ალასანია მმართველ კოალიციაში განხეთქილებაზე დეტალურად საუბარს აპირებს
საქართველოს დემოკრატიას ნამდვილად სჭირდება მეტი პლურალიზმი და ოპოზიციურ პარტიებს მეტი საშუალებები უნდა მიეცეთ, - ამის შესახებ ჟურნალისტებს "თავისუფალი დემოკრატების" ლიდერმა, ირაკლი ალასანიამ ევროკომისართან სამეზობლო პოლიტიკისა და გაფართოების შესახებ მოლაპარაკებების საკითხებში, იოჰანეს ჰანთან შეხვედრის დაწყებამდე განუცხადა.
მისი თქმით, შეხვედრის თემა იქნება როგორც საქართველოს საგარეო, ისე შიდა პოლიტიკა. "რამდენიმე საკითხია, რაც ჩვენი ქვეყნისა და ჩვენი პარტიისთვის უმნიშვნელოვანესია. ეს არის - როგორ მიმდინარეობს ასოცირების ხელშეკრულების შედეგად მიღწეული შეთანხმების განხორციელება და ამ კუთხით საქართველომ მინდა გამოიჩინოს თავი, რადგან ამას თან მოჰყვება ვიზის ლიბერალიზაციის შეთანხმება. ასევე, ძალიან მაინტერესებს მართლაც გავიაროთ ის საკითხები, თუ როგორ იქნება ევროპულ ბაზარზე ქართული პროდუქციის შეღწევა. ბუნებრივია, უსაფრთხოების საკითხები ასევე მნიშვნელოვანი განხილვის თემა იქნება რუსეთის აგრესიის ფონზე. საქართველოს სჭირდება დამატებითი უსაფრთხოების გარანტიები, მეტი ინტეგრაცია ევროკავშირთან როგორც ეკონომიკურად, ისე უსაფრთხოების საკითხებში", - განაცხადა ირაკლი ალასანიამ.
მისივე თქმით, ასევე ამ შეხვედრებზე გვერდს ვერ აუვლიან შიდაპოლიტიკურ საკითხებს. "ბუნებრივია, მათ აქვთ დიდი ინტერესი, თუ რატომ მოხდა განხეთქილება მმართველ კოალიციაში და ამაზე საკმაოდ დეტალურად ვისაუბრებთ. ვისაუბრებთ იმაზე, რომ საქართველოს დემოკრატიას დღეს ნამდვილად სჭირდება მეტი პლურალიზმი. აქედან გამომდინარე მეტი საშუალებები უნდა მიეცეს ოპოზიციურ პარტიებს, აწარმოონ კამპანია, იყვნენ ჩართული არჩევნების სამზადისში და რაც მთავარია ხელმისაწვდომობა ჰქონდეთ ფინანსურ რესურსებთან", - განაცხადა ირაკლი ალასანიამ.
იოჰანეს ჰანსა და ირაკლი ალასანიას შეხვედრაში "თავისუფალი დემოკრატების" მხრიდან ასევე საგარეო საქმეთა ყოფილი მინისტრი მაია ფანჯიკიძეც მონაწილეობს.