“ივანიშვილმა 4-ჯერ მეტი ადამიანი გაიყვანა საქართველოდან ვიდრე შაჰ აბასმა - 2024 წელს საქართველო უფრო უარესად ცხოვრობს, ვიდრე 2012 წელს“ - მიხეილ სააკაშვილი
“ივანიშვილმა ოთხჯერ მეტი ადამიანი გაიყვანა საქართველოდან, ვიდრე შაჰ აბასმა - ბიძინა ივანიშვილი არ არის მშვიდობის მტრედი!“ - ამის შესახებ საქართველოს მესამე პრეზიდენტმა, მიხეილ სააკაშვილმა სასამართლო პროცესზე კლინიკა “ვივამედიდან“ ჩართვისას განაცხადა.
როგორც სააკაშვილმა აღნიშნა, მმართველი პარტია ხალხს ომით და უბედურებით აშინებს.
“მთავრობა არის კრიმინალური. ამიტომ კრიმინალურ - მაფიოზურ მთავრობას რუსეთში ყოფნა უნდა, იქ არის მაფიოზების სამოთხე. 2012 წელს საქართველო ცხოვრობდა ბევრად უკეთესად, ვიდრე 2003 წელს. 2024 წელს საქართველო ცხოვრობს უფრო უარესად, ვიდრე 2012 წელს.
მართალია წინა პროცესზე ჩემი ხმა ჩაახშეს 100 მოგუგუნე ქარხნით, რომელიც ივანიშვილმა აამუშავა საქართველოში, მაგრამ ყველას გვახსოვს, რომ მეოთხე წელს არ უნდა ყოფილიყო გაჭირვებული მოსახლეობა. ხალხი დაამშიეს, ახლა კიდევ, დამშეულ და გაჭირვებულ ხალხს, იმის ნაცვლად, რომ წესიერი რამ დაჰპირდნენ, ომით და უბედურებით უნდათ რომ დააშინონ, ომით და უბედურებით გამოიკვებება ხალხი?! ომით და უბედურებით გამაგრდება ქვეყანაში ხალხი?! რას გვაშინებენ ამ ომით?! ყველამ კარგად იცის, რომ თუ ევროპაში წავალთ (ამათ გზა დაგვიკეტეს და ჩაგვეხსნებიან), არანაირ ომს იქ ადგილი არ აქვს.
ივანიშვილმა თქვა, კახეთი ისე ააოხრა სააკაშვილმა, როგორც აღა-მაჰმად-ხანმაო, რომ არ ყოფილა აღა-მაჰმად-ხანი კახეთში ეგ ერთი, შაჰ აბასი იყო, რომელმაც 200 ათასი კახელი გაიყვანა ფერეიდანში. ივანიშვილმა ოთხჯერ მეტი ადამიანი გაიყვანა საქართველოდან ვიდრე შაჰ აბასმა. ჩემს დროს უფრო მეტი ბრუნდებოდა, ვიდრე მიდიოდა“,- აღნიშნა სააკაშვილმა.
ამასთან, მისივე თქმით, “ქართული ოცნების“ დამფუძნებელს, ბიძინა ივანიშვილს და მის პარტიას კორუფცია და სიკვდილი მოაქვს.
“იმას კი ნუ გვაჩვენებთ უკრაინაში რა გზა დაიბომბა, შემოვლითი გზა გვაჩვენეთ, რატომ არის თბილისის შემოვლითი გზა გაჩერებული. ყველაზე დიდი ინფრასტრუქტურული პროექტები სვანეთში, წყალტუბო გავერანებულია!
ივანიშვილი არ არის მშვიდობის მტრედი, ივანიშვილს მოაქვს ნგრევა, ოჯახების განადგურება და სიღარიბე. ივანიშვილს და მის პარტიას კორუფცია მოაქვს, სიკვდილი. უნდა შევაჩეროთ სიკვდილი, ომით ხალხის დაშინება, ჭეშმარიტი მშვიდობა მოვუტანოთ საქართველოს. ხალხის დაცინვა და სიხარბე უნდა შეწყდეს. მთავრობა, რომელიც მილიონერებისგან შედგება ვერასდროს გააკეთებს კარგს ხალხისთვის“,- აღნიშნა სააკაშვილმა.
“მე მაქვს მოწოდება, შევქმნათ არჩევნების მოხალისეების ინსტიტუტი - თუ ივანიშვილი დარჩა, რუსეთი ისე გადაგვსანსლავს, ისე გაგვანადგურებს და ძვლებში გადაგვტეხავს, როგორც არასდროს გაუკეთებია ისტორიაში, იმიტომ რომ მას უნდა ქართველი ერის დასჯა, - განაცხადა საქართველოს მესამე პრეზიდენტმა.
მისი თქმით, რუსეთთან გარიდება ნიშნავს არჩევნებზე “პუტინიზმის და ამ უბედურების“ დამარცხებას.
როგორც ქვეყნის ყოფილი პრეზიდენტი აღნიშნავს, მას რომ 2008 წელს ბოდიშ მოეხადა და/ან ქვეყნიდან გაქცეულიყო, დღეს საქართველო როგორც სახელმწიფო აღარ იარსებებდა.
“ივანიშვილის განზრახვაა, რომ რუსეთს რომ მიგვაერთებს, ქართველები წაიყვანოს ომში უკრაინელების წინააღმდეგ. როგორც მიჰყავთ ჩეჩნები, როგორც მიჰყავთ აფხაზეთიდან და ცხინვალიდან ხალხი. ზუსტად ასე უნდათ თბილისიდან, ქუთაისიდან, ბათუმიდან ქართველების შეკრება ცხვრის ფარასავით და ომში წასვლა რუსეთის მხარდასაჭერად.
რუსეთი ისე გადაგვსანსლავს თუ ივანიშვილი დარჩა, ისე ჩაგვასობს კბილებს და ეშვებს, ისე გაგვანადგურებს და ძვლებში გადაგვტეხავს, როგორც არასდროს გაუკეთებია ისტორიაში, იმიტომ რომ მას უნდა ქართველი ერის დასჯა,“ - განაცხადა სააკაშვილმა.
“მიხარია, რომ ოპოზიციური ძალები ძალას იკრეფენ. ეს არის ძალიან მნიშვნელოვანი იმიტომ, რომ ამ ძალაში არის ჩვენი გამარჯვების რეცეპტი, ვერავინ წამოაგეს იმაზე, რომ ერთმანეთს ურტყან, ყველას სამიზნე ოლიგარქზე აქვს გასწორებული და მის ომის და შიშის პარტიაზე.
“ქართული ოცნება“ არის შიშის და ომის პარტია. ყველა მეგობარი დაგვაკარგვინეს, საქართველო სრულ საერთაშორისო იზოლაციაში ისე მოაქციეს, რომ არავინ არ იქნება ხმის ამომღები. როგორც ამათ უნდათ, რომ გადაგვიარონ და ჩაგვტკეპნონ მიწაში, სიკვდილი და უბედურება შემოიტანონ. ეს ყველაფერი დაკავშირებულია რუსეთთან - უბედურება, ომი, საფრთხე. ეს ყოველივე საუკუნეების განმავლობაში რუსეთთან იყო დაკავშირებული, ხოლო ეს პარტია, რომელიც ცდილობს ხალხი დააშინოს - ომით, ეს არის მშვიდობის მთავარი მტერი. მშვიდობა არის ევროპაში, ოპოზიციის გამარჯვებაშია მშვიდობის და კეთილდღეობის გასაღები. ის, რაც დღეს ხდება უზარმაზარი საფრთხის საწინდარია“, - განაცხადა სააკაშვილმა.