უკრაინაში მიმდინარე რთულ და დაძაბულ პროცესებზე, რომელიც მსოფლიოს ყურადღების ცენტრშია, ჟურნალისტი, უკრაინის რადის ყოფილი დეპუტატი ოლგა გერასიმუკი გვესაუბრება.
- კიევში განვითარებული დრამატული მოვლენები, არეულობა იმის შედეგია, რომ ხელისუფლებას არ უნდა ხალხის ნებას, მოთხოვნებს დაჰყვეს. 2-თვიანი უპრეცედენტო პროტესტის მიუხედავად, არ განიხილავს მას დიალოგის მხარედ. აშკარაა, რომ უკრაინელი საზოგადოების უდიდეს ნაწილს თავისი ხედვა აქვს, საით და რა გზით უნდა წავიდეს ქვეყანა, ხელისუფლება კი კომპრომისის ნაცვლად დაშინების, დასჯის ახალ-ახალ მეთოდებს მიმართავს; ბოლო წვეთად კი მანიფესტაციების ჩატარების წესზე დიქტატორული კანონის მიღება და მასზე იანუკოვიჩის ხელმოწერა იქცა; ამის შემდეგ კი მაიდანზე გამართულ სახალხო კრებაზე, ვეჩეზე, ოპოზიციის ლიდერებმა შეკრებილებს მოქმედების კონკრეტული გეგმა ვერ შესთავაზეს და სიტუაციის მართვა რადიკალებმა იწყეს; ხალხი გულგატეხილია ოპოზიციის ლიდერების უნებისყოფობით, გამოჩნდა, რომ მათ მოქმედების სტრატეგია არ აქვთ; როცა მანიფესტანტებმა ოპოზიციას ერთიანი საპრეზიდენტო კანდიდატის, წინააღმდეგობის მოძრაობის საერთო ლიდერის წარდგენა მოსთხოვეს, ფრაქცია "ბატკივშინას" თავმჯდომარე არსენ იაცენიუკმა განაცხადა, რომ "ეს წარმომადგენელი უკრაინელი ხალხია", ხალხი მიხვდა, რომ მათ შორის ერთიანობა არ არის, პოლიტიკოსებმა კიევის ქუჩებში ნახევარი მილიონი ადამიანის გამოსვლა თავიანთი პოზიციის გასამყარებლად გამოყენებაც ვერ შეძლეს, ფაქტობრივად, თავიანთ წინასაარჩევნო კამპანიას აგრძელებენ. ამასობაში გამოიკვეთა, რომ ვიტალი კლიჩკო, შესაძლოა, ვერ დარეგისტრირდეს, როგორც საპრეზიდენტო კანდიდატი, რადგან ბოლო 10 წლის განმავლობაში უკრაინაში არ ცხოვრობდა. ამჟამად მდგომარეობა კიევში კვლავ დაძაბული და სახიფათოა, ქუჩებში ლოკალური შეტაკებები გრძელდება (ინტერვიუ ჩაწერილია 21 იანვარს), სულ უფრო ხშირად საუბრობენ იმაზე, რომ ოპოზიციის ლიდერი შესაძლოა, იყოს საზოგადოების წარმომადგენელი, რომელმაც თავი უკეთ წარმოაჩინა, ვიდრე პოლიტიკოსებმა. გამოჩნდა, რომ ხალხი, საზოგადოება პოლიტიკოსებზე ძლიერია. ამ წელს იმდენი ჟურნალისტი სცემეს პროფესიული მოვალეობის შესრულებისას, რამდენიც არასდროს..
- როგორ აფასებთ დასავლეთის დამოკიდებულებას უკრაინაში მიმდინარე პროცესებისადმი?
- რამდენიმე დღეში ევროსაბჭოს საპარლამენტო ასამბლეის სესიისთვის ვემზადებით, ვიმედოვნებთ, იქ ჩვენთან განვითარებულ მოვლენებზე მკაცრ რეზოლუციას მიიღებენ, ევროპა მიდგომას შეიცვლის და არა მხოლოდ დაგმობს, გაკიცხავს უკრაინის ხელისუფლებას, არამედ უფრო მკვეთრ ნაბიჯებს გადადგამს, რაზედაც ხშირად ვესაუბრებით ევროპელ პარტნიორებს. მიმდინარე პროცესები კიდევ ერთხელ ცხადყოფს, რომ უკრაინა რუსეთი არ არის და სცენარი, რომელიც რუსეთში მზადდება, აქ სამართლიან პროტესტს და დაპირისპირებას იწვევს, ჩვენ უკვე შევიგრძენით თავისუფლების გემო; პრეზიდენტი იანუკოვიჩი კი თავის ხალხს არ იცნობს, ვერ ხვდება, რომ ზეწოლა პროტესტს უფრო აძლიერებს. თუ ასე გაგრძელდა, უკრაინა შეიძლება დაანაწევრონ, დაშალონ.
- თქვენი აზრით, ხელისუფლების მიერ ოპოზიციისთვის შეთავაზებული დიალოგი თუ გამოიღებს შედეგს?
- ამ მოლაპარაკების შეთავაზება, დაწყება, დიდწილად განაპირობა ამერიკის შეერთებული შტატების ხისტმა პოზიციამ, თუმცა, თუნდაც ის, რომ იანუკოვიჩმა მთავარ მომლაპარაკებლად ეროვნული უშიშროების საბჭოს მდივანი კლუევი დანიშნა, რომელიც დემონსტრაციის დარბევაშია ეჭვმიტანილი, მაფიქრებინებს, რომ დიალოგი უშედეგო აღმოჩნდება; იანუკოვიჩი ვადამდე საპრეზიდენტო და საპარლამენტო არჩევნების ჩატარებას არასდროს დათანხმდება და ეს გასაგებიცაა - ასეთია კრემლში მისი პატრონის ნება.
ნინო კვიტაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)