ნინო გვასალიას ლამის მთელი საქართველო ეძებს - მასზე ყველა ლაპარაკობს, მის ფოტოებს ყველგან შენიშნავთ, მის ამბავს ყველგან მოისმენთ და წაიკითხავთ. ვინ არის და როგორია 22 წლის ლამაზი გოგონა, შინიდან გაქცევით მკაცრი განაჩენი რომ გამოუტანა ოჯახსა და ახლობლებს, და... საკუთარ თავსაც. ნინოზე საუბარი მის უახლოეს მეგობარს, ირინა გელაშვილს ვთხოვე:
- მე და ნინო ორი წლიდან ვმეგობრობთ, ერთად გავიზარდეთ. ვფიქრობ, მართლა შესანიშნავად ვიცნობ. პატარაობისას ძალიან მხიარული და აქტიური იყო, ძალიან განვითარებული და საოცრად სხარტად მოაზროვნე. მერე ოჯახში პრობლემები გაჩნდა და საკუთარ თავში ჩაიკეტა. რაღაც ხნის შემდეგ ისევ "გაიხსნა", მაგრამ უშუალო და გულახდილი მხოლოდ რამდენიმე ადამიანთან იყო. თუ ვინმე არ მოსწონდა, მასთან არც ურთიერთობდა. ჩემთან ყოველთვის გულახდილი იყო, გულწრფელი. სულ რამდენიმე, თითზე ჩამოსათვლელი მეგობარი ვყავდით...
- ბოლოხანს უცნაურს, უჩვეულოს ვერაფერს ატყობდი?
- უჩვეულო არაფერი მომხდარა. ამ ადამიანს განსაკუთრებული იუმორის გრძნობა აქვს და ცუდ გუნებაზეც რომ იყოს, მაინც ვერ შეამჩნევ. ორი თვის განმავლობაში შინ იჯდა, გარეთ არ გამოდიოდა, მხოლოდ 10-10 წუთით ძაღლი გაჰყავდა სასეირნოდ - ფაქტია, ასეთ რამეზე რომ წავიდა, რაღაც უჭირდა, ფსიქოლოგიურად ცუდად იყო, მაგრამ დედამაც კი ვერ შეატყო ეს. ნინოს დედა - ლალი პარლამენტში მუშაობს და ბოლო ერთი წლის განმავლობაში, რაც ის უმეტესწილად ქუთაისში იყო, ნინო შინ არჩევდა ყოფნას. ხშირად ვაკითხავდი ხოლმე, ბევრს ვსაუბრობდით, მაგრამ განსაკუთრებული მართლა არაფერი შემინიშნავს, არც შინიდან გაქცევაზე უთქვამს რაიმე და არც შესაძლო თვითმკვლელობაზე მიუნიშნებია. ძირითადად, ლიტერატურაზე ვლაპარაკობდით ხოლმე, რომელიმე ნაწარმოებს განვიხილავდით. გიჟდება დოსტოევსკიზე და მისი ნაწარმოებების კითხვა დაუსრულებლად შეუძლია.
- დოსტოევსკი საკმაოდ ღრმა და მძიმედ საკითხავი მწერალია. 22 წლის ახალგაზრდის მისით ასეთი გატაცება უჩვეულო არ იყო?
- რატომ? როდესაც ადამიანი საინტერესოდ აზროვნებს, არა მგონია, დოსტოევსკი რაიმეს უშავებდეს მას. საერთოდ, ნინოს ფილოსოფიური წიგნების კითხვა უყვარს და ძალიან აინტერესებს ფსიქოლოგია.
- რას ფიქრობ, მაინც რატომ უნდა გაქცეულიყო შინიდან?
- არ ვიცი... ალბათ რაღაცამ მიიყვანა ამ ნაბიჯამდე... რაღაცამ, რაც მასში ხდება და მხოლოდ მისია... ამიტომ ჩემს მოსაზრებებზე რა უნდა ვთქვა... აშკარაა, რაღაც უჭირდა.
- ძმას რომ უთხრა თვითმკვლელობაზე, მან მაშინვე რატომ არ გაახმაურა? წერილიც ხომ დატოვა ოჯახში?
- ძმა არაფერს იტყოდა, რადგან ისეთი ცინიზმით და იუმორით უთქვამს, ის კი არა, მეც ვერ აღვიქვამდი სერიოზულად ამ ნათქვამს. წარმოიდგიენთ, უცებ ხუმრობით რომ გითხრათ ახლობელმა, ახლა ავდგები, თავს მოვიკლავ და ჩემს ცხედარსაც ვერ იპოვითო, დაიჯერებთ? ნინოს ძმასაც არ მიუნიჭებია მისი სიტყვებისთვის მნიშვნელობა. მოგვიანებით კი წერილიც ნახეს - ნინოს საწერ მაგიდაზე ამობეჭდილი ნახატი იდო და თავიდან არც მიუქცევიათ მისთვის ყურადღება...
- ნინო მორწმუნე იყო?
- ადრე - კი, ეკლესიაშიც დადიოდა. მერე, ოჯახში პრობლემები რომ გაჩნდა, ღმერთს ზურგი აქცია. ათეისტი გახდა. ფიქრობდა, ღმერთი არაფერს შველის ადამიანს და მის არსებობას რა მნიშვნელობა აქვსო... ისე კი, ღვთის უარყოფაში დოსტოევსკიც ძალიან დაეხმარა. საკუთარი თავისუფლებაც დოსტოევსკის ნაწარმოებებში იპოვა და აზრების ჩამოყალიბებასა და გამყარებაშიც ის დაეხმარა... სავარაუდოდ, ისეთ რამეებსაც "ეუბნებოდა" მწერალი, რაც მანამდე არ უფიქრია და მერე იფიქრა...
- ირინა, შეძლებდა ნინო თავის მოკვლას?
- მგონია და ვგრძნობ, რომ ცოცხალია და სადღაც იმალება.
- ვიდეოკამერებმა რომ ვერ დააფიქსირეს? ან ჩანთიდან თოკი რომ ამოუვარდა ქუჩაში, ის თოკი რისთვის შეიძლებოდა დასჭირვებოდა?
- სავარაუდოდ, ისეთი გზით გავიდა, კამერებს რომ არ დაეფიქსირებინა და ვერავის ეპოვა. აბა, რატომ მოიქცეოდა ასე? ადამიანი ამდენს რომ გათვლის, ვერავინ მიპოვოსო, ის თავის მოსაკლავად არ მიდის. ის უბრალოდ გადაიკარგა. რაც შეეხება თოკს, ვერსიები თითქმის არ მაქვს, თუმცა... თოკით შეიძლება ისევ დოსტოევსკისთან მივიდეთ. მას ხომ აქვს სიუჟეტი, როდესაც ადამიანი თოკით იხრჩობს თავს. ნინომაც იქნებ მწერლის გავლენით წაიღო თოკი, მაგრამ თავის მოკვლა გადაიფიქრა?
ირმა ხარშილაძე
ყოველკვირეული გაზეთი "ყველა სიახლე"
(გამოდის ოთხშაბათობით)
ასევე იხილეთ: "დააკაკუნოს კარზე, შემოვიდეს" - 22 წლის ნინო გვასალიას ოჯახი უშედეგოდ ეძებს