ორთაჭალაში მტკვრიდან ცოლ-ქმრის ცხედარი ამოიყვანეს

ორთაჭალაში, მტკვარში გადავარდნილი ავტომანქანის მგზავრები მდინარიდან რამდენიმე საათიანი სამძებრო ოპერაციის შემდეგ ამოიყვანეს.

არსებული ინფორმაციით, გარდაცვლილები 40-45 წლის ასაკის ცოლ-ქმარი არიან.

"მანქანაში იმყოფებოდა ორი პიროვნება. წყალქვეშა სამუშაოების შედეგად მოხერხდა გარდაცვლილი მამაკაცის ამოყვანა, მეორე ეტაპზე სპეციალური ტექნიკის - ამწეს გამოყენებით კი ამოყვანილ იქნა მსუბუქ ავტომობილში მყოფი მეორე პირიც, რომელიც ქალბატონი იყო. კვლევა დაადგენს ავტოსაგზაო შემთხვევის მიზეზებს", - განუცხადა ჟურნალისტებს შსს-ს საგანგებო სიტუაციების მართვის სააგენტოს თბილისის სამმართველოს უფროსის მოადგილე დავით გელაშვილმა.

გვიან ღამით, მტკვრის მარცხენა სანაპიროზე, volkswagen-ის მარკის ავტომობილი მდინარეში, მოცურების შედეგად გადავარდა.

ადგილზე მყვინთავებთან ერთად, მობილიზებული იყო რამდენიმე სამაშველო ჯგუფი.

გამოძიება ავტოსატრანსპორტო საშუალების მოძრაობის უსაფრთხოების ან ექსპლუატაციის წესის დარღვევის მუხლით მიმდინარეობს, რამაც ადამიანის სიცოცხლის მოსპობა გამოიწვია.