"მგონი, ბაჩიაშვილს დაცვა უნდა გავუძლიეროთ, რომ თავად არ მოწამლონ და არ გააკეთონ ისეთი რამ, რაც ჩაფიქრებული აქვთ" - ვოლსკი
სააკაშვილთან დაკავშირებით აბსოლუტური სისულელეები ვისმინეთ, იგივე სისულელეს ლაპარაკობენ ახლა ბაჩიაშვილთან დაკავშირებით - საქართველოში არავის აწამებენ და საქართველოში სიცოცხლეს არავის ართმევენ, - ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა, რითაც შეაფასა ადვოკატის განცხადება, რომ ბაჩიაშვილს „იძულებით დაბრუნების შემდეგ წამების დაუყოვნებლივი საფრთხე ემუქრება".
- ვოლსკი ფიქრობს, რომ ბაჩიაშვილს დაცვა უნდა გაუძლიერონ, რათა „თავად არ გააკეთონ ისეთი რამ, რაც ჩაფიქრებული აქვთ, რომ როგორმე საქართველოს ავტორიტეტს დაარტყან".
"იმედია, მტკიცებულებების ერთობლიობა ეჭვს არავის უტოვებს, რომ დამნაშავეა, მაგრამ ჩვენი გადასაწყვეტი არ არის. რასაკვირველია, ფაქტია და ამ ფაქტს ვერ გავექცევით. არც აქვს თავად ბაჩიაშვილს არაფერი გამამართლებელი. ამბობს, რომ ავიღე თანხა, ამ თანხით მივიღე მოგება და ეს მოგება დავმალე.
ბაჩიაშვილის ადვოკატი ამბობს სისულელეს. ისევე როგორც ამბობდნენ სისულელეს სააკაშვილის მოწამვლასთან, დემენციასთან დაკავშირებით. სააკაშვილთან დაკავშირებით აბსოლუტური სისულელეები ვისმინეთ, იგივე სისულელეს ლაპარაკობენ ახლა ბაჩიაშვილთან დაკავშირებით. საქართველოში არავის აწამებენ და საქართველოში სიცოცხლეს არავის ართმევენ. ახლა ამათ აქვთ პოლიტიკური იდეა, რომ როგორმე ადამიანები დაარწმუნონ, ვინც არ იციან რა ხდება საქართველოში, რომ აქ შესაძლებელია, დასაშვებია, რომ ვიღაც აწამონ, მით უმეტეს, თუკი ბიძინა ივანიშვილთან აქვს სასამართლო დავა. ეს არის იდეა. სულ არ აინტერესებს არავის ბაჩიაშვილის ცხოვრება. პირიქით, მე მგონი, დაცვა უნდა გავუძლიეროთ, რომ თავად არ მოწამლონ და არ გააკეთონ ისეთი რამ, რაც ჩაფიქრებული აქვთ, რომ როგორმე საქართველოს, მის ავტორიტეტს დაარტყან," - განაცხადა ვოლსკიმ.
ცნობისთვის, სახელმწიფო უსაფრთხოების სამსახურის ინფორმაციით, სუს-მა 2025 წლის 26 მაისს განხორციელებული ანონიმური შეტყობინებით წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ წითელი ცირკულარით ძებნილი და მსჯავრდებული გიორგი ბაჩიაშვილი დააკავა.
"თანაინვესტირების ფონდის" ყოფილი გენერალური დირექტორი, "ქართული ოცნების“ დამფუძნებლის, ბიძინა ივანიშვილის კრიპტოვალუტის მითვისებაშია მსჯავრდებული და მას 11 წლით თავისუფლების აღკვეთა აქვს მისჯილი. ამასთან, მას ბრალი წარდგენილი აქვს სისხლის სამართლის კოდექსის 344-ე მუხლის პირველი ნაწილით, რაც საზღვრის უკანონოდ გადაკვეთას გულისხმობს.
ბაჩიაშვილს ბრალი აქვს წარდგენილი "მტკვარი ჰესის" საქმეზეც საქართველოს სსკ-ის 2201-ე მუხლის მე-2 ნაწილით, რაც სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობას ან არაჯეროვნად შესრულებას გულისხმობს, რამაც მძიმე შედეგი გამოიწვია. წარდგენილი ბრალდება სასჯელის სახედ და ზომად 2-დან 5- წლამდე თავისუფლების აღკვეთას ითვალისწინებს.
წაიკითხეთ ასევე: