ბათუმში გარდაცვლილი ახალგაზრდები ნაწამები არიან - ერთ-ერთს სავარაუდოდ, ყელი აქვს გამოჭრილი

არსებული ინფორმაციით, ბათუმში, საცხოვრებელ ბინაში ნაპოვნი ორი ახალგაზრდა მამაკაციდან ერთ-ერთის ცხედარს ძალადობის და წამების კვალი აღენიშნება.

როგორც ხიმშიაშვილის ქუჩაზე, შემთხვევის ადგილზე მყოფი მეზობლები პირად საუბრებში აცხადებს, ერთ-ერთ გარდაცვლილს, სავარაუდოდ, ყელი აქვს გამოჭრილი. ასევე, დაზიანებები აღენიშნება ორივე თვალის არეში.

გარდაცვლილთა ცხედრები რამდენიმე წუთის წინ პროზექტურაში გადაასვენეს.

ბათუმში, ხიმშიაშვილის ქუჩაზე, ერთ-ერთ საცხოვრებელ ბინაში ორი ახალგაზრდა ბიჭის ცხედარი რამდენიმე საათის წინ იპოვეს. გარდაცვლილები 17 და 18 წლის ახალგაზრდები არიან. ისინი ბათუმში თბილისიდან, დასასვენებლად ჩავიდნენ. ოჯახი მათ რამდენიმე დღის განმავლობაში ეძებდა, რის შემდეგაც ახლობლები ბათუმში ჩავიდნენ და ახალგაზრდები საცხოვრებელ ბინაში გარდაცვლილები იპოვეს.

"დაახლოებით 4 დღის განმავლობაში მშობლები ცდილობდნენ მათთან დაკავშირებას, თუმცა უშედეგოდ. დღეს ჩამოვიდნენ და სახლი იპოვეს, სადაც მათი შვილები იყვნენ. კარი დაკეტილი იყო და გამოიძახეს სამაშველო სამსახური. სახლში შესვლის შემდეგ ასეთი სურათი დახვდათ. როგორც ვიცით, გარდაცვლილთაგან ერთი მარტყოფიდან იყო, ხოლო მეორე თბილისიდან", - განაცხადა ხიმშიაშვილის ქუჩის მცხოვრებმა ლევან ფუტკარაძემ.

საქართველოს შინაგან საქმეთა სამინისტროს ინფორმაციით, გამოძიება სსკ 115-ე მუხლით დაიწყო, რაც თვითმკვლელობამდე მიყვანას გულისხმობს.

იხილეთ ვიდეო: რას ამბობს სახლის მეპატრონე, სადაც ორი ახალგაზრდის ცხედარი იპოვეს - ერთ-ერთს სავარაუდოდ, ყელი აქვს გამოჭრილი

"ინტერპრესნიუსი"

წაიკითხეთ: ცხედრები მშობლებმა იპოვეს... - რას ყვებიან ბათუმში გარდაცვლილი ახლგაზრდების შესახებ ადგილობრივები