რას მოითხოვს ირაკლი სესიაშვილი და რას ვერ უარყოფს გიგი წერეთელი

რას მოითხოვს ირაკლი სესიაშვილი და რას ვერ უარყოფს გიგი წერეთელი

ირაკლი სესიაშვილი და გიგი წერეთელი ქვეყანაში არსებულ ვითარებას სხვადასხვაგვარად აფასებენ, რადიკალურად განსხვავებულია მათი შეხედულებები საზოგადოებაში არსებულ პრობლემებთან დაკავშირებითაც. "უსამართლობა, პოლიტიკური ტერორი, ადამიანების შელახული უფლებები და ტოტალური უმუშევრობა - ეს ის პრობლემებია, რომლებიც ყველაზე მეტად აწუხებს ქართველ ხალხს" - ამბობს "ქართული ოცნების" წარმომადგენელი ირაკლი სესიაშვილი. გიგი წერეთელის აზრით, უსამართლობაა იმის თქმა, რომ სააკაშვილის ხელისუფლებამ ქვეყანა დაანგრია. "ღმერთმა ქნას, რომ ახალმა ხელისუფლებამ ქვეყანას მეტი პროგრესი მოუტანოს, ჩვენ ამაში ხელს შევუწყობთ," - ამბობს "ნაციონალი" გიგი წერეთელი. საინტერესოა, როგორ ესახებათ მათ არსებული პრობლემების მოგვარება და რას მიიჩნევენ ქვეყნის საგარეო პოლიტიკის პრიორიტეტად...

- თქვენი აზრით, ახალმა საკანონმდებლო თუ აღმასრულებელმა ხელისუფლებამ საიდან უნდა დაიწყოს ქვეყანაში არსებული პრობლემების მოგვარება?

გიგი წერეთელი:

- ვერავინ უარყოფს, რომ "ვარდების რევოლუციის" შემდეგ ბევრი სასიკეთო რეფორმა განვახორციელეთ და დღეს ჩვენი ქვეყანა, თავისი ეკონომიკით, ბიუჯეტით, ინფრასტრუქტურით და დემოკრატიის ხარისხით ბევრად უკეთესია, ვიდრე 2003 წლამდე იყო. ბოლო არჩევნებით კი ჩვენ მსოფლიოს, დემოკრატიაში გამოცდა ჩავაბარეთ. ამ ყველაფრის მიუხედავად, ვაღიარებთ, რომ რაღაც შეცდომები დავუშვით, თუნდაც პენიტენციარულ სისტემაში. ისიც მესმის, რომ ხალხი იღლება ხელისუფლებაში ერთი და იმავე ადამიანების ყურებით, რაც უნდა კარგი მმართველები იყვნენ ისინი. ერთი სიტყვით, რამდენიმე ფაქტორის გამო არჩევნებამდე ორი კვირით ადრე "ნაციონალებისადმი" საზოგადოებრივი განწყობა შეიცვალა და უპირატეს მდგომარეობაში სხვა პოლიტიკურ ძალა აღმოჩნდა. მართალია ჩვენც საკმაოდ მრავალრიცხოვანი ფრაქცია გვყავს პარლამენტში და სერიოზულ ძალას წარმოვადგენთ, მაგრამ ახალი ხელისუფლებისთვის ხელის შეშლას არ ვაპირებთ. ჩვენი სურვილია, რომ პარლამენტმა დროულად დაიწყოს მუშაობა. საიდან დაიწყება ქვეყანაში არსებული პრობლემების მოგვარება ეს უკვე ახალი უმრავლესობის გადასაწყვეტია. საბედნიეროდ, მათ ისეთი პრობლემები არ ხვდებათ, როგორიც ჩვენ დაგვხვდა. იმედს ვიტოვებ, რომ "ოცნება" ჩვენს მიღწევებსაც შეინარჩუნებს და კიდევ უფრო გაზრდის პენსიას, ხელფასს, ჯანდაცვას გააუმჯობესებს...

