ვეტერანი ხელბურთელი საზოგადოებას და ბიძინა ივანიშვილს დახმარებისთვის მიმართავს
ვეტერანი ხელბურთელი ამბერკი ტაბიძე საზოგადოებას და ყოფილ პრემიერ ბიძინა ივანიშვილს ღია წერილით მიმართავს და დახმარებას ითხოვს:
"მოგესალმებით, ბატონებო და ქალბატონებო! ამ წერილს გწერთ მე, ამბერკი ტაბიძე, ყოფილი ხელბურთელი, დაბადებული სამტრედიაში (27.12.1952), საერთაშორისო კლასის სპორტის ოსტატი (1977), სპორტის დამსახურებული მუშაკი (2009), ღირსების ორდენის კავალერი (27.12.2012), თბილისის "ბურევესტნიკისა" (1971-1990) და სსრკ-ს ნაკრების წევრი (1977-84), ევროპის ჩემპიონი ახალგაზრდებში (1973-74), მსოფლიო თასის ოთხგზის მფლობელი (1977-84), სსრკ-ს თასის მფლობელი (1978), სსრკ-ს ჩემპიონატის სამგზის პრიზიორი და სხვა მრავალი ტურნირის თუ შეჯიბრების ბომბარდირი, პრიზიორი და გამარჯვებული.
1999 წლიდან "თბილგაზისა" და "ყაზტრანსგაზის" რიგითი თანამშრომელი რამდენჯერმე დავჯილდოვდი საუკეთესო მუშაკის სიგელით. სამსახური დავტოვე წელს ჯანმრთელობის მკვეთრად გაუარესების გამო.
2015 წლის ნოემბერში დამისვეს გვერდითი ამიოტროფული სკლეროზის დიაგნოზი. ვინც ინფორმირებული არ ბრძანდებით, მინდა გაცნობოთ, რომ ეს უკურნებელი და პროგრესირებადი დაავადებაა და იწვევს ეტაპობრივად კუნთოვანი ქსოვილის ატროფიას მთელს ორგანიზმში. მისი დამარცხების საშუალება არ არსებობს, თუმცა შესაძლებელია გარკვეული დროით პროცესის შენელება და თავის გატანა სპეციალური ვარჯიშების, კვებისა და მედიკამენტების საშუალებით. რაც დრო გადის, უფრო და უფრო პროგრესირებს ეს ვერაგი დაავადება და ფაქტიურად უკვე მიმაჯაჭვა საწოლს.
საკუთარი სახსრებით, ახლობელ-მეგობრებისა და მერიის მწვრთნელთა დახმარების პროგრამით, სასტუმრო "CITADINES" ფინანსური მხარდაჭერით აქამდე ვახერხებდი თავის გატანას. მაგრამ, რაც დრო გადის, მდგომარეობა მიუარესდება და უფრო მეტი სხვადასხვა საშუალებაა საჭირო ჩემი სიცოცხლის გასახანგრძლივებლად (ეტლი, ფილტვების ვინტილაციის საშუალებები, პროფესიონალი ექთნის მომსახურება და ა.შ).
ამ დრომდე მედიკამენტების დაფინანსების თხოვნით მხოლოდ გამგეობისთვის მაქვს მიმართული. ჯერჯერობით უარი მითხრეს შესაბამისი ბიუჯეტის არქონის გამო. სხვა არავისთვის დახმარება არ მითხოვია და შესაბამისად არც მიმიღია, მაგრამ პირველი ჯგუფის ინვალიდობამ და გამოუვალმა მდგომარეობამ გადამაწყვეტინა ასე ღიად მომეწერა ყველა შესაბამისი უწყებისთვის, გულისხმიერი ადამიანებისთვის და, რა თქმა უნდა, ბატონი ბიძინა ივანიშვილისთვის ("ქართუსთვის"), რომელსაც აქვს სპორტსმენთა, ხელოვანთა და მეცნიერთა დახმარების ფონდი. თუ შესაძლებელია, იმ დარჩენილ დროში, რომელიც ღმერთს კიდევ აქვს ჩემთვის გამოყოფილი, იქნებ მოხერხდეს ჩემი და ჩემი მომვლელი მრავალსულიანი ოჯახის მხარდაჭერა და ფინანსური წახალისება.
რა თქმა უნდა, თქვენი კეთილი ნების გამოხატვის სურვილი მაქვს, არავის არაფერს ვავალდებულებ და ყველას წინასწარ ვუხდი მადლობას გულისხმიერებისა და ყურადღებისთვის, მხოლოდ წერილის წაკითხვისთვისაც კი. იმედს გამოვთქვამ, რომ კიდევ დიდხანს ვიქნები თქვენს გვერდით, საქართველოს და ჩვენი საზოგადოების სახელის სადიდებლად.
პატივისცემით, ამბერკი ტაბიძე 1.11.2016
მიმღების ბანკი: ს.ს. "თიბისი ბანკი"
ბანკის კოდი: TBCBGE22
მიმღების ანგარიში: GE08TB7437545061100010
მიმღების სახელი: ამბერკი ტაბიძე (599 42 54 11)
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია
