რუსუდან ფეტვიაშვილის მთელი შემოქმედება ერთ ალბომში

რუსუდან ფეტვიაშვილის მთელი შემოქმედება ერთ ალბომში

ბავშვობის პერიოდის ნახატები, გრაფიკა, ფერწერა, ილუსტრაცია, 6-11 წლის ასაკში ფანქრითა და ტუშით შესრულებული ნამუშევრები, ილუსტრაციები ფრანგულ ენაზე გამოცემული "ვეფხისტყაოსნისთვის", "დათა თუთაშხიასა" და სხვა ნაწარმოებებისთვის - ეს ყველაფერი შეგიძლიათ იხილოთ მსოფლიოში აღიარებული ქართველი მხატვრის პირველ პერსონალურ ალბომში. ალბომი, რომელიც 160-მდე ნამუშევარს მოიცავს, რუსუდან ფეტვიაშვილმა ხელოვნების მოყვარულებს 25 ოქტომბერს "თიბისი გალერეაში" წარუდგინა.

"მიხარია, რომ ჩემი ნამუშევრების ერთად თავმოყრა საბოლოოდ მოხერხდა. ჩემს ყველა გამოფენაზე კეთდებოდა ხოლმე კატალოგი, რომელიც იმ კონკრეტულ ნამუშევრებს მოიცავდა, რაც ექსპოზიციაზე იყო წარმოდგენილი. ბავშვობის დროიდან დღემდე შესრულებული ნამუშევრები პირველადაა ერთად თავმოყრილი. ეს ჩემთვის განსაკუთრებით მნიშვნელოვანია, რადგან ამ ტილოების უმეტესობა ჩემგან უკვე წასულია,“ - ამბობს რუსუდან ფეტვიაშვილი.

ალბომის პრეზენტაციასთან ერთად, თიბისი გალერეაში მხატვრის პერსონალური გამოფენაც გაიხსნა, სადაც ბოლო პერიოდში შექმნილი 10 ნამუშევარი - გრაფიკული და ფერწერული ტილოები იყო წარმოდგენილი. ფეტვიაშვილის თქმით, ნამუშევრების უმეტესობა პირველად გამოიფინა. ექსპოზიცია თიბისი გალერეაში 27 ოქტომბერს, 15.00 საათამდე დარჩება.

"მოხარულები ვართ, რომ რუსუდანის რამდენიმე ნამუშევარს ფართო საზოგადოება პირველად სწორედ თიბისი გალერეაში იხილავს. ჩვენი საგამოფენო დარბაზი მუდმივად მასპინძლობს ხელოვნების სხვადასხვა მიმართულების წარმომადგენლებს. წელს კი განსაკუთრებული აქცენტი ინოვაციურ არტზე გვაქვს. ვცდილობთ, რომ ახალგაზრდებს ახალი შესაძლებლობები შევუქმნათ. მათ ვუთმობთ სივრცეს და ჩვენს ხელთ არსებული სხვა რესურსებითაც ვეხმარებით. ბევრი მიმდინარე პროექტი გვაქვს და საზოგადოებას მთელი წლის განმავლობაში მრავალ სასიამოვნო სიახლეს შევთავაზებთ," - AMBEBI.GE-სთან საუბარში განაცხადა თიბისი ბანკის საგარეო ურთიერთობების და მედიაკომუნიკაციების დირექტორმა თამარ კირვალიძემ.

ფეტვიაშვილის მხატვრობა განსაკუთრებული ტექნიკით გამოირჩევა. ურთულესი ფერწერული თუ გრაფიკული კომპოზიციები ერთი ხელის მოსმითაა შესრულებული, ყოველგვარი წინასწარი მონახაზისა და ესკიზის გარეშე, ნებისმიერ ფორმაზე. მხატვარი სხვადასხვა დროს სხვადასხვა მასალით მუშაობს - ფანქარი, აკვარელი, ტემპერა, ზეთის საღებავები, ქაღალდი, მუყაო, აბრეშუმი და სხვა. ბოლო პერიოდის ნამუშევრების ძირითადი ნაწილი ფერწერა და გრაფიკაა აბრეშუმზე.

რუსუდან ფეტვიაშვილის ნამუშევრები დაცულია ხელოვნების ეროვნულ მუზეუმში, ასევე სხვადასხვა ქვეყნის კერძო გალერეებსა და კოლექციებში, მათ შორის საფრანგეთში, შვეიცარიაში, აშშ-ში, უკრაინაში, რუსეთში, გერმანიაში, ინგლისსა და იტალიაში. მხატვრის ნამუშევრებს პირად კოლექციებში ინახავენ მარგარეტ ტეთჩერი, ჯორჯ ბუში, ილჰამ ალიევი, ტონინო გუერა, რიჩარდ მაილსი, ფაბრიციო რომანო და სხვა მსოფლიოში ცნობილი ადამიანები.

ნანა მღებრიშვილი

AMBEBI.GE

უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"

ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია

8-9 ოქტომბერს ძლიერი წვიმა და ქარია, 10-ში კვლავ გამოიდარებს - უახლოესი დღეების ამინდის პროგნოზი