"არ ვფიქრობ ხოლმე ავიღებ თუ არა ჯილდოს იმაში, რასაც ვაკეთებ" - ია სუხიტაშვილის კომენტარი სან-სებასტიანის კინოფესტივალზე გამარჯვების შემდეგ

მსახიობი ია სუხიტაშვილი სან-სებასტიანის საერთაშორის კინოფესტივალზე საუკეთესო ქალი მსახიობის ჯილდოს მფლობელი გახდა ფილმ "დასაწყისში“ შესრულებული მთავარი როლისთვის.

აღსანიშნავია, რომ აღნიშნულმა ფილმმა 4 კატეგორიაში მოიპოვა გამარჯვება (გაეცანით დეტალებს).

გამარჯვების შემდეგ ია სუხიტაშვილი ტელეკომპანია "ფორმულასთან“ ამბობს, იშვიათად მომხდარა მაღალი დონის კინოფესტივალზე ისეთი ფაქტი, რომ ერთ ფილმს ამდენი ჯილდო მიეღოს.

"რეალურად, არ ვფიქრობ ხოლმე ავიღებ თუ არა ჯილდოს იმაში, რასაც ვაკეთებ. თუ დავიწყებთ იქიდან, თუ რა პროცესი გაიარა ამ ფილმმა კეთების დროს, რამხელა მოსამზადებელი პერიოდი ჰქონდა, რა თქმა უნდა, მოლოდინები იყო, რომ ეს ფილმი თავის გზას დაადგებოდა.

ასეთი რამ, რომ ოთხი ნომინაცია წაიღოს ფილმმა სან სებასტიანის ფესტივალიდან და ასეთი "ჰაი კლასის“კინოფესტივალიდან, ძალიან იშვიათად მომხდარა.

კონკურენციას გვიწევდნენ ნაომი კავასეს ფილმი, თვითონ როგორც რეჟისორიც წარდგენილი იყო, ტომას ვიტერბერგი, ფრანსუა ოზონი და ა.შ. ჯერ მარტო ამ სამი ადამიანის სახელი და გვარი და რავიცი, ძალიან მაგარი დასაწყისია“, - ამბობს ია სუხიტაშვილი.