ავტორი:

მამის მკვლელობაში ბრალდებული დები პატიმრობაში დატოვეს - როგორ პირობებში იმყოფებიან ხაჩატურიანები

მამის მკვლელობაში ბრალდებული დები პატიმრობაში დატოვეს - როგორ პირობებში იმყოფებიან ხაჩატურიანები

სამი და, რომლებსაც მამის, მიხაილ ხაჩატურიანის მკვლელობა ბრალდება, მოსკოვის სასამართლომ პატიმრობაში დატოვა. „სპუტნიკ არმენია“ წერს, რომ გოგონები საპატიმროში პირობებს არ უჩივიან. 17 წლის მარიას ადვოკატის, იაროსლავ პაკულინის თქმით, გოგონები გამოძიებასთან აქტიურად თანამშრომლობენ.

საქმე ძალიან ხმაურიანი აღმოჩნდა. 57 წლის მიხაილ ხაჩატურიანს საკუთარი შვილები 27 ივლისს დანებით დაესხნენ თავს. მამაკაცმა შეძლო მათგან თავი დაეხსნა, თუმცა ძლიერი სისხლდენის გამო გაქცევა ვერ შეძლო და მალე გარდაიცვალა კიდეც.

გოგონებმა მოგვიანებით გამოძიებასთან განაცხადეს, რომ მიხაილმა ნარკოტიკული საშუალებების მოხმარება დაიწყო და სრულიად შეიცვალა. მზრუნველი მამა მონსტრად იქცა, რომელიც სცემდა შვილებს. გოგონების დაცვა არც დედას შეეძლო, რადგან ოჯახი მან დიდი ხნის წინ მიატოვა.

საქმის ერთ-ერთი მოწმე ამბობს, რომ მიხაილს კრიმინალურ წრეებთან ჰქონდა კავშირი.

დები ამ დრომდე სხვადასხვა საკანში არიან მოთავსებული. ეს პირველი შემთხვევაა, როდესაც გოგონებს ამდენი ხნის მანძილზე ერთმანეთი არ უნახავთ. ხაჩატურიანები ერთმანეთს ვერც სასამართლო სხდომების დროს ხვდებიან - რუსული კანონმდებლობის თანახმად, ერთსა და იმავე საქმეზე ბრალდებულებს შეხვედრის უფლება არ აქვთ.

„გოგონები ერთმანეთის გამო ნერვიულობენ. ერთად ყოფნას არიან მიჩვეული,“ - განაცხადა უფლებადამცველმა ივან მელნიკოვმა.

დებთან ფსიქოლოგები მუშაობენ. უმცროს დას, მარიას მათთან უკვე ხუთი შეხვედრა ჰქონდა. იზოლატორებში გოგონების მდგომარეობა გაუმჯობესდა - დედამ, აურელია დუნდუკმა გოგონებს საჭირო ნივთები, საჭმელი, საბანკო ბარათი გადასცა.

„ბუნებრივია, გოგონებს ძალიან უჭირთ. ისინი შეშინებულები არიან, ერთმანეთზე ნერვიულობენ, ძლიერი ემოციური დაძაბულობა აქვთ. თუმცა მას შემდეგ, რაც ნივთები გადასცეს, შედარებით დამშვიდდნენ. მანამდე მათ გამოსაცვლელი ტანსაცმელიც არ ჰქონდათ,“ - ამბობს უფლებადამცველი.

შუათანა დას, 18 წლის ანგელინას უკვე აქვს ტელევიზორი და მათი საქმის გაშუქებას მედიის საშუალებით თვალს აქტიურად ადევნებს. მისი ადვოკატი, ალექსეი პარშინი ამბობს, რომ ჟურნალისტების უმეტესობა გოგონების მიმართ კეთილგანწყობილია.

„თუ ხაჩატურიანებს მისწერთ წერილებს, ეს მათ ძალიან დაეხმარება. თუ ხალხისგან თანადგომის სიტყვებს მოისმენენ, ამ საშინელების გადატანა უფრო მარტივი იქნება,“ - ამბობს ადვოკატი.

უფროსი და, კრისტინა ჯერჯერობით ტელევიზორის გარეშეა. ამბებს ის ადვოკატისგან, ალექსეი ლიპცერისგან ისმენს.

გოგონების დედა, აურელია პრესასთან საუბარზე კატეგორიულ უარს აცხადებს. ადვოკატი პარშინი ამბობს, რომ როდესაც შვილები გისოსებს მიღმა იმყოფებიან, ადვილად გასაგებია, რომ დედის ფსიქოლოგიური მდგომარეობა მძიმეა.

დაცვის მხარე სასამართლო სხდომაზე ცდილობდა, გოგონებისთვის პატიმრობა შინაპატიმრობით შეეცვალათ. ანგელინას ადვოკატი პარშინი სასამართლოს სთხოვდა, გაეთვალისწინებინა ხაჩატურიანების ასაკი და ფსიქოლოგიური მდგომარეობა. ადვოკატი მიიჩნევს, რომ გოგონებისთვის დედასთან ურთიერთობა აუცილებელია.

"დებმა საშინელი ისტორიები მიამბეს. მამა მათ არ უშვებდა სკოლაში, ცემდა. ოჯახში ძალიან ბევრი ცუდი ამბავი ხდებოდა. მიხაილმა გოგონების დედა 2.5 წლის წინ გააგდო და მისი და გოგონების მოკვლით ემუქრებოდა. შვილებს სისტემატურად სცემდა, მონებივით ეპყრობოდა. ძალადობა, მუქარა, იარაღის გამოყენება - ეს ყველაფერი ხდებოდა ოჯახში," - ჰყვება უფლებადამცველი ივან მელნიკოვი.

გოგონებს ჯგუფურად ჩადენილი, წინასწარ დაგეგმილი მკვლელობის გამო 20 წლამდე პატიმრობა ემუქრებათ.