ავტორი:

"ხშირად, სიძე-პატარძალი სასულიერო პირს არც უსმენს... ხმაურში, ფოტოგადაღებაში აღესრულება წმინდა საიდუმლო" - რა უნდა იცოდნენ წყვილებმა ჯვრისწერის შესახებ

"ხშირად, სიძე-პატარძალი სასულიერო პირს არც უსმენს... ხმაურში, ფოტოგადაღებაში აღესრულება წმინდა საიდუმლო" - რა უნდა იცოდნენ წყვილებმა ჯვრისწერის შესახებ

ჯვრისწერის საიდუმლო ერთ-ერთია, რომელსაც მორწმუნეთათვის განსაკუთრებული მადლი და მნიშვნელობა აქვს, თუმცა როგორც AMBEBI.GE-ს დეკანოზი გიორგი თევდორაშვილი ეუბნება, დღეს ბევრი წყვილი ჯვარს გაუაზრებლად იწერს და ოჯახების დანგრევის ერთ-ერთი მიზეზი ესეც არის.

- ყველა მართლმადიდებელ ქრისტიანს მოეხსენება, რომ ეკლესიაში დადგენილია შვიდი საიდუმლოება. პირველი მათგანი არის ნათლისღება, მაგრამ საიდუმლოთა შორის ყველაზე უძველესი გახლავთ ქორწინების, ანუ ჯვრისწერის საიდუმლო. ისტორიულად იგი ძველ აღთქმაში ჯერ კიდევ სამოთხეში დაადგინა ღმერთმა, როცა ადამი და ევა აკურთხა და უთხრა მათ - ინაყოფიერეთ და გამრავლდით ქვეყანასა ზედა.

როდესაც ღმერთმა ადამიანი შექმნა, ადამმა თითქოს მოიწყინა და თავისი მსგავსი ვერანაირი ვერ მოიძია, შემდეგ ღმერთმა მას მოჰგვარა ძილი და მისი ნეკნისგან შექმნა მისივე მსგავსი ევა. ევა ებრაული სიტყვაა და ქართულად სიცოცხლის წყაროს ნიშნავს. მინდა ხაზი გავუსვა, რომ პირველი ლიტერატურული ნაწარმოები სამოთხეში ადამის მიერ წარმოითქვა, როცა შეხედა ევას და თქვა: ეს არის ხორცი ჩემი ხორცთაგანი და ძვალი ძვალთაგანი, ანუ როდესაც ადამიანმა პირველად გამოხატა სიხარული თავის მსგავს არსებაში ეს იყო ადამი და მან მიიღო დიდი სიყვარულით ღვთისგან ბოძებული მისივე მსგავსი ადამიანი.

- რამდენად გაცნობიერებული აქვთ დღეს წყვილებს ჯვრისწერის მნიშვნელობა?

- როცა ნეფე-პატარძალი თავზე გვირგვინს იდგამს, ეს მათთვის მნიშვნელოვანი მომენტია, თუმცა დღეს სამწუხაროდ, ძალიან ბევრი ჯვრისწერა სიმბოლურად სრულდება. ხშირად, წარმოდგენა არ აქვს არც სიძეს და არც პატარძალს, რა ხდება ამ დროს, არც სასულიერო პირს უსმენენ. ძირითადად ხმაურში, ფოტო და ვიდეო გადაღებაში აღესრულება ეს წმინდა საიდუმლო და შემდგომში, როცა ე.წ. თაფლობის თვე გადის, მერე აღმოჩნდება, რომ მათ სიმბოლურად დაიწერეს ჯვარი და სულაც არ იციან, რა მოვალეობები აკისრია ცოლ-ქმარს ერთმანეთის მიმართ და უკვე შემდგომში მოდიან ეკლესიაში და მერე იწყებენ შემეცნებას, თუ რას ნიშნავს ქორწინება და რა საიდუმლოს გულისხმობს იგი.

ყველაფერი მამაკაცისგან იწყება. მამაკაცი თუ ღირსეულად მოიქცევა, იმეფებს საკუთარ თავზე, ანუ თავისუფალი იქნება და ოჯახის საქმეებს გონივრულად განკარგავს, ბუნებრივია, მისი მეუღლეც სიყვარულით, კდემამოსილებით აღივსება და მისი ერთგული იქნება. ოღონდ აქ არ უნდა იყოს ერთპიროვნული ლიდერობა, უნდა იყოს ბჭობა, გარკვეული საკითხის ერთდროული გადაწყვეტა. ის, რომ მამაკაცი ვარ, ყველაფერი სწორად მესმის და შენ ვინ გეკითხება ან მარტო მე ვიციო, ასე არ შეიძლება, მათ ერთად უნდა იმსჯელონ.

