"ჩვენი ხელით გავამაგრეთ მდინარის კალაპოტი და გადავარჩინეთ შოვი წალეკვას... მოგვაქციეთ ყურადღება" - რას წერდა 2020 წელს მარიტა გუტაშვილი, რომელიც მეწყრის შემდეგ მთელ ოჯახს ეძებს
მარიტა გუტაშვილი შოვში ჩამოწოლილ მეწყერს გადაურჩა, მაგრამ ის ამ დრომდე ვერ უკავშირდება ოჯახის წევრებს. მეწყრის შემდეგ დაკარგულები არიან მარიტას ძმა, და, დეიდა, ორი დეიდაშვილი, ბიძაშვილი სამი შვილით.
აღსანიშნავია, რომ შოვში არსებულ პრობლემაზე მარიტა ჯერ კიდევ 2020 წელს წერდა. უცვლელად გთავაზობთ მის პოსტს, რომელიც 2020 წელს აქვს სოციალურ ქსელში გამოქვეყნებული:
"ვისაც გიყვართ რაჭა, გული შეგტკივათ შოვზე, მინდა ყველას გაგაგებინოთ როგორი დილა გაგვითენდა აქ. უკვე მერამდენე წელია საკუთარი ძალებით, საკუთარი ხელებით, სიცოცხლისა და ჯანმრთელობის ფასად ვცდილობთ შევინარჩუნოთ ის სამოთხე, რაც აქ გვაქვს. შევინარჩუნოთ მხოლოდ ჩვენთვის კი არა, მთელი საქართველოსთვის.
რამდენიმე წლის წინ უხვი ნალექის გამო კურორტ შოვში მდინარე ბუმბურას ადიდების შედეგად დაზიანდა კურორტის მთავარი გზა, მდინარემ კალაპოტი გაარღვია. მაშინაც ისეთი სიტუაცია იყო (შედარებით უფრო მსუბუქი - მალე ვუშველეთ ჩვენივე ძალებით), როგორსაც ახლა ფოტო მასალაში ნახავთ. მაშინ, მიუხედავად იმისა, რომ ონის რაიონულმა გამგეობამ ძალიან კარგად იცოდა არსებული მდგომარეობის შესახებ, მხოლოდ ამოსვლით, ნახვით, ფოტოების გადაღებითა და მწუხარების გამოხატვით შემოიფარგლა.
მადლობა დიდი! ჩვენი ხელით, გელა გუტაშვილის სპეც-ტექნიკით, გავამაგრეთ მდინარის კალაპოტი და გადავარჩინეთ მთლიანად წალეკვას შოვი. ნორმალურად შეფასებული მდგომარეობის ფონზე, უნდა გაეკეთებინათ მობრძანებულ "ექსპერტებს" ჯებირები, გაემაგრებინათ კალაპოტი, მაგრამ არავინ არ შეწუხებულა არსებული პრობლემით.
გავიდა რამდენიმე წელი... ჩვენ ისევ აქ ვართ.. დღესაც იგივე ხდება, რაც მაშინ, უარესიც. მიწასთან გასწორდა მთელი კურორტი, ცარიელი ხელებით ვეღარ ვშველით. ვიცი ყველას თავის გასაჭირი აქვს და მთლიანად რაჭისთვის გათენდა ის დილა, რისიც გვეშინოდა, მაგრამ სანამ მთელ რაჭას არ წაიღებს, მოდი მდინარეს ჯებირები არ გავუკეთოთ და ჰესები ვაშენოთ. მარტო შოვი არა, ასეთ დღეშია გონა, ღები, ჭიორა, გლოლა, უწერა.. ასეთ დღეშია ნაკიეთი და ალბათ კიდევ ბევრი ადგილი, რაც მე ჯერ არ ვიცი კიდევ.
ახლა გვიანია.. საკმაოდ გვიანი ... და რომც გინდოდეთ.. არ ვიცი საერთოდ დაგრჩათ თუ არა შესაძლებლობა იმის, რომ დაგვეხმაროთ .. მოგვაქციეთ ცოტა მეტი ყურადღება... არაა საჭირო ჰესების აშენება, ისედაც "ვიხრჩობით" გვეყოფა მზიანი ამინდის ყურება, სიძნელესთან გამკლავებას ერთად შევძლებთ თუ არ დაიმალებით.
გვეყოფა ზღაპრების მოყოლა, კეთილი დასასრული მაინც არცერთს არ აქვს და ნუ ვიწვალებთ შეთხზვით თავს. მარტო საკუთარი სახლებისთვის საძირკველის გამაგრება არ კმარა. წყლიან საძირკველში ისევ ჩადგება წყალი. ადვილად მისახვედრი ამბავია", - წერდა მარიტა გუტაშვილი.
ცნობისთვის, 3 აგვისტოს რაჭაში, შოვში უდიდესი ტრაგედია მოხდა. იმ ადგილის მიმდებარედ, სადაც სასტუმრო "სანსეთ შოვი" და კოტეჯებია განთავსებული მეწყერი ჩამოწვა. ადგილზე ათობით დამსვენებელი იმყოფებოდა. მაშველებმა შეძლეს 210 ადამიანის უვნებლად გამოყვანა. ოფიციალური მონაცემებით, ამ დრომდე 25 ადამიანს ვერ უკავშირდებიან. შოვში მაშველების დასახმარებლად იმყოფებიან მოქალაქეები, მოხალისეები, ძებნის სამუშაოებში ჩართულია ჯარიც.
მომხდარი ტრაგედიის გამო 7 აგვისტო გლოვის დღედ გამოცხადდა.