საუდის არაბეთში უკრაინისა და აშშ-ის დელეგაციების შეხვედრა მიმდინარეობს

საუდის არაბეთში უკრაინისა და აშშ-ის დელეგაციების შეხვედრა მიმდინარეობს, - ამის შესახებ ინფორმაციას Sky News-ი უკრაინის საგარეო საქმეთა სამინისტროზე დაყრდნობით ავრცელებს.

საუდის არაბეთის ქალაქ ჯიდაში მიმდინარე შეხვედრაზე უკრაინულ მხარეს პრეზიდენტის ადმინისტრაციის ხელმძღვანელი ანდრეი ერმაკი, საგარეო საქმეთა მინისტრი ანდრეი სიბიგა, თავდაცვის მინისტრი რუსტემ უმეროვი და სამხედრო თანაშემწე პავლო პალისა წარმოადგენენ.

აშშ-ის დელეგაციის შემადგენლობაში სახელმწიფო მდივანი მარკო რუბიო, უსაფრთხოების საკითხებში აშშ-ის პრეზიდენტის მრჩეველი, მაიკ უოლცი და ახლო აღმოსავლეთში დონალდ ტრამპის სპეციალური წარმომადგენელი, სტივ ვიტკოფი შედიან.

არსებული ინფორმაციით, შეხვედრის მთავარი განსახილველი თემები იქნება მშვიდობის გზა და ორმხრივი ურთიერთობები უკრაინასა და შეერთებულ შტატებს შორის.

მედია ასევე წერს, რომ ამერიკულმა დელეგაციამ შეხვედრაზე გაურკვეველი მიზეზების გამო დააგვიანა.