შენ მშვიდად ჯდები შენს კუთვნილ კომპიუტერთან და სხვადასხვა საიტს ათვალიერებ, ამ დროს კი წარმოდგენა არ გაქვს, რომ გითვალთვალებენ. სოციალური ქსელის, ელექტრონული ფოსტის ან პერსონალური კომპიუტერის გატეხა - ეს მხოლოდ მცირე ჩამონათვალია იმ ოპერაციებიდან, რასაც ისინი უბადლოდ ასრულებენ. მათ ე.წ. ჰაკერები ჰქვიათ. მათი ქმედება დანაშაულია, თანაც ხშირ შემთხვევაში იმაზე მძიმე, ვიდრე სხვა.
"ჰაკერი" ინგლისურად გაპობას, გატეხას ნიშნავს. ჰაკერებს კომპიუტერული პროგრამისტების განსაკუთრებულ ჯგუფს უწოდებენ. პირველად ეს ტერმინი 60-იან წლებში დამკვიდრდა. არსებობს შავი, თეთრი, ლურჯი და ნაცრისფერი ჰაკერების ჯგუფები. ჩამონათვალიდან ყველაზე საშიში მაინც შავი ჰაკერია. ეს არის ადამიანი, რომელიც ამხობს კომპიუტერულ უსაფრთხოებას და ინტერნეტტექნოლოგიებს ტერორიზმის, ვანდალიზმის, ქურდობისა და სხვა კრიმინალისთვის იყენებს. ის ყველაზე ინტელექტუალად ითვლება ჰაკერთა წრეში. შედარებით "კეთილია" თეთრი ჰაკერი, რომელიც არ იყენებს თავის ნიჭს კრიმინალისთვის. ისინი ძირითადად პროგრამულ უსაფრთხოებაში გვხვდებიან. ჰაკერი, სულ ცოტა, ორ პროგრამირების ენას უნდა ფლობდეს, ერკვეოდეს ქსელში და იყენებდეს ძლიერ ოპერაციულ სისტემებს.
ამ მხრივ საქართველოში გამორჩეული ვასილ ჯამალაშვილია. ახალგაზრდა ვასილს შეიძლება პირველი ქართველი ჰაკერი ვუწოდოთ, რომელმაც შეძლო ვირუსული პროგრამის შექმნა, რომლის დახმარებით დაინტერესებულ პირს შეეძლო შეეღწია ნებისმიერ კომპიუტერში და მოეპოვებინა მისთვის საჭირო ინფორმაცია. ამასთანავე, შეეძლო მოესმინა თქვენი საუბრებისთვისაც. ვასილს ასე ახასიათებდნენ: მას არ ჰყავს მეგობრები, 13 წლიდან კომპიუტერში ცხოვრობს, არ აინტერესებს სხვა გარემოფაქტორები, იცის მხოლოდ ინტერნეტსამყარო და თანაც საკმაოდ მაღალ დონეზე. იმდენად კარგად, რომ 18 წლის ასაკში უკვე შსს-ს მაღალჩინოსანი გახდა.
მისი ნაცნობების დიდმა ნაწილმა მხოლოდ დაკავების შემდეგ გაიგო, რომ იგი კუდ-ის მეოთხე სამმართველოს უფროსის მოადგილედ მუშაობდა.
კომპიუტერული "გენიოსები" ხშირ შემთხვევებში საკუთარი ვინაობის გამხელას გაურბიან. ჩვენი რესპონდენტიც ე.წ. ჰაკერია. 21 წლის ლაშა ამბობს, რომ ჯერ კიდევ ბავშვობიდან შეეძლო მთელი დღეები კომპიუტერთან გაეტარებინა:
- შემიძლია სოციალური ქსელების, მაილის, სკაიპის გატეხა, სხვის კომპიუტერში შესვლა, მაგრამ ამ საქმიანობას "ბოროტად" არ ვიყენებ. ხშირად ჩემს მეგობრებს უთხოვიათ ვინმეს კომპიუტერის გატეხა, მისი პირადი ინფორმაციის ნახვა, თუმცა ასეთ რამეს არასოდეს ვთანხმდები.
- ე.ი. მეგობრები შენს საქმიანობაში გარკვეული არიან?
- ვცდილობ, ამაზე ხმამაღლა არ ვილაპარაკო, გვარის დაკონკრეტებისგანაც ამიტომ ვიკავებ თავს. მყავს პატარა სანაცნობო წრე, ვინც ჩემი მომსახურებით სარგებლობს და ამაში ანაზღურებასაც ვიღებ.
- უფრო მეტად რა სახის მომსახურება სურთ?
- საკმაოდ ხშირად მთხოვენ პირადი კომპიუტერების გატეხას, ბოლო პერიოდში "ფეისბუქის" გატეხაც ხშირად მიწევს. მიზეზები ათასგვარია, თუმცა ეს მე არ მეხება - კომპიუტერი და ინტერნეტი სრულიად ცალკე სამყაროა. მე მიყვარს ეს სამყარო და მის ბინადრად ვგრძნობ თავს. მე თვითონ არც ერთ სოციალურ ქსელში არ ვარ დარეგისტრირებული, ამ სამყაროში ყოფნის სხვა მეთოდები მაქვს.
ქეთი საგინაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)