"წიგნებშიც კი არ შემხვედრია ისეთი ქალი, რომელიც შემიყვარდებოდა" - კაცი, რომელიც მხოლოდ ვაჟა-ფშაველას ეთანხმება
პროფესიით ეკონომისტია. ამ ფაკულტეტზე არჩევანი მშობლების ხათრით გააკეთა. ფართო საზოგადოებამ ისე გაიცნო, როგორც მუსიკოსი. ჩემი რესპონდენტი დათო კენჭიაშვილი გახლავთ. ამბობს, რომ არ უყვარს ხმაური, კლუბური ცხოვრება, ხშირად დამღლელ ყოველდღიურობას გაურბის და ბუნებაში განმარტოვდება ხოლმე. ვაჟა-ფშაველა ის ავტორია, რომელმაც მისი პიროვნების ჩამოყალიბებაზე ყველაზე დიდი გავლენა მოახდინა.
- ბოლო პერიოდში იმდენი საქმე მაქვს, წიგნების საკითხავად დროის გამონახვა ძალიან მიჭირს, მიუხედავად იმისა, რომ კარგი ნაწარმოებები ძალიან მიყვარს. წიგნებიდან შეიძლება ბევრი რამ ისწავლო.
ბუნებაში ყველაფერს უფრო კარგად აღიქვამ. ხშირად ვცდილობ, ქალაქის ხმაურს გავერიდო. მარტო ყოფნა ძალიან მიყვარს. ამოჩემებული ადგილი არ მაქვს, მაგრამ თავს ყველაზე კარგად ჩარგალში ვგრძნობ. ყველამ იცის, რომ ვაჟა-ფშაველას მშობლიური სოფელია. ეს ბუმბერაზი ადამიანი ამ ადგილიდან ეფერებოდა სამშობლოს, სრულიად სამყაროს. ყოველთვის მინდოდა გამეგო, რას გრძნობდა, როგორ აღიქვამდა, რა განცდები ჰქონდა ამ ადამიანს, როცა იმ გენიალურ ნაწარმოებებს ქმნიდა. ვაჟა იმდენად დიდია, მასთან ახლოს მისვლა საკმაოდ რთულია. ჩარგალში ყოფნისას ყველაზე კარგად გავიგე, რას ნიშნავს ასეთ ბუნებში რომ იზრდები. ვაჟას ეზოში უცნაური შეგრძნებები მეუფლება. მგონია, რომ მისი ყოფა იდუმალებითაა მოცული, ბევრი რამ იმალება, ვცდილობ ამოვხსნა, მაგრამ არ გამომდის. ისევე, როგორც ქართულ სიმღერის მრავალხმიანობაა ამოუხსნელი. აქ ყველაფერი ერთმანეთთან ჰარმონიაშია. სიჩუმეშიც კი საოცარი ბგერები ისმის. ერთხელ თბილისიდან ღამე სრულიად მარტო წავედი, ზაფხული იყო, მაგრამ ციოდა. ეზოში შევედი, მინდორზე წამოვწექი და პირველი რაც გამახსენდა, იყო - "რამ შემქმნა ადამიანად? რატომ არ მოველ წვიმადა"... უცბად ვიღაც მოვიდა, - აქ რას აკეთებო? - ვაჟა ძალიან მიყვარს-მეთქი. ზედმეტად აღარ მიხმაურია, ავდექი და წამოვედი. ჩემთვის ვაჟა უბრალოდ საყვარელი ავტორი კი არ არის, მისი შემოქმედება ჩემი ცხოვრების ნაწილია. თამამად შემიძლია ვთქვა, რომ მან ჩემი პიროვნების ჩამოყალიბებაზე ყველაზე დიდი გავლენა იქონია. წლების წინ, ერთმა უსაყვარლესმა ადამიანმა, პოეტმა თემურ ჩალაბაშვილმა მითხრა, ვაჟას კითხვას რაც მალე დაიწყებ, მით უკეთესიაო. დავიწყე და მის სამყაროში ჩავიძირე. ვაჟას შემოქმედებას აქვს დასაწყისი, მაგრამ არ აქვს დასასრული.
ლიტერატურული პერსონაჟები რეალურ სამყაროში რომ არსებობდნენ, დიდი სიამოვნებით ვიმეგობრებდი ჯოყოლასთან. ის ვაჟკაცობით, ადამიანობით მხიბლავს. ჩემი დამოკიდებულება ადამიანების მიმართ ყოველთვის ისეთია, როგორი დამოკიდებულებაც მას ზვიადაურთან ჰქონდა. ჩემთვის ჯოყოლა მამაკაცის იდეალია. ქალი პერსონაჟებიდან რომელი შემიყვარდებოდა? ამის თქმა ძალიან მიჭირს. არც ერთ ნაწარმოებში არ შემხვედრია ისეთი ქალი, რომელიც შემიყვარდებოდა. ახლაც ვაჟას სიტყვები გამახსენდა: "არ დაინდობა დიაცი"... როგორც ჩანს, ამითაც მოახდინა ვაჟამ გავლენა ჩემზე.
პროფესიით ეკონომისტი ვარ, ამ ფაკულტეტზე ჩემი სურვილით არ ჩამიბარებია. ყველა მშობელს უნდა, მის შვილს დიპლომი ჰქონდეს. მე მაშინვე ვიცოდი, რომ ეს დიპლომი არაფერში გამომადგებოდა. მამას 4 ომი აქვს გამოვლილი და უნდოდა, მეც მეომარი ვყოფილიყავი. სიმღერაში - "დაუკარით, რომ ძველ ხანჯალს ელდა ეცეს", მამა და მისი მეგობრები გადავიღე, ძველი კადრებიც გამოვიყენე. მამა დღესაც მოქმედი პოლკოვნიკია. ერთი პერიოდი სამხედრო აკადემიაშიც წამიყვანა. სამხედრო ცხოვრება ძალზე რთულია და მივხვდი, ვერ გავუძლებდი. იქიდან წამოსვლის შემდეგ ეკონომიურზე ჩავაბარე. ბავშვობიდან ვმღეროდი, მაგრამ არ მეგონა, ეს ჩემი საქმე თუ გახდებოდა. ლელა თათარაიძის "შენმა სურვილმა დამლია" პოპულარული გამხადა. ახლა აქტიურად ვარ გადართული პედაგოგიურ საქმიანობაზე.
- რამდენიმე წლის წინ, ერთ-ერთ ინგლისურ გაზეთში შემდეგი შინაარსის განცხადება გამოქვეყნდა: 20 წლის გოგონა, წესიერი ოჯახიდან, რომელსაც ჰქონდა 2 მილიონი გირვანქა სტერლინგი, ოჯახის შექმნის მიზნით ეძებდა წესიერ ყმაწვილს. სინამდვილეში აღმოჩნდა, რომ ეს გოგო უბრალოდ, კოლექციონერი იყო. რას აგროვებდა ის?...განაგრძეთ კითხვა
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია
