როგორი მომსახურება მოსწონს ქართველ მომხმარებელს?

საქართველოში მომსახურების სფეროში არსებულ პრობლემებსა თუ მიღწევებზე ბევრს საუბრობენ. ეს ის სფეროა, რომელიც ქვეყანაში თანდათან განვითარებისკენ მიდის. AMBEBI.GE-მ ჩაატარა ონლაინ-გამოკითხვა იმის გასაგებად, თუ რას ანიჭებს მომხმარებელი უპირატესობას ამა თუ იმ მომსახურების მიღებისას. გამოკითხულთა 60% მიიჩნევს, რომ მნიშვნელოვანია კონსულტანტმა იცოდეს პროდუქციის მახასიათებლები. გამოკითხულთა 35% ფიქრობს, რომ კონსულტანტისგან ზედმეტი ყურადღება მოსაბეზრებელია და უმჯობესია თუ კლიენტს გადაწყვეტილების მიღებამდე ზედმეტად არ შეაწუხებენ. 5% კი თვლის, რომ კონსულტანტმა მხოლოდ მიმართვის შემთხვევაში უნდა გაუწიოს შესაბამისი დახმარება.

ფაქტია, რომ ბიზნესის წარმატების საწინდარი მომხმარებლის მოთხოვნებზე ორიენტაციაა. მომსახურების სფერო თანამედროვე ცხოვრების ერთ-ერთი პერსპექტიული მიმართულებაა და ის ნებისმიერი კომპანიის იმიჯს განსაზღვრავს. მომსახურების სფერო მარტივად რომ წარმოვიდგინოთ, მყიდველისა და გამყიდველის ურთიერთობისგან შედგება, სადაც გამყიდველზეა დამოკიდებული, შეიძენს თუ არა მომხმარებელი პროდუქციას, იქნება თუ არა ის კმაყოფილი თავისი შენაძენით და სამომავლოდ თუ მიანიჭებს უპირატესობას იგივე ბრენდს.

იმის გასარკვევად თუ რას ანიჭებენ მომსახურების სფეროში კომპანიები უპირატესობას, ambebi.ge ორ ერთმანეთისგან სრულიად განსხვავებულ კომპანიას ესაუბრა.

,,iTechnic-ი“ ქართულ ბაზარზე უკვე წლებია ოპერირებს. კომპანია ეფლის პროდუქციის რეალიზებას ეწევა და როგორც ამ ბრენდს შეეფერება, მომსახურების სფეროში მოწინავე პოზიციებს იკავებს. მათ მოახერხეს მომსახურების სფეროში ევროპის საერთაშორისო თასის აღება. თასის მფლობელები ის კომპანიები ხდებიან, რომლებიც ახერხებენ თავიანთ ქვეყანაში დანერგონ მომსახურების მაღალი დონე. სულ ცოტა ხნის წინ ,,აიტექნიკი“ ასევე მოხვდა ათ წარმატებულ კომპანიას შორის და მონაწილეობა მიიღო ,,გაყიდვების კონსულტანტის სტანდარტის შექმნაში“.

,,აიტექნიკის” ეიჩარ-მენეჯერი ნონა ქირიკაშვილი:

,,პირველ ეტაპზე განსაკუთრებით მნიშვნელოვანია, რომ კონსულტანტებმა პროდუქცია ზედმიწევნით კარგად იცოდნენ. ამ კუთხით ტარდება სისტემატიური სწავლებები და ტესტირებები. თუ კონსულტანტმა არ იცის კარგად ის პროდუქცია, რომელიც უნდა შესთავაზოს მომხმარებელს, ის ვერ გაუწევს სრულყოფილ მომსახურებას მყიდველს”, -აცხადებს ნონა ქირიკაშვილი.

აიტექნიკის ეიჩარ-მენეჯერი აქცენტს მომხმარებლის მიმართ თავაზიანობის გამოჩენასა და მათი კეთილგანწყობის მოპოვებაზე ამახვილებს.

,,ღიმილი და დადებითი ემოციის გადაცემა პოტენციური მყიდველისთვის, ნებისმიერ კომპანიაში მნიშვნელოვანია. ჩვენ ვცდილობთ კადრების დენადობა მინიმუმამდე დავიყვანოთ, რადგან სტაბილური კადრები, დიდი გამოცდილებით კომპანიის წარმატების საწინდარია. ჩვენ საკმაოდ კვალიფიციური თანამშომლები გვყავს. მათი უმეტესობა უკვე წლებია რაც ჩვენთან მუშაობენ. აღსანიშნავია, რომ თანამშრომელბის 35-40% 3-4 წელია აგრძელებს ჩვენთან საქმიან ურთიერთობას. ეს კი თანდათან აძლიერებს მათ ცოდნასა და გამოცდილებას. მოკლედ რომ ვთქვათ, ჩვენ საკმაოდ დიდ რესურსს ვდებთ თითოეულ თანამშრომელში, თითოეული მათგანი ძალიან მნიშვნელოვანია კომპანიისთვის,”- აცხადებს ნონა ქირიკაშვილი.

მისი თქმით, მომხმარებელთან სწორი დისტანციის დაჭერა აუცილებელია. მას პროდუქციის დათვალიერებისა და საკუთარი არჩევანის გაკეთების საშუალება მაქსიმალურად კომფორტულ გარემოში უნდა შეეძლოს, საჭიროების შემთხვევაში კი, კონსულტანტი მზად უნდა იყოს მიაწოდოს ამომწურავი ინფორმაცია პროდუქციაზე.

კომპიუტერული მომსახურების კომპანია F1-ში კი აღნიშნავენ, რომ მომსახურების სფეროში ყველაზე დიდ მნიშვნელობას კლიენტისადმი გულითად დამოკიდებულებას ანიჭებენ.

როგორც კომპანიის აღმასრულებელი დირექტორი გიორგი ბარბაქაძე აცხადებს, მომსახურება კომპლექსური საკითხია, რომელიც დაფუძნებულია კომპანიის კორპორატიულ კულტურასა და თითოეული თანამშრომლის პირად ღირებულებებზე.

"ისე მოექეცი სხვებს, როგორც გინდა, რომ შენ გექცეოდნენ" -ეს არის მთავარი. თუ მოვახერხებთ რომ გულით მივუდგეთ თითოეული კლიენტის საჭიროებას, მაშინ ეს იქნება ურთიერთობის ყველაზე ეფექტური ფორმა,”- აღნიშნავს გიორგი ბარბაქაძე.

მისი თქმით, ნდობა არის ის მნიშვნელოვანი ფაქტორი, რომლის გამოც კლიენტი ლოიალური ხდება კომპანიის მიმართ.

ქრისტინე გამთენაძე