გურამ კაშიამ "კვარა" მესამე პოზიციაზე დაასახელა, რუსეთის ნაკრების კაპიტანმა გიორგი ჯიქიამ კი პირველზე - ვინ მისცა ხმა ხვიჩა კვარაცხელიას FIFA-ს გამოკითხვაში და როგორია ქეცბაიასა და სანიოლის არჩევანი

FIFA-მ 2023 წლის საუკეთესო ფეხბურთელები დაასახელა. ათეული ასეთია:

1. ლეო მესი
2. ერლინ ჰალანდი
3. კილიან მბაპე
4. დევინ დე ბრუინი
5. ვიქტორ ოსიმენი
6. როდრი
7. ხულიან ალვარესი
8. ბერნარდო სილვა
9. ილქაი გიუნდოგანი
10. ხვიჩა კვარაცხელია

როგორც ხედავთ, საქართველოს ეროვნული ნაკრებისა და იტალიური "ნაპოლის" შემტევი, ხვიჩა კვარაცხელია სიაში მეათე პოზიციაზეა.

• ინფორმაციისთვის, FIFA-ს წესების მიხედვით, საუკეთესო ფეხბურთელი ვლინდება ხმის მიცემის შედეგად. ხმის უფლება აქვთ სხვადასხვა ქვეყნების ეროვნული ნაკრების კაპიტნებს, მთავარ მწვრთნელებს და სპორტის სფეროს ჟურნალისტებს. ხმის უფლების მქონე თითოეულ პირს აქვს სამი არჩევანი - პირველი არჩევანი ფასდება ყველაზე მეტი - 5 ქულით, მეორე არჩევანი 3 ქულით, ხოლო მესამე - 1 ქულით.

ჩვენ დავინტერესდით, ვინ მისცა ხმა ხვიჩა კვარაცხელიას. როგორც ოფიციალურად გამოქვეყნებული ინფორმაციიდან ირკვევა, ხვიჩას ხმა მისცა 29 ადამიანმა.

საინტერესოა, რომ საქართველოს ეროვნული ნაკრების კაპიტნისთვის, გურამ კაშიასთვის ხვიჩა კვარაცხელია მესამე არჩევანი იყო. კაშიას რჩეული სამი ფეხბურთელი ასეთია (რიგითობა დაცულია) - 1. ლეო მესი, 2. კილიან მბაპე, 3. ხვიჩა კვარაცხელია.

ჩვენი ნაკრების მწვრთნელის, ვილი სანიოლის პირველი არჩევანი კვარაცხელიაა. ვილის სამეული ასე გამოიყურება - ხვიჩა კვარაცხელია, ერლინგ ჰალანდი, როდრი.

კვიპროსის ნაკრების მწვრთნელისთვის, თემურ ქეცბაიასთვისაც ხვიჩა, კაშიას მსგავსად, მესამე არჩევანი იყო. ქეცბაიას სამეული ასეთია - ლეო მესი, კევინ დე ბრუინი, ხვიჩა კვარაცხელია

აღსანიშნავია, რომ რუსეთის ეროვნული ნაკრების კაპიტანმა, წარმოშობით ქართველმა გიორგი ჯიქიამ ფავორიტად ხვიჩა კვარაცხელია დაასახელა. ჯიქიას სამეული ასეთია - ხვიჩა კვარაცხელია, ლეო მესი, კევინ დე ბრუინი.

ხვიჩა ასევე დაასახელა თანაგუნდელმა ამირ რაჰმანიმაც, რომელიც კოსოვოს ნაკრების კაპიტანია. რაჰმანის სამეული ასეთია - ვიქტორ ოსიმენი, ხვიჩა კვარაცხელია, ლეო მესი.

ვინ ვის მისცა ხმა - სია ნახე ბმულზე