ირაკლი სესიაშვილი:

- ჩემი აზრით, პირველ რიგში ქვეყანაში სამართალი უნდა აღვადგინოთ და მოსახლეობა პოლიტიკური ზეწოლისგან გავათავისუფლოთ, თავისუფლად ფიქრისა და აზროვნების საშუალება მივცეთ. საარჩევნო კამპანიის დროს, მოსახლეობასთან შეხვედრების შედეგად დავრწმუნდი, რომ ქართველი ხალხი დათრგუნვილი იყო და სამართლიანობის განცდა არ ჰქონდა... მადლობა ღმერთს, რომ უზარმაზარი ზეწოლის მიუხედავად, სამოქალაქო საზოგადოებამ სიტუაცია სწორად გააანალიზა და შიშველი ხელებით შეებრძოლა უზარმაზარ მონსტრს. შეიძლება ბევრს ვერც კი წარმოუდგენია, რამხელა რესურსისა და ძალის მფლობელი იყო სააკაშვილის რეჟიმი და რაზე იყო წამსვლელი. ადამიანები ცალსახად ამბობდნენ, რომ თუ სააკაშვილის რეჟიმი არ შეიცვლებოდა, ქვეყანას დატოვებდნენ. ამით ხომ ყველაფერია ნათქვამი? ახლა ადამიანებს უკეთესი ცხოვრების იმედი გაუჩნდათ, მაგრამ მაინც ვფიქრობ, რომ 9 წლის განმავლობაში ხელისუფლების ტერორის ქვეშ მცხოვრებ ადამიანებთან ეკონომიკურ კეთილდღეობასა და ბიზნესის განვითარებაზე საუბარი ნაადრევია. ქვეყნის მართვა სამართლის აღდგენით უნდა დავიწყოთ. ჩვენი კეთილსინდისიერებით, სამართლიანობის პრინციპებისადმი ერთგულებითა და შრომით მოსახლეობას მაგალითი უნდა მივცეთ.

- უმუშევრობის პრობლემის მოგვარება და ეკონომიკური განვითარების უზრუნველყოფა როგორ გესახებათ?

გიგი წერეთელი:

- უმუშევრობის შემცირება ჩვენი ერთ-ერთი პრიორიტეტი იყო. ქვეყნის ბიუჯეტი 2003 წლის შემდეგ ოცჯერ არის გაზრდილი. ეკონომიკის განვითარება, ჩვენ მიერ განხორციელებული უამრავი ინფრასტრუქტურული პროექტი კერძო სექტორში ადამიანების დასაქმებას ხელს უწყობდა. თუმცა, ეს საკმარისი არ აღმოჩნდა, უმუშევრობის დონე ჯერ კიდევ მაღალია. ახალი სამუშაო ადგილების შესაქმნელად საჭიროა ბიზსნესგარემოს შექმნა და ახალი ინვესტიციები. ჩვენ ყველა პირობა შევქმენით იმისთვის, რომ ინვესტორების მიერ საქართველოსადმი ინტერესი მაქსიმალურად გაზრდილიყო, ახლა ჯერი ახალ ხელისუფლებაზეა. რამდენიმე დღის წინ ხელისუფლების ერთ-ერთ წარმომადგენელს ვუსმენდი, რომელიც ამბობდა, რომ 2003 წელს სახელმწიფო სექტორში მოსახლეობის 70% ფორმალურად იყო დასაქმებული და მათ 20, 30-ლარიანი ხელფასები ჰქონდათ. ასეთი რამე აღარ უნდა მოხდეს, საზოგადოებას რეალური სამუშაო ადგილები, რეალური შემოსავლები და რეალური ხელფასები სჭირდება.

ირაკლი სესიაშვილი:

