ავარია სანაპიროზე - დაშავებული საავადმყოფოშია გადაყვანილი

მტკვრის მარცხენა სანაპიროზე, გალაკტიონის ხიდის მიმდებარე ტერიტორიაზე ორი მსუბუქი ავტომობილი ერთმანეთს შეეჯახა. როგორც "ინტერპრესნიუსის" კორესპონდენტი შემთხვევის ადგილიდან იტყობინება, ადგილზე მობილიზებული არიან სამართალდამცველები და სამაშველო სამსახურის რამდენიმე ბტრიგადა. ორივე ავტომობილი დაზიანებულია და გზის სავალი ნაწილიდან შეჯახების შედეგად არის გადასული. გალაკტიონის ხიდის მიმდებარე ტერიტორიაზე მოძრაობა შეფერხებულია. როგორც "ინტერპრესნიუსს" შინაგან საქმეთა სამინისტროს პრესსამსახურში განუცხადეს, ავარიის შედეგად ერთი ადამიანი დაშავდა და იგი სხეულის მსუბუქი დაზიანებით საავადმყოფოშია გადაყვანილი. მომხდართან დაკავშირებით გამოძიება სისხლის სამართლის კოდექსის 267-ე მუხლის პირველი ნაწილით მიმდინარეობს, რაც ტრანსპოტრის უსაფრთხოების ან ექსპლუატაციის წესის დარღვევას გულისხმობს.