ურეკში 27 წლის ბიჭმა მეგობრები გადაარჩინა თვითონ კი დაიხრჩო

მაშველები ურეკის სანაპიროს მიმდებარედ ზღვაში 27 წლის დავით ლომაძეს ეძებენ. როგორც აჭარის საგანგებო და გადაუდებელი სიტუაციების მართვის ცენტრის უფროსი მამუკა თურმანიძე აცხადებს, გუშინ, 18:00 საათის შემდეგ ზღვაში სამძებრო ღონისძიებები მიმდინარეობს, თუმცა უშედეგოდ.

მამუკა თურმანიძის თქმით, დავით ლომაძე ზღვიდან ორი ადამიანის გამოყვანა მოახერხა, თუმცა სანაპიროდან ტალღებმა ჩაითრია და ზღვაში დაიკარგა.

"გუშინ, 18:00 საათზე 112-დან შემოვიდა შეტყობინება, რომ ურეკში ზღვაში დაიხრჩო 27 წლის დავით ლომაძე, რომელმაც ორ ადამიანს უშველა, თვითონ კი ვეღარ შეძლო ზღვიდან გამოსვლა, სანაპიროდან ტალღამ ჩაითრია და დაიკარგა", - აღნიშნა მამუკა თურმანიძემ.

მისივე თქმით, სამაშველო ჯგუფები და კატარღები მუშაობენ ზღვაში, თუმცა ჯერჯერობით უშედეგოდ. მამუკა თურმანიძე განმარტავს, რომ ზღვა ღელავს და მხედველობაც ცუდია, რაც სამაშველო ღონისძიებებს ართულებს.

"ინტერპრესნიუსი"