"თბილისის ცენტრში თავს ესხმიან ჟურნალისტებსა და პოლიტიკურ ლიდერებს... ველოდები ძლიერ რეაქციას ევროპის დედაქალაქებისგან" - პრეზიდენტი

თბილისის ცენტრში კვლავ გრძელდება საპროტესტო აქციები და რეპრესიები. თავს ესხმიან ჟურნალისტებსა და პოლიტიკურ ლიდერებს, - ასე ეხმაურება საქართველოს პრეზიდენტი სალომე ზურაბიშვილი პლატფორმა X-ზე რუსთაველის გამზირზე მიმდინარე მოვლენებს, სადაც სამართალდამცველებმა მომიტინგეები წყლის ჭავლითა და ცრემლსადენი გაზის გამოყენებით რამდენჯერმე დაშალეს.

• "ველოდები ძლიერ რეაქციას ევროპის დედაქალაქებისგან", - წერს პრეზიდენტი ზურაბიშვილი.

შეგახსენებთ, პარლამენტთან აქცია მას შემდეგ ჩაინიშნა, რაც საქართველოს პრემიერ-მინისტრმა ირაკლი კობახიძემ საპარლამენტო უმრავლესობისა და სამთავრობო გუნდის შეხვედრის შემდეგ ევროკავშირთან მოლაპარაკებების საკითხზე განცხადება გააკეთა.

კერძოდ, მმართველი გუნდის გადაწყვეტილებით, საქართველო 2028 წლის ბოლომდე დღის წესრიგში არ დააყენებს ევროკავშირთან მოლაპარაკების გახსნის საკითხს. პრემიერ-მინისტრის განცხადებით, საქართველო, ასევე, 2028 წლის ბოლომდე უარს ამბობს ყოველგვარ საბიუჯეტო გრანტზე ევროკავშირის მხრიდან.

ნახეთ ასევე:

• მძიმე ღამის ქრონიკა ფოტოებში: დაშლა წყლის ჭავლით, ნაცემია რამდენიმე პირი... - რა ხდებოდა დედაქალაქის მთავარ გამზირზე (ფოტოები)
• გაიზარდა საქართველოს საგარეო საქმეთა სამინისტროს იმ თანამშრომლების რიცხვი, ვინც ევროინტეგრაციის შეჩერების გადაწყვეტილება გააპროტესტა - იხილეთ განცხადება და განახლებული სია