"ჰამასმა" აშკელონის მიმართულებით რაკეტები გაუშვა
"ჰამასმა" ღაზის სექტორიდან ისრაელის ქალაქ აშკელონის მიმართულებით რაკეტები გაუშვა. ინფორმაციას CNN ავრცელებს. "ჰამასმა“ ისრაელის მოქალაქეები ცოტა ხნის წინ გააფრთხილა, რომ აშკელონი დღეს, ადგილობრივი დროით 5 საათამდე უნდა დაეტოვათ.
განცხადება "ჰამასის“ შეიარაღებული ფრთის სპიკერმა, აბუ უბაიდამ გაავრცელა, თუმცა სხვა დეტალები არ დაუკონკრეტებია.
ამასთან, მედიის ინფორმაციით, ღაზის სექტორის ჩრდილოეთით მდებარე ტერიტორიაზე სარაკეტო თავდასხმის საფრთხის მაუწყებელი სირენების ხმა ისმოდა, რის გამოც მოსახლეობა და ვიზიტორები თავშესაფრებში გადადიან.
CNN-ის ცნობით, სირენების გაჟღერებიდან მალევე, აშდოდში ძლიერი აფეთქებების ხმები გაისმა, რაც "რკინის გუმბათის“ მიერ ღაზას სექტორიდან გაშვებული რაკეტების მოგერიებით გამოწვეული ხმები იყო.