როგორ გადაურჩა კარბელაშვილი დაპატიმრებას? - "პოლიციას ჰქონდა მისი დაკავების უფლება"

როგორ გადაურჩა კარბელაშვილი დაპატიმრებას? - "პოლიციას ჰქონდა მისი დაკავების უფლება"

გვიან ღამით ოსიაურთან გიორგი კარბელაშვილი დააკავეს. ის საჭეს მეგობართან ერთად ნასვამი მართავდა. გავრცელებული ინფორმაციით, კარბელაშვილმა პოლიციას წინააღმდეგობა გაუწია, რის შედეგადაც ის დააკავეს, რამდენიმე საათის შემდეგ კი გაათავისუფლეს. დაკავების ადგილზე იმყოფებოდა დეპუტატი გიორგი ბარამიძეც, რომელიც პოლიციას მოუწოდებდა, კარბელაშვილი არ დაეკავებინათ, რადგან ის პარლამენტის წევრია. რა შემთხვევაში იცავს პარლამენტს დაკავებისგან იმუნიტეტი, ამის შესახებ AMBEBI.G-ს პარლამენტის იურიდიული კომიტეტის თავმჯდომარე ვახტანგ ხმალაძე ესაუბრება:

- ბატონო ვახტანგ, სწორი იყო თუ არა გიორგი კარბელაშვილის დაკავება?

- იქ რა მოხდა ვერ გეტყვით, რადგან საინფორმაციო საშუალებებით რაც გადმოსცეს, მხოლოდ ის ვიცი. მე აგიხსნით სამართლებრივად როგორ არის საქმე დეპუტატის შემთხვევაში. საგზაო მოძრაობის წესების დარღვევა, ეს არის ადმინისტრაციული სამართალდარღვევა და შესაბამისი სანქციებისგან არცერთი თანამდებობის პირს არ იცავს იმუნიტეტი. მნიშვნელობა არ აქვს, ის პრემიერ-მინისტრია თუ სხვა მაღალჩინოსანი. საგზაო მოძრაობის წესების დარღვევისას, როდესაც პატრული აჩერებს ავტომობილს, შეუძლიათ მძღოლს მოსთხოვონ ალკოტესტის ჩატარება. თუ პირი აღმოჩნდა ნასვამი, მას აღარ შეუძლია მანქანის ტარება. ასეთ შემთხვევაში, პირს შეუჩერდება მართვის უფლება 6 თვის ვადით. თუ 6 თვეში იგივე ისევ გაიმეორა, კიდევ ერთი წლით ჩამოერთმევა მართვის მოწმობა და დაეკისრება ჯარიმა.

ასევე საინტერესო| რას ამბობდა დაკავების მომენტში წელსზემოთ შიშველი, სავარაუდოდ მთვრალი დეპუტატი კარბელაშვილი

რაც შეეხება დეპუტატის დაკავებას. კონსტიტუცია ამბობს, არ შეიძლება პარლამენტის წევრის დაკავება, გარდა იმ შემთხვევისა, როდესაც მას წაასწრეს დანაშაულის ადგილზე. თუ პარლამენტარს ვერ წაასწრეს დანაშაულზე, ამ შემთხვევაში საჭიროა საგამოძიებო უწყებამ მიმართოს პარლამენტს. თავის მხრივ პარლამენტმა უნდა იმსჯელოს, კენჭი უყაროს და ამის შემდეგ გასცემს თანხმობას დაკავებაზე. მაგრამ თუ დანაშაულზე წაასწრეს პარლამენტარს, შეიძლება დააკავონ და ეს დაუყონებლივ უნდა ეცნობოს პარლამენტს. თუ პარლამენტი არ მისცემს თანხმობას დაკავებაზე, უნდა გათავისუფლდეს. მანამდე სანამ პარლამენტი კენჭს უყრის, პირი დაკავებულია.

ამავე დროს მოქმედებს მეორე სქემა, თუ დააკავეს თანამდებობის პირი, 48 საათის განმავლობაში უნდა მიმართონ სასამართლოს, სასამართლომ უნდა იმსჯელოს დაკავების კანონიერებაზე და მიზანშეწონილობაზე და თუ განჩინებით პირს პატიმრობა არ შეეფარდა, უნდა გაათავისუფლონ. გააჩნია, რომელი პროცედურა დასრულდება უფრო მალე, სასამართლო თუ საპარლამენტო, სასამართლოს პროცედურას სჭირდება მაქსიმუმ 72 საათი. თუ ამას წინ უსწრებდა პარლამენტის განხილვა, უნდა გაათავისუფლონ. თუ სასამართლომ პარლამენტზე ადრე მიიღო გადაწყვეტილება, პარლამენტს სამსჯელო არაფერი რჩება, გარდა იმ შემთხვევისა, თუ მთავარმა პროკურატურამ მიმართა საკანონმდებლო ორგანოს დეპუტატის პატიმრობის შეფარდების მოთხოვნით.

რაც შეეხება კონკრეტულ შემთხვევას, როგორც წავიკითხე, კარბელაშვილმა გაუწია წინააღმდეგობა პატრულს, მე არ ვიცი რაში გაუწია წინააღმდეგობა, მაგრამ პოლიციისთვის წინააღმდეგობის გაწევა არის სისხლის სამართლის დანაშაული. თუ ეს ასე იყო, პოლიციას ჰქონდა მისი დაკავების უფლება. რადგან ეს პირი უკვე გათავისუფლებულია.

რედაქცია| სრული ინფორმაცია მომხდართან დაკავშირებით იხილეთ თეგზე #გიორგი კარბელაშვილი

- შსს-ს განცხადებაში ნათქვამია, რომ კარბელაშვილი გაათავისუფლეს, რადგან მას იმუნიტეტი იცავს, იმსჯელა პარლამენტმა კარბელაშვილის საკითხზე?

- გუშინ დააკავა და როგორ იმსჯელებდა? პოლიციას უფლება აქვს ნებისმიერი პირი დააკავოს ან არა, როცა ამის სათანადო საფუძველი არსებობს. უკვე გათავისუფლებული გიორგი კარბელაშვილი თუ უნდა დააკავონ, გამოძიებამ უნდა მიმართოს პარლამენტს თანხმობის მისაღებად. თუ არ გაათავისუფლებდა პოლიცია დეპუტატ კარბელაშვილს, მაშინ თანხმობის მისაღებად უნდა მიემართა პარლამენტისთვის, რომ პირი დარჩენილიყო პატიმრობაში. მე ვიცი, რომ არ მიუმართავს. თუ დაგვაკავებენ პირობითად, მე და თქვენ, გამოძიება კი დაგვტოვებს პატიმრობაში, თქვენს შემთხვევაში სასამართლომ უნდა მიიღოს გადაწყვეტილება, ჩემს შემთხვევაში კი პარლამენტმა და სასამართლომ უნდა იმსჯელოს.

რედაქციის რჩევით| რას პატიობს და რას არ პატიობს კონსტიტუცია პარლამენტის წევრებს: იმუნიტეტი, გარანტიები და აკრძალვები

თამარ ბოჭორიშვილი

AMBEBI.GE