რა მდგომარეობაშია სპეცოპერაციის დროს დაჭრილი თემირლან მაჩალიკაშვილი

სპეცოპერაციის დროს დაჭრილი თემირლან მაჩალიკაშვილი ამ დრომდე ღრმა კომატოზურ მდგომარეობაშია, - ამის შესახებ "ინტერპრესნიუსს" თელავის რეფერალურ საავადმყოფოში განუცხადეს. საავადმყოფოს დირექტორის, ხათუნა ჭონიაშვილის თქმით, პაციენტი მართვით სუნთქვაზეა და რეანიმაციულ განყოფილებაში იმყოფება. მისივე ინფორმაციით, ამ ეტაპზე ახალგაზრდას ოპერაციის შემდგომ გართულებები არ აქვს.

თემირლან მაჩალიკაშვილი 26 დეკემბერს, პანკისის ხეობაში ჩატარებული სპეცოპერაციის დროს დაიჭრა. მას ქალა-ტვინის გამჭოლი ჭრილობა აქვს მიყენებული. სახელმწიფო უსაფრთხოების სამსახური 19 წლის ახალგაზრდას ტერორიზმის ხელშეწყობაში ედავება. 26 დეკემბერს ჩატარებული სპეცოპერაციის შედეგად პანკისსა და თბილისში სულ 5 პირი დააკავეს.