „ჯაყოს ხიზნები“, მიხეილ ჯავახიშვილი;
- „ბრმათა ქვეყანა“ ჰერბერტ უელსი;
- „ქალაქი წყალზე“, სალომე ბენიძე;
- „გადამწვარი ხიდები“, ნათია ჯაგოდნიშვილი;
- „მზე და მისი ყვავილები“, რუპი კაური;
- „თანამედროვე მოდა“, მარნი ფოგი;
- „უსასრულო თამაში“, საიმონ სინეკი;
- „იკიგაი თინეიჯერებისთვის“, ჰექტორ გარსია, ფრანსესკ მირალესი.
აღსანიშნავია, რომ ფიზიკური ღონისძიების პარალელურად, ფესტივალის ღონისძიებები ლაივ რეჟიმშიც გავა ფესტივალის ფეისბუქ გვერდზე. გარდა ამისა, მომხმარებელს საქართველოს მასშტაბით წიგნების შეძენა ფესტივალის ფარგლებში შეძლებენ საიტიდან: palitral.ge საფესტივალო ფასად.
R