- ჩემი აზრით, უმუშევრობის პრობლემის დაძლევა იმ დღიდანვე დაიწყება, როგორც კი ქვეყანაში სამართლიანი გარემო შეიქმნება და ბიზნესი პოლიტიკური ზეწოლისგან გათავისუფლდება. ინვესტორიც და ადგილობრივი მეწარმეც გაცილებით მეტ პროდუქციას შექმნის და მეტ ადამიანს დაასაქმებს თუ ეცოდინება, რომ უსამართლოდ არავინ მოექცევა, წილში არავინ ჩაუჯდება, ერთ დღესაც უსაფუძვლოდ არავინ დააპატიმრებს და საპროცესო გარიგების საშუალებით ფულს არ წაართმევს. ჩვენ მზად ვართ იმისთვის, რომ ბიზნესი სახელმწიფო რეკეტისგან გავათავისუფლოთ. ბატონმა ბიძინამ ბრძანა კიდეც, - ჩვენ არ უნდა გვქონდეს ახლო მჭიდრო ურთიერთობა ბიზნესმენებთან, მათ თავისუფალი გარემოს პირობებში უნდა შექმნან და დაარეგულირონ ბაზარიო. უმუშევრობის პრობლემის მოსაგვარებლად ასევე ძალიან მნიშვნელოვანია სოფლის მეურნეობაში ინვესტიციის ჩადებაც, რისი პირობაც ბატონმა ბიძინამ უკვე მისცა მოსახლეობას.

- სასამართლო სისტემის რეალურ დამოუკიდებლობას როგორ შეიძლება მივაღწიოთ?

გიგი წერეთელი:

- სასამართლო სისტემის რეალური დამოუკიდებლობისთვის რამდენიმე კომპონენტი არსებობს, უპირველესი სასამართლოს საქმიანობაში ჩაურევლობაა. ჩვენ ამ მიმართულებით ძალიან მკაცრი წესები დავადგინეთ, სისხლის სამართლის პასუხისმგებლობა დავაკისრეთ თანამდებობის პირს, რომელიც სასამართლოს საქმიანობაში ჩარევას მოინდომებს, ან სხვა რაიმე ფორმით ზეწოლას განახორციელებს. ეს კანონით არის გარანიტრებული.

ირაკლი სესიაშვილი:

- ეს ალბათ ყველაზე რთული საკითხია. თუმცა მთავარი მაინც პოლიტიკური ნებაა. ჩემი აზრით, შესაძლებელია იმ გზებისა და მეთოდების გამონახვა, რის შედეგადაც დამოუკიდებელ სასამართლო ხელისუფლებას მივიღებთ. ამას დრო დასჭირდება, მთავარია, რომ პირველი დღიდანვე, სწორი მიმართულება ავიღოთ.

- ჯარისა და პოლიციის პოლიტიზება როგორ უნდა ავიცილოთ თავიდან?

გიგი წერეთელი:

- ჩვენ ვერ დავიწყებთ იმის ანალიზს, თუ როგორ მოაგვარებს მსგავს პრობლემებს ახალი ხელისუფლება. რაც ყველაზე მნიშვნელოვანია, მათ არ ექნებათ თავსატეხი ბიუჯეტთან დაკავშირებით. საკმაოდ კარგი სასტარტო პირობები აქვთ. დანარჩენზე თავად იფიქრონ. თუ რაიმე კარგ გადაწყვეტილებას მიიღებენ, ჩვენ ხელს არ შევუშლით, ზოგჯერ მხარსაც კი დავუჭერთ, თუ არასწორად მოიქცევიან და ჩვენ მიერ არჩეულ საშინაო თუ საგარეო პრიორიტებებს გადაუხვევენ, მაშინ ხმას ამოვიღებთ, როგორც ოპოზიციური ძალა, ჩვენს ხელთ არსებულ პოლიტიკურ ბერკეტებს რეალურად გამოვიყენებთ.

ირაკლი სესიაშვილი:

- ვერავინ უარყოფს, რომ ეს ორი სექტორი მთლიანად ჩართული იყო წინასაარჩევნო პროცესში, - მმართველ ძალას მხარს უჭერდა და "ქართული ოცნების" წინააღმდეგ მოქმედებდა. სოდ-ი და კუდ-ი მთლიანად ჩვენი აქტივისტების დევნაზე იყო გადართული. მათ "ქართული ოცნების" რამდენიმე ასეული წევრი (ერთი დღის განმავლობაში 60 ადამიანი) დაიჭირეს. მსგავსი სიტუაცია აღარ უნდა განმეორდეს. ჩვენი პოლიტიკური ნებაა, რომ ამ ორი ძალიან მნიშვნელოვანი უწყების დეპოლიტიზება მოვახდინოთ და სამოქალაქო კონტროლის ქვეშ მოვაქციოთ. ამისთვის საჭიროა, შესაბამისი ინსტიტუციების შემუშავება და ძალოვან უწყებებში რეფორმების გატარება.

