"ბიბლუსი გალერეაში" ტოლკინის "ჰურინის შვილების" პრეზენტაცია გაიმართა

"ბეჭდების მბრძანებლისა" და ჰობიტების სამყაროს შემქმნელი ჯ. რ. რ. ტოლკინის "ჰურინის შვილები" ქართულ ენაზე პირველად ითარგმნა. 1-ელ აგვისტოს "ბიბლუსი გალერეაში" წიგნი გამომცემლობა პალიტრა L-ის წარმომადგენლებთან ერთად ფილოსოფოსმა ზაზა შათირიშვილმა და მთარგმნელმა, გიორგი გომართელმა წარადგინეს.

"წიგნი განმსჭვალულია სიმამაცით, ეს არის წიგნი მეგობრობაზე, პატივისცემასა და ბრძოლაზე. წიგნში ისეთი სიმძლავრის ბოროტება ჩანს, როგორსაც აქამდე არსად შევხვედრივართ", - განაცხადა წიგნის მთარგმნელმა გიორგი გომართელმა.

"ტოლკინი მეოცე საუკუნის ლიტერატურის კლასიკოსია. ფენტეზის ჟანრის ჩამოყალიბებაში მისმა წიგნმა "ბეჭდების მბრძანებელი" დიდი როლი შეასრულა და დღესდღეობით არის კიდეც ამ ჟანრის შედევრი", - აღნიშნა ზაზა შათირიშვილმა.

წიგნთან ერთად შედგა წიგნების სერიის, "პორტალის" პრეზენტაციაც, რომელიც ფენტეზისა და სამეცნიერო ფანტასტიკის საუკეთესო ლიტერატურულ ნიმუშებს გააერთიანებს.