გიორგი კანდელაკი - სააკაშვილის წინააღმდეგ დევნის დაწყება ნიშნავს, რომ შეკვეთა მომდინარეობს კრემლიდან

მიხეილ საკააშვილმა, როგორც მსოფლიო დონის ლიდერმა, დრო არ უნდა დაკარგოს ამ ტაკიმასხარაობაში მონაწილეობაზე, -ამის შესახებ "ინტერპრესნიუსს" "ნაციონალური მოძრაობის" ერთ-ერთმა ლიდერმა გიორგი კანდელაკმა განუცხადა.

კანდელაკის თქმით, მიხეილ სააკაშვილის მიმართ დევნის დაწყება ნიშნავს, რომ ხელისუფლება საქართველოს ინტერესების წინააღმდეგ მუშაობს და დაკავებულია რუსეთის ინტერესების გატარებით.

"მიხეილ საკაშვილმა როგორც მსოფლიო დონის ლიდერმა დრო არ უნდა დაკარგოს ამ ტაკიმასხარაობაში მონაწილეობაზე და უნდა გააგრძელოს ის, რისთვისაც სურს მისი დევნა ვლადიმერ პუტინს, ანუ საქართველოს და უკრაინის თავისუფლების წინ წაწევა საერთაშოროსო ასპარეზზე და საერთაშორისო საზოგადოების ყურადღების მობილიზაცია იმისათვის, რომ რუსეთი დაისაჯოს.

ჩვენ კიდევ იმედი გვქონდა, რომ ეს ხელისუფლება ბოლომდე პუტინის ჯიბეში არ იჯდა. სააკაშვილი წარმატებულად არის დაკავებული საერთაშორისო ყურადღების მობილიზაციით უკრაინის და მაშასადამე, საქართველოს სუვერენიტეტის დასაცავად. ამ მომენტში, მიხეილ სააკაშვილის წინააღმდეგ დევნის დაწყება ნიშნავს, რომ ეს სურვილი, შეკვეთა მომდინარეობს კრემლიდან", - განაცხადა კანდელაკმა.

საქართველოს ყოფილი პრეზიდენტი მიხეილ სააკაშვილი 27 მარტს, 13:00 საათზე, საქართველოს მთავარ პროკურატურაში მოწმის სახით დასაკითხად არის დაბარებული.

"ინტერპრესნიუსი"