კაცობრიობის გამოხსნა და მხსნელის მობრძანება მოხდა ქალწულ მარიამისაგან. ყველამ უნდა იცოდეს, რომ ზეციურ იერარქიაში წმინდა სამების შემდეგ ყველაზე აღმატებული ქმნილება არის ყოვლადწმინდა ღვთისმშობელი. საქართველოში წმინდა ნინომ იქადაგა, ყველაზე ძლიერი საქართველო და აყვავებული ქრისტიანობა თამარ მეფის დროს იყო და ყველაზე ახოვანებით ჭეშმარიტი სარწმუნოება ქეთევან დედოფალმა დაიცვა, ასე რომ, მამაკაცებს ვთხოვ, ნურაფრით ნუ დაამცირებენ დედაკაცებს და ჩვენი ოჯახები იყოს ისეთი, როგორც უფალს უნდა.

- ჯვრისწერამდე თუ მოდიან თქვენთან წყვილები, რათა გაიგონ მისი მნიშვნელობა და არსი?

- ალბათ სხვა მამაოებიც დამეთანხმებიან, რომ წყვილების 99% მოდიან ტაძრებში, მამაოებს შეუთანხმდებიან თუ რომელ საათზე უნდა დაიწერონ ჯვარი, რამდენს გადაიხდიან და არანაირი კატეხიზაცია ანუ გასაუბრება არ ხდება თავიანთი მოვალეობის შესახებ. მე ყველა წყვილს ვურჩევდი, წიაკითხონ იოანე ოქროპირის ცნობილი ეპისტოლეები ოჯახის შექმნის შესახებ, სადაც მას პავლე მოციქულის სიტყვები ჰყავს მოყვანილი - თუ ჩვენ ღმერთი გვაძლევს უფლებას, რომ პირველივე კამათის და გაუგებრობის დროს გავუშვათ ჩვენი მეუღლე ოჯახიდან, ანუ გავეყაროთ, მაშინ ახლავე შეგიძლიათ შექმნათ ოჯახი, მაგრამ თუ ღმერთი გასწავლით, რომ მხოლოდ მრუშობის გამო შეგიძლია გაუშვა შენი მეუღლე, მაშინ დაფიქრება გმართებს, ვისთან აპირებ ოჯახის შექმნას.

ეკლესიაში იყო ასეთი ტრადიცია - დაწინდვა ანუ ნიშნობა, ახლა თანამედროვე რეალობაში დაწინდვა და ქორწინება ერთად აღესრულება, მაგრამ ადრე წყვილები 6 თვე მაინც იყვნენ დაწინდულები ანუ დანიშნულები, ერთად არ ცხოვრობდნენ ანუ ცოლ-ქმარი არ ერქვათ, უბრალოდ იყო სასიძო და სარძლო. მაშინ მოგეხსენებათ, არ იყო მობილური ტელეფონები და სოციალური ქსელები და ალბათ ეკლესიის წიაღში ხდებოდა ამ ადამიანების გაცნობა და შემდეგ, როდესაც დარწმუნდებოდნენ, ერთად ცხოვრება შეეძლოთ, ამ შემთხვევაში იქმნებოდა ოჯახები.

დღეს სამწუხაროდ, სოციალურ ქსელსა და ღამის კლუბში გაცნობილი ადამიანი შეიძლება უცბად გახდეს ვინმეს მეუღლე, რაც ცუდია და ხშირად ასეთი ქორწინება კრახით სრულდება და ძალიან ბევრი დანგრეული ოჯახია, ოჯახის დანგრევა კი დიდი ცოდვაა, მათი დანგრევის ბზარი ბავშვების გულებზე გადის და შემდგომში ბავშვები ხდებიან რეციდივისტები, დამნაშავეები.

