ეკლესიის ჩამონგრევის შედეგად ორი ადამიანი გარდაიცვალა

ხელვაჩაურის რაიონის სოფელ ახალსოფლის მშენებარე ეკლესიის გუმბათის ჩამონგრევის შედეგად ორი ადამიანი გარდაიცვალა. ამის შესახებ "ინტერპრესნიუსის" კორესპონდენტი შემთხვევის ადგილიდან იუწყება.

სამაშველო სამსახურის თანამშრომლებმა ერთი გარდაცვლილი ნანგრევებიდან უკვე ამოიყვანეს, ხოლო მეორე გარდაცვლილის ამოყვანის სამუშაოები ამ წუთებში მიმდინარეობს. არსებული ინფორმაციით, ისიც გარდაცვლილია.

ეკლესიის ჩამონგრევის შედეგად ნანგრევებში სულ ოთხი ადამიანი მოყვა. ორი მათგანი მძიმე დაზიანებებით სასწრაფო სამედიცინო სამსახურმა საავადმყოფოში გადაიყვანა. ეკლესიის მშენებლობაზე დასაქმებული ადამიანები ადგილობრივები არ არიან.

შემთხვევის ადგილზე აჭარის მთავრობის თავმჯდომარე არჩილ ხაბაძე, უზენაესი საბჭოს თავმჯდომარე ავთანდილ ბერიძე, თვითმმართველობის წევრები და სასულიერო პირები იმყოფებიან.

წმინდა გიორგის სახელობის ეკლესია უკვე მეოთხე წელია შენდება. ეკლესიის გუმბათი მას შემდეგ ჩამოინგრა, რაც მშენებლობაზე დასაქმებულმა პირებმა ნაგებობას საყრდენი ბოძები გამოაცალეს.

"ინტერპრესნიუსი"