"გამქრალი გოგონები" ჩეჩნეთში: "ყოფილა შემთხვევა, როდესაც მამამ ქალიშვილი მოგუდა და მისი ცხედარი მოიშორა..."
გეების გახმაურებული საქმის შემდეგ, ჩეჩნეთში სექსუალური უმცირესობის წარმომადგენელი ქალების შევიწროება იწყება... ადგილობრივი მედიის ინფორმაციით, ლესბოსელი ქალებიც იგივე, ან ზოგ შემთხვევაში, უფრო მძიმე ზეწოლას განიცდიან, ვიდრე გეები, რადგან ქალის უფლებები იქ ისედაც დაუცველია...
"რადიო თავისუფლების" ადგილობრივი სამსახურის ინფორმაციით, მიმდინარე წლის ივლისში 22 წლის გოგონამ სცადა სახლიდან გაქცევა - ის ჯერ მოსკოვში წასვლას აპირებდა, სადაც ელოდებოდნენ კიდეც. როგორც კი სახლში მარტო დარჩა, ოჯახის წევრებისთვის წერილი დატოვა, რომ ასე ცხოვრება აღარ შეეძლო და ტაქსიში ჩაჯდა... გზიდან მეგობარ გოგონას დაურეკა და თავისი გადაწყვეტილების შესახებ უამბო...
ტაქსის მძღოლი მიხვდა, რომ შესაძლო იყო ამის გამო ძალიან დიდი პრობლემები შექმნოდა, რადგან მან არ იცოდა, რის გამო გარბოდა სახლიდან გოგონა. ადგილობრივი მენტალობის გათვალისწინებით, სრულებით შესაძლებელი იყო, რომ მისთვის ადამიანის გატაცება დაებრალებინათ... მან გოგონას კარები ჩაუკეტა და უკან, სახლში მიაბრუნა... ერთ კვირაში გოგონა გარდაიცვალა... ახლობლების ინფორმაციით, მას ვირუსი გაურთულდა, თუმცა, მისი მეგობრები სხვა ვერსიაზე საუბრობენ, - ის მოწამლეს: "იმ დროს, როდესაც ის გარდაიცვალა, მასთან ერთად სახლში მხოლოდ უფროსი ძმა იყო... მისი გაციების და ზოგადად, შეუძლოდ ყოფნის შესახებ არავინ ვიცოდით...", - წერს გარდაცვლილის მეგობარი გოგონა.
გარდაცვლილი სექსუალური უმცირესობის წარმომადგენელი იყო, თუმცა, ამაზე ოჯახში ხმამაღლა არასდროს საუბრობდა. ერთხელაც მისი მიმოწერა ოჯახის წევრებს ხელში ჩაუვარდათ. გოგონას სცემეს, სახლში ჩაკეტეს და ტელეფონი ჩამოართვეს... არსებული ინფორმაციით, უფროსი ძმა მას მუდმივად "სთავაზობდა" იარაღით თავი მოეკლა და ჰპირდებოდა, რომ ოჯახი ამ ფაქტს თვითმკვლელობად კი არ გაასაღებდა, იტყოდა, რომ მას იარაღი გაუფრთხილებლობით გაუვარდა, მაგრამ გოგონამ ამაზე სასტიკი უარი უთხრა.
ერთ-ერთი გაქცევის მცდელობის შემდეგ, ის ფსიქიატრიულში დააწვინეს... გამოწერის შემდეგ, კიდევ ერთხელ სცადა სახლიდან გაქცევა, რაც მისთვის საბედისწერო აღმოჩნდა... საეჭვო მიზეზით გარდაცვალების მიუხედავად, ცხედარს ექსპერტიზა არ ჩაუტარდა.
სექსუალური უმცირესობის წარმომადგენელი ქალებისა და მამაკაცების პრობლემები მსგავსია, - ოჯახის წევრები და ახლობლები მათ "ღირსების სასამართლოებს" უწყობენ, რაც როგორც წესი, მათი "გაქრობით" ან საეჭვო ვითარებაში გარდაცვალებით სრულდება... მათზე ძალოვნებიც ნადირობენ და იმ შემთხვევაში, თუ მათ მოიხელთებენ, ოჯახი ჩუმად არის, რადგან სამართალდამცავები აშანტაჟებენ - ემუქრებიან, რომ მათი ოჯახის წევრის ცხოვრების წესს ყველას გააგებინებენ, რაც ჩეჩნეთში საგვარეულო სირცხვილს ნიშნავს...
გეებისგან განსხვავებით, ლესბოსელი ქალები არასდროს მოხვედრილან "საიდუმლო ციხეში". არც შანტაჟისა და ფულის გამოძალვის მსხვერპლი გამხდარან, თუმცა, მათ მიმართ დაუნდობელია ოჯახი, განსაკუთრებით მამები და ძმები, რომლებიც "ქალიშვილს სასტიკად უსწორდებიან..."
საქმე ის არის, რომ ჩეჩენი მამაკაცებისგან განსხვავებით, ქალებს სხვა ქვეყანაში სამუშაოდ ან სასწავლებლად წასვლის უფლება შეზღუდული აქვთ. შარიათის კანონის თანახმად, სახლიდან გარეთ გამოსულ ქალს, აუცილებლად უნდა ახლდეს მახრამი - ანუ მისი ოჯახის წევრი მამაკაცი... თუმცა, ბოლო დროს, მდგომარეობა თანდათან გამოსწორდა და გროზნოელი გოგონები სხვა ქვეყანაში სასწავლებლად მიდიან... ისინი, ვინც ცხოვრებას "სხვანაირად" აგრძელებენ, ოჯახთან ურთიერთობას სამუდამოდ წყვეტენ...
ჩეჩნური ტრადიციების თანახმად, ქალის ერთადერთი ღირსება არის ოჯახი - მათი მორალის თანახმად, მხოლოდ უშნო ქალები არ თხოვდებიან და სხვა შემთხვევაში, ქალი თუ გაუთხოვარია, ამის მიზეზი მხოლოდ თავად არის... ადგილობრივების თქმით, "თავდასხმის" ობიექტი ხდებიან ის მამაკაცებიც, ვინც უკვე 40 წელს არის მიღწეული და ოჯახი არ ჰყავს... იქ ნაუცბათევად, ოჯახის წევრების გადაწყვეტილებით შექმნილი ოჯახები ჩვეულებრივი მოვლენაა და ბოლო დროს, მას შემდეგ, რაც ჩეჩნეთის ლიდერი რამზან კადიროვი გახდა, განქორწინება უკიდურესად გართულებულია. მეტიც, რესპუბლიკაში არსებობს სპეციალური კომისია, რომელიც განქორწინებული წყვილების შერიგებაზე მუშაობს.
"მიუხედავად იმისა, რომ ყველამ იცის არაერთი შემზარავი ფაქტის შესახებ, როგორ მოკლეს ან "გააქრეს" ადამიანი მისივე ოჯახის წევრებმა, მხოლოდ სექსუალური ორიენტაციის გამო, 6 წელია ჩრდილოეთ კავკასიაში ამ მიმართულებით ვმუშაობ და არცერთი გეი დახმარების თხოვნით არ შემხმიანებია, რადგან ისინი ამ თემაზე ქალთან საუბრის უფლებას საკუთარ თავს არ აძლევენ", - ამბობს ჩრდილოეთ კავკასიის სპეციალისტი ირინა კოსტერინა.
მისივე თქმით, სექსუალური უმცირესობის წარმომადგენელ გოგონებს ძალით ათხოვებენ მათზე ბევრად უფროს მამაკაცებზე, ან სულაც მათ თანატოლებზე, რომელთაც ისინი გარკვეული ანგარების, ხშირ შემთხვევაში, თანხის, სოციალური მდგომარეობის გამო მოჰყავთ... საქმე ის არის, რომ ადგილობრივი ისლამური კანონის თანახმად, მამაკაცს ნებისმიერ დროს შეუძლია გაეყაროს ცოლს და ის თავის ოჯახში დააბრუნოს, რადგან მამაკაცი უპირატესია. ასეთ შემთხვევაში, "სახლში მობრუნებული" გოგონები ცხოვრებას ან ფსიქიატრიულში აგრძელებენ ან თვითმკვლელობით ასრულებენ სიცოცხლეს" - ამბობს კოსტერინა, რომლის თქმითაც, ოჯახი თავის "ავტორიტეტს" იმდენად უფრთხილდება, რომ მზად არის, ამას საკუთარი შვილის ბედნიერება და სიცოცხლე შესწიროს.
სპეციალისტის თქმით, არცერთ მამას ამ ძმას არ უნდა ქალიშვილის მოკვლა, იქამდე ვიდრე, რომელიმე "გარე ბიძა" ან "ბიძაშვილი" არ დაუწყებს მათ მორალის კითხვას "ღირსებაზე"... არადა, ყოფილა შემთხვევა, როდესაც მამამ ქალიშვილი მოგუდა და მისი ცხედარი "მოიშორა", ან სულაც აკუწა და ისე "გააქრო". ადგილობრივი პოლიცია, როგორც წესი, ასეთ მკვლელობებს არ იძიებს, რადგან კადიროვის ხელმღვანელობა "ღირსების მკვლელობას" ნორმად მიიჩნევს.
ლალი პაპასკირი
კობი ბრაიანტის დაღუპვის საქმეში ახალი გარემოებები გამოჩნდა - არის თუ არა მთავარი დამნაშავე დისპეტჩერი?
რუსეთმა, "საჭიროების შემთხვევაში“, შესაძლოა ბელარუსში პოლიცია გაგზავნოს - რაზე შეთანხმდენენ ლუკაშენკო და პუტინი
