ტყიბულის მაღაროში 51 წლის მეშახტე გარდაცვლილი იპოვეს

ტყიბულის მინდელის სახელობის შახტაში, 51 წლის თემურ კაკაურიძე გარდაცვლილი იპოვეს. როგორც AMBEBI.GE-ს მეტალურგიული, სამთო და ქიმიური მრეწველობის მუშაკთა პროფკავშირის თავმჯდომარემ თამაზ დოლაბერიძემ განუცხადა, შემთხვევა 7 ოქტომბერს ტყიბულის მინდელის სახელობის შახტის, მე-6 უბანზე მოხდა.

"როგორც ადგილობრივები აცხადებენ, დილით, 07:00 საათზე, როდესაც შახტაში დილის ცვლის მეშახტეები ჩავიდნენ, იგი უკვე გარდაცვლილი იყო. წინასწარი ინფორმაციით, ვენტილაციის და უსაფრთხოების სამსახურის თანამშრომელი ნახშირორჟანგმა გაგუდა, გონება დაკარგა, რის შემდეგაც წაიქცა და ცხვირის და შუბლის არეში მძიმე დაზიანებები მიიღო. გარდაცვლილს სახეზე დაზიანებები აღენიშნებოდა", - განაცხადა დოლაბერიძემ. მისივე თქმით, ცხედარს ექსპერტიზა ჩაუტარდა, რომლის პასუხი მოგვიანებით გახდება ცნობილი.

დოლაბერიძის თქმითვე, მუშების განცხადებით, წინა დღეებში შახტაში "დაგაზიანება იყო ანუ ნახშიროჟანგი იყო დაგროვილი". 51 წლის თემურ კაკაურიძემ შახტაში მუშაობა სამი თვის წინ დაიწყო.

აღნიშნულ საკითხთან დაკავშირებით შინაგან საქმეთა სამინისტროში განაცხადეს, რომ საქმეზე დაწყებულია გამოძიება, 240-ე მუხლის მეორე ნაწილით, რაც გულისხმობს სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას, რამაც გამოიწვია ადამიანის სიცოცხლის მოსპობა.

ეკა ბახუტაშვილი

AMBEBI.GE