ზუგდიდში შუა ხნის მამაკაცს მატარებელი დაეჯახა

ზუგდიდიდან თბილისის მიმართულებით მოძრავი მატარებელი სოფელ ცაცხვთან 55 წლამდე მამაკაცს დაეჯახა.

როგორც „ინტერპრესნიუსის“ კორესპონდენტი ადგილიდან იუწყება, დაშავებული ზუგდიდის რეფერალურ ჰოსპიტალშია გადაყვანილი. მისი ჯანმრთელობის მდგომარეობა მძიმეა. მამაკაცი მართვით სუნთქვაზე იმყოფება.

“მამაკაცს აღენიშნება ქალა-ტვინის ღია ტრავმა, თავის ტვინის დაჟეჟილობა, ტრავმული სუბარაქნოიდული და სუბდურული ჰემატომა, გულ-მკერდის დახურული ტრავმა, ნეკნების მრავლობითი მოტეხილობა. ჩაუტარდა დეკომპრესიული ტრეპანაცია, ჰემატომის ევაკუაცია, პლევრის ღრუს დრენირება”, - განუცხადა „ინტერპრესნიუსს“ საავადმყოფოს სამედიცინო მენეჯერმა სულხან ორჟონიამ.

მომხდარზე გამოძიება სს კოდექსის 275-ე მუხლით დაიწყო, რაც რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.