ქართველი დიზაინერი, რომელიც ლოგოებს "დისნეისა" და "ნიუ ბალანსისთვის" ქმნის

ლოგოს ქართველი დიზაინერი 40 წლის გიორგი ბოხუა მსოფლიომ დიდი ხანია გაიცნო. თავდაპირველად, მის მიერ შექმნილი ლოგოებით „ინსტაგრამზე“ აღფრთოვანდნენ, ახლა კი, როგორც ბოხუა ამბობს, პოტენციური კლიენტები მისი ნამუშევრებით, უმეტესად, ცნობილ პლატფორმებზე behance-სა და dribbble-ზე ინტერესდებიან.

ქართველი დიზაინერი მუშაობს ისეთი მსხვილი კომპანიებისთვის, როგორიც არის Disney, New Balance, NFL, Wired Magazine...

გიორგი ბოხუა 1978 წლის 22 ივლისს საქართველოში დაიბადა.

ბრიტანულ პორტალთან logogeek.uk დიზაინერი ამბობს, რომ 2006 წელს, როდესაც კიევში ცხოვრობდა, ფულის გარეშე დარჩენილმა სამსახურის მოძებნა სცადა. ბოხუას დაუკავშირდა ერთ-ერთი კომპანიის დირექტორი, იან ტიშენკო და მის სტუდიაში მუშაობა შესთავაზა.

„მას სიმპათიები გაუჩნდა ჩემ მიმართ - მე საქართველოდან ვიყავი, ის უკრაინელი იყო, ბევრი საერთო თემა გვქონდა სასაუბრო, როგორც პოლიტიკის, ასევე - კულტურის შესახებ... მან მითხრა, რომ რაღაცებს მასწავლიდა, მოგვიანებით კი სტუდიაშიც მიმიღო. ასე დავიწყე ლოგოს დიზაინის სწავლა 2007 წელს“ - ჰყვება ბოხუა ინტერვიუში.

ლოგოს შექმნას მისთვის გარკვეული დრო სჭირდება, რამდენიმე დღის განმავლობაში აკეთებს მონახაზებს, შემდეგ კი სრულებით წყვეტს მუშაობას, გონებაში ამუშავებს იდეას. ბოხუა ამბობს, რომ დამკვეთისგან ლოგოს პრეზენტაციამდე ყოველთვის 10-დღიან ვადას იღებს. ბოხუა ამჟამად აშშ-ში ცხოვრობს და მუშაობს.