- ყველანი კმაყოფილები ვართ იმ ფაქტით, რომ ქვეყანაში კრიმინოგენული სიტუაცია გაუმჯობესებულია, მაგრამ არ მოგვწონს კრიმინალებთან ბრძოლის უკანონო მეთოდები. თქვენ რას ფიქრობთ, რა ფორმით უნდა ვებრძოლოთ დამნაშავეობას ისე, რომ დემოკრატიული პრინციპები არ დავარღვიოთ?

გიგი წერეთელი:

- ვერავინ უარყოფს, რომ საქართველოში წლების განმავლობაში ძალიან კარგად და ეფექტიანად მიმდინარეობდა ორგანიზებული დანაშაულის წინააღმდეგ ბრძოლა. ამის შემსწრე ძალიან ბევრი ადამიანია. ყველანაირად უნდა ვეცადოთ შევინარჩუნოთ მაინც დღეს არსებული სიტუაცია. ჩვენს მოსახლეობას ისევ უნდა მივცეთ უსაფრთხოების გარანტია, მაგრამ ამავე დროს, უნდა ვეცადოთ, რომ ადამიანების, თუნდაც კრიმინალების უფლებების დარღვევის თვალსაზრისით შეცდომები აღარ დავუშვათ. ამის გასაკეთებლად საკმაოდ კარგი სასტარტო პირობებია, შექმნილია მთელი რიგი არასამთავრობო ინსტიტუტები, რომლებიც ჩვენი მმართველობის პირობებში საკმაოდ გაძლიერდნენ. 2003 წლიდან ასევე შესამჩნევად გაძლიერდა სამოქალაქო საზოგადოება, სახალხო დამცველის ინსტიტუტი და ა.შ.

ირაკლი სესიაშვილი:

- სააკაშვილის რეჟიმს დანაშულის 50% აღიარებითი ჩვენებების საფუძველზე აქვს გახსნილი. აღიარებით ჩვენებას კი ძირითადად წამების, მუქარისა და შანტაჟის საშუალებით იღებენ. თუ ამ მეთოდებს დავტოვებთ, ისეთივე მოძალადეებად ჩამოვყალიბდებით, როგორიც ჩვენი ოპონენტები არიან. ჩვენ დანაშაულის გახსნა და დამნაშავეების გამოვლენა ცივილიზებული მეთოდებით უნდა მოვახერხოთ. სააკაშვილმა კრიმინალები დაამარცხა, მაგრამ მათი ადგილი თავად დაიკავა. ჩვენ კრიმინალებს რეალურ ბრძოლას გამოვუცხადებთ, კანონმდებლობის ფარგლებში, ადამიანის უფლებების სრული დაცვით. მკვლელებს, მოძალადეებსა და ნარკოდილერებს ჩვენც ნულოვან ტოლერანტობას გამოვუცხადებთ, მაგრამ მსუბუქი დანაშაულისთვის ადეკვატურ სასჯელებს გამოვიყენებთ. როგორც პატრიარქმა ბრძანა, ქართველები ცოტანი ვართ და ამდენი ადამიანის ციხეში ჩასმით დემოგრაფიულ პრობლემას კიდევ უფრო გავაუარესებთ.

- რუსეთთან დიალოგის გზით ჩვენს ქვეყანაში არსებული კონფლიქტების მოგვარება რამდენად შესაძლებლად მიგაჩნიათ?

გიგი წერეთელი:

- 2008 წლის აგვისტოს ომის შემდეგ არაერთხელ განვაცხადეთ, რომ კონფლიქტების მოგვარების მხოლოდ მშვიდობიან გზას ვირჩევთ. ამას ვამბობდით ომამდეც, მაგრამ ჩვენს მშვიდობიან ინიციატივებს მუდმივად უარყოფდნენ. დიალოგს წინ არაფერი უდგას, მაგრამ არ შეიძლება, რომ ის უპირობო იყოს. ჩვენი ქვეყნის მთავარი პრინციპი ქვეყნის სუვერენიტეტი და დამოუკიდებლობაა. იმ მოთხოვნების ლეგიტიმაციას, რომელსაც ჩვენ ვუყენებთ რუსეთს, პრაქტიკულად მთელი მსოფლიო აღიარებს. რას მოვითხოვთ? ჩვენი ტერიტორიების დეოკუპაციას და დევნილების ღირსეულ დაბრუნებას. დეოკუპაციაში რუსეთის მიერ 2008 წლის აგვისტოს ომის დროს მიტაცებული ტერიტორიების დაბრუნებასთან ერთად მოსკოვისგან იმასაც მოვითხოვთ, რომ სეპარატისტული რეჟიმების დამოუკიდებლობა აღარ აღიაროს. ჩემი აზრით, მხოლოდ ამ პირობების შესრულების შემდეგ შეიძლება რუსეთთან მოლაპარაკების დაწყება. რუსეთთან ურთიერთობის დალაგება ჩვენი ქვეყნის სუვერენიტეტის შელახვის ხარჯზე ღალატის ტოლფასად მიმაჩნია.

ირაკლი სესიაშვილი:

- ჩვენი ქვეყნის სუვერენიტეტის შელახვისა და ტერიტორიების დათმობის ხარჯზე რუსეთთან ურთიერთობის დალაგებას არავინ აპირებს. ახლა ჩვენი უპირველესი ამოცანაა, რომ დეოკუპაციის საკითხი, წინა ხელისუფლებისგან განსხვავებით რეალურად მოვაგვაროთ. რას ვგულისხმობ? იმას, რომ ამ პრობლემის მოგვარებაზე სააკაშვილის ხელისუფლებაც ლაპარაკობდა, მაგრამ რეალურად არაფერს აკეთებდა და სრულიად არაადეკვატურად იქცეოდა, ის თავადვე ხერგავდა კონფლიქტების მოგვარების გზებს. ჩვენი მიზანია საერთაშორისო მხარდაჭერის შედეგად პოზიციების გაძლიერება და ამის პარალელურად რუსეთთან დიალოგის წარმოება. დიალოგი აუცილებლად შედეგზე იქნება ორიენტირებული და არა პიარზე. დეოკუპაცია ჩვენთვის მხოლოდ იმას არ ნიშნავს, რომ რუსები გავიდნენ ჩვენი ტერიტორიიდან, აუცილებლად უნდა მოვაგვაროთ ურთიერთობა ჩვენს თანამემამულე აფხაზებთან და ოსებთან.

- საზოგადოების პოლარიზაცია სხვადასხვა სფეროს წარმომადგენელთა ურთიერთდაპირისპირებას იწვევს. რით შეგვიძლია შევარბილოთ ეს მდგომარეობა?

გიგი წერეთელი:

- ბოლო პერიოდი მართლაც საკმაოდ მაღალი პოლარიზაციით გამოირჩეოდა. ჩვენ მაქსიმლურად ვცდილობთ, რომ სიტუაცია შევარბილოთ. ახალ ხელისუფლებას მოვუწოდებ, ნუ ვიქნებით ორიენტირებულები პოლიტიკურ დევნასა და ანგარიშსწორებაზე. დემოკრატიული ქვეყნის იმიჯს მხოლოდ მოლაპარაკების, ურთიერთთანამშრომლობისა და კონსტრუქციულობის გამოჩენით მოვახერხებთ.

ირაკლი სესიაშვილი:

- საზოგადოების ურთიერთდაპირისპირება გარდამავალ პერიოდში ჩვეულებრივი მოვლენაა. ახლა მთავარია ხალხმა დაინახოს, რომ ახალი ხელისუფლება მხოლოდ მას ემსახურება და დემოკრატიული სახელმწიფოს შექმნას ცდილობს. ეს თავისთავად გამოიწვევს პოლიტიკური ტემპერატურის დაწევას და მდგომარეობის შერბილებას.

ხათუნა ბახტურიძე

ჟურნალი "გზა"

(გამოდის ხუთშაბათობით)

LIVE: გია ხუხაშვილი "ნიუსრუმიდან"

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა