"მაშინ ვინაა ჩემი შვილის მკვლელი?" - 10 წლის შემდეგ გადახედილი განაჩენი და უპასუხო კითხვები ნიკა ლომინაძის მკვლელობის საქმეში

"მაშინ ვინაა ჩემი შვილის მკვლელი?" - 10 წლის შემდეგ გადახედილი განაჩენი და უპასუხო კითხვები ნიკა ლომინაძის მკვლელობის საქმეში

17 ნოემბერს პროკურატურამ სამ გახმაურებულ საქმეზე, რომელზეც სისხლის სამართლის წარმოება წინა ხელისუფლების დროს დასრულდა, გამოტანილი განაჩენების გადასინჯვის გადაწყეტილება მიიღო. ამ საქმეებიდან ერთ-ერთი, სს "ეი-ი-ეს" თელასის ფინანსური დირექტორის ნიკოლოზ ლომინაძის მკვლელობის საქმეა.

2002 წლის 13 აგვისტოს იგი საკუთარ ბინაში მოკლული იპოვეს. სასიკვდილო ჭრილობა შუბლზე აღენიშნებოდა. მოკლული სკოჩით ხელფეხშეკრული იყო, სახეზე პირსახოცი ჰქონდა გადაფარებული. დამნაშავეებს ძვირფასეულობა არ წაუღიათ, ამიტომ თავიდანვე მკვლელობა დაღუპულის საქმიანობას დაუკავშირეს. 2006 წელს მკვლელობა გახსნილად გამოცხადდა. საქმეზე მსჯავრი გიორგი და ნოდარ გვიჩიანებს, ნიკა ჩემიას, ავთანდილ ხერკელაძეს და გიორგი პაპაჩაშვილს დაედოთ. ისინი დღემდე საპატიმროში არიან, თუმცა თუკი სასამართლო პროკურატურას დაეთანხმება, ამ ადამიანებს ლომინაძის მკვლელობის საქმეზე დადებული მსჯავრი მოეხსნებათ და მათი სამართლებრივი რეაბილიტაცია მოხდება.

პროკურატურამ განაჩენის გადახედვის გადაწყვეტილება მას შემდეგ მიიღო, რაც ჩატარებული ხელახალი გამოძიების შედეგად დარწმუნდა, რომ ნიკა ლომინაძის მკვლელობის საქმეში ბრალდებულებს მსჯავრი მტკიცებულებების ფალსიფიკაციით დაედოთ. თუმცა, საგამოძიებო უწყებამ ამაში ლომინაძის ოჯახი ვერ დაარწმუნა. როგორც AMBEBI.GE-სთან საუბარში მოკლულის მამამ ნოდარ ლომინაძემ აღნიშნა, ის დღესაც დარწმუნებულია, რომ მისი შვილის მკვლელობისთვის სასჯელს რეალური დამნაშავეები იხდიან.

"მაშინ ვინაა ჩემი შვილის მკვლელობაში დამნაშავე? არავის არ მოუკლავს? მითხრეს, ჩვენ გამოვიძიებთო, მაგრამ ვერასდროს ვეღარ გამოიძიებენ ესენი ამ საქმეს. რისი გამომძიებლები არიან?!", - განაცხადა ნოდარ ლომინაძემ.

როგორც ლომინაძე აცხადებს, პროკურატურას მასთან წინასწარი კომუნიკაცია ჰქონდა და ინფორმირებული იყო, რომ საგამოძიებო ორგანო განაჩენის გადასინჯვას გეგმავდა. პროკურატურის არგუმენტების საპასუხოდ მან მხოლოდ ერთი კითხვა დასვა - ვინ მოკლა მისი შვილი, რაზეც პასუხი ჯერ ვერ მიიღო. როგორც ლომინაძე აღნიშნავს, პროკურორმა შეხვედრაზე განუმარტა რომ სასამართლოზე მოწმეებმა ჩვენებები ზეწოლის ქვეშ მისცეს, ახლა კი შეცვალეს, რამაც სხვა მტკიცებულებებთან ერთად საქმეზე მსჯავრდადებული პირების უდანაშაულობა გამოავლინა.

მტკიცებულებების სიყალბე ის ერთ-ერთი მთავარი ფაქტია, რომელიც პროკურატურამ ახალი გამოძიების შემდეგ გამოავლინა. როგორც პროკურატურაში განაცხადეს, დანაშაული წინასწარ შემუშავებული სცენარის მიხედვით გაიხსნა, რომელიც მაშინდელ ძალოვან უწყებაში შემუშავდა. როგორც სამართალწარმოების პროცესში ჩადენილი დანაშაულის გამოძიების დეპარტამენტის ხელმძღვანელი ირაკლი ნადარეიშვილი განმარტავს, პროკურატურას არ ჰქონდა სხვა გადაწყვეტილების მიღების უფლება, გარდა იმისა, რომ საქმეზე მსჯავრდებულების განაჩენი სასამართლოში გადასინჯვის მოთხოვნით გადაეგზავნა.

"ახალი გამოძიებით დადგენილია, რომ ლომინაძის მკვლელობის გახსნა დაიგეგმა შსს-ს ერთ-ერთი მაღალჩინოსნის მიერ. მოპოვებული იქნა აღიარებითი და მამხილებელი ჩვენებები", - განაცხადა ნადარეიშვილმა, თუმცა ვინ იყო ის მაღალჩინოსანი, ვის მიერაც სს "ეი-ი-ეს" თელასის ფინანსური დირექტორის მკვლელობის საქმის გახსნა დაიგეგმა, არც ნოდარ ლომინაძემ და არც საზოგადოებამ ამ დროისთვის არ იცის.

ამასთან, როგორც ნადარეიშვილი განმარტავს, მაშინდელი გამოძიების ერთ-ერთი გარემოება, რომლითაც მკვლელობის ერთ-ერთი შემსრულებელი აჭარაში გვიჩიანს შეხვდა და ლომინაძის ბინიდან წაღებული დოკუმენტაცია გადასცა, ახალი გამოძიების მიერ მოპოვებული მტკიცებულებებით გაქარწყლდა, ვინაიდან დადგინდა, რომ შემსრულებლები და გვიჩიანი იმ დროისთვის სხვადასხვა ადგილებში იმყოფებოდნენ, მათ შორის ერთი საქართველოში საერთოდ არ იმყოფებოდა. სამართალწარმოების პროცესში ჩადენილი დანაშაულის გამოძიების დეპარტამენტის ხელმძღვანელი ასევე აღნიშნავს, რომ საქმეზე სრულყოფილი ხელახალი გამოძიება ჩატარდა, მათ შორის მოპოვებული იქნა ახალი მტკიცებულებები, დაიკითხნენ ახალი მოწმეები და ჩატარდა არაერთი ექსპერტიზა.

ირაკლი ნადარეიშვილის ინფორმაციით, პროკურატურისთვის მტკიცებულებების ფაბრიკაციის შემსრულებელ პირთა წრე ცნობილია და მათი ნაწილი გამოძიებასთან თანამშრომლობს. მისივე თქმით, ამ დროისთვის მტკიცებულებების ფაბრიკაციის მიმართულებით გამოძიება გრძელდება, ისევე როგორც მიმდინარეობს გამოძიება ნიკოლოზ ლომინაძის მკვლელობაში დამნაშავე პირების დადგენის მიზნით.

თორნიკე კოშკაძე

AMBEBI.GE

დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა

"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?

პოლიციელებმა 35 წლის მამაკაცის გატაცებაში ფული აიღეს? - რა ახალ დეტალებს ამჟღავნებს "კურიერი" რუსთავში მომხდარი მკვლელობის შესახებ