ქორწინება უფრო სამოქალაქო სიტყვაა და ჯვრისწერა ნიშნავს იმას, რომ ჯვარი გადავიწერე, ღმერთმა დაგვლოცა, ანუ ჩვენ ღვთისგან მოვითხოვეთ მადლი, რომ ჩვენ შორის მშვიდობიანი და სასიყვარულო ურთიერთობა იყოს. დღეს მხოლოდ საპატარძლო კაბას აქცევენ ყურადღებას, რამდენი კამერა იღებს, სად დაიწერენ ჯვარს და ა.შ.

როცა ადამიანს ეკითხები, ხარ თუ არა ჯვარწერილი, ის გპასუხობს რომ კი, რა თქმა უნდა, მე ჯვარი სიონში ან სამებაში დავიწერე, გისახელებს ცნობილ ტაძრებს, მაგრამ ჩვენ იმას ვგულისხმობთ, შენ რომ ჯვარი დაიწერე, გესმის რა მოხდა ამ დროს? ეს სიმბოლური იყო თუ მართლა გაიაზრე? საიდუმლო იმას ნიშნავს, რომ ღვთის მადლი უხილავად გადმოდის და იმ შემთხვევაში გადმოდის, თუ შენ მიხვდი იმ დროს რა მოხდა, თუ შენ ვერ მიხვდი და უბრალოდ გინდა შენი ცხოვრების ალბომში ქორწინება ფოტოების და ვიდეოების სახით დაფიქსირდეს, ეს სამწუხაროდ, არანაირ ნაყოფს არ გამოიღებს.

- რას ნიშნავს ჯვრის აყრა?

- ჯვრის აყრა, როგორც ასეთი, არ არსებობს, მაგრამ ეკლესიამ გამოიჩინა იკონომია, ანუ გარკვეული შეღავათი, რადგან ადამიანი რთული არსებაა. ეკლესია ითვალისწინებს სოციალურ მდგომაროებას, იმ საუკუნეს, იმ ყოფა-ცხოვრებას და გარკვეულ შეღავათებს უშვებს ოღონდ არა დოგმატებში, არამედ გარკვეულ კანონებში გარკვეული ცვლილება შეიტანა და ერთ-ერთი ის არის, რომ რადგან შენ ამ ადამიანთან ცხოვრება არ გინდა და ოჯახი დაინგრა, მაშინ მღვდელმთავარი, კერძოდ კი ქორეპისკოპოსი წყვილს მიტევების ლოცვას უკითხავს, ამას დღეს ჯვრის აყრას ეძახიან. მაგრამ ყველას გასაგონად მინდა ვთქვა, რომ ჯვრის აყრა მხოლოდ მაშინ ხდება, როცა ადამიანი გარდაიცვლება. თუ ადამიანს მეორე ადამიანთან ჯვარი აქვს დაწერილი, ის მთელი ცხოვრება ჯვარდაწერილი იქნება მასთან, ეკლესია მეორე ქორწინებას მხოლოდ იმიტომ უშვებს, რომ მრუშობას და სიძვას არ ჰქონდეს ადგილი.

- მეორე ქორწინებას როგორ უყურებს ეკლესია?

- მეორე ქორწინებაც კანონიერია, მაგრამ ის ადამიანი ჯვარწერილად მაინც პირველ მეუღლესთან ითვლება, მეორე ქორწინება გვირგვინების გარეშე აღესრულებოდა და მინდა გვირგვინების დადგმასაც შევეხო. გვირგვინის დადგმა ნიშნავს ცოდვაზე გამარჯვებას, როცა ნეფე-პატარძალს გვირგვინს ადგამენ, ეს იმას ნიშნავს, რომ ამ ადამიანებმა სიძვისა და მრუშობის ნაცვლად, ოჯახი შექმნეს და ამით დაამარცხეს ვნება. ოჯახის შექმნის პირველი მიზანი არ არის შვილების გაჩენა, ვინმეს არ ეგონოს, რომ მე ამის წინააღმდეგი ვარ, უბრალოდ, პირველ რიგში ოჯახი იქმნება მხოლოდ და მხოლოდ იმიტომ, რომ კაცმა და ქალმა მოპირდაპირე სქესთან ვნება დაიკმაყოფილოს, აღარ იმრუშოს და სიძვაში არ ჩავარდეს, ანუ მათ პირველ რიში ურთიერთობა უნდა ჰქონდეთ, რომ ვნება დაამარცხონ საკუთარ თავში, რა თქმა უნდა, შემდგომში ღვთის კურთხევაა ასეთი, რომ გამრავლდით და ინაყოფიერეთ ქვეყანასა